Þarf stærri ramma fyrir svona ferðir.

Þessar dagana og vikurnar er langalgengasta vindáttin suðvestanátt með éljagangi eða snjókomu. 

Á sama tíma er bjart að mestu á norðausturhluta landsins. Gosstöðvarnar í Holuhrauni hafa verið sjáanlegar á mila.is á sama tíma sem dimmviðri hefur verið hérna megin á landinu. 

Í kvöld var rakastigið aðeins rúmlega 60% á þessum slóðum sem þýðir þurrviðri.

Ef Norðurljósaferðir eiga að heppnast betur en nú er, þyrfti að hugsa sér stærri ramma fyrir þær, þar sem gert væri ráð fyrir frávikum og auknum kostnaði í hluta þeirra vegna þess að fara þyrfti hinum megin á landið til að uppfylla væntingar.

Meðalverðið fyrir ferðirnar yrði þá haft nógu hátt til þess að dekka þennan aukakostnað þegar hann kæmi upp.  

Fyrir 30 árum athugaði ég þá hugmynd að bjóða ríkum útlendingum upp á ævintýraferð á Íslandi, þar sem verðið yrði haft nógu hátt til þess að geta séð við skakkaföllum vegna veðurs og farið á einstökum dögum hinum megin á landið. 

Ég fékk mér firmanafnið Hugmyndaflug af því að flug átti að vera aðalatriðið í einstæðri upplifun sem í boði væri. 

Sá sem keypti sér svona ferð fengi loforð um að lenda á innan við viku á einhverjum einum af fjórum eftirtöldum stöðum: Við Látrabjarg (Hvallátur), í Hornvík, í Herðubreiðarlindum og í Kverkfjöllum þar sem skíðaflugvél yrði notuð til að lenda bæði niðri við skálann og uppi á toppnum.

Sú ferð yrði lang mögnuðust af þeim öllum, ef aðstæður leyfðu. 

Ef ekki yrði hægt að fara á neinn ofangreindra staða, yrði hluti af verði ferðarinnar endurgreiddur, enda jafnaðarverðið miðað við að þola áætluð frávik vegna veðurs og annars.  

Ég viðraði hugmyndina við Pétur Einarsson, þáverandi flugmálastjóra, og honum leist vel á.

En skrifræðið felldi hana, enda næstum því eins og að fara að reka British Airways hvað það varðaði, auk þess sem ég hafði nóg annað að sýsla.

 

1.200 skoðuðu norðurljós í gær

Athugasemdir

[Þorsteinn Briem, 12.2.2015 kl. 02:05]

Öllum kaupendum norðurljósaferða er væntanlega sagt að ekki sé öruggt að þeir sjái norðurljós í þessum ferðum.

En það er ekki þar með sagt að þeir græði ekkert á því að fara í "norðurljósaferð", enda þótt engin séu norðurljósin.

Farnar hafa verið norðurljósaferðir á hvalaskoðunarbátum frá Reykjavíkurhöfn seint á kvöldin nú í vetur og farþegarnir fylla stórar rútur sem ekið er að höfninni.

Hins vegar þarf ég einungis að horfa út um glugga hér í Sörlaskjólinu til að sjá tungl, stjörnur og norðurljós á stjörnubjörtum himni.

[Þorsteinn Briem, 12.2.2015 kl. 05:38]

Aurora forecasts - Icelandic Meteorological Office