Þetta gengur svo grátlega seint.

Þegar ég kynntist fyrst kjörum fatlaðra náið fyrir um 35 árum fólst það mest í því að reka sig á veggi alls staðar í þjóðfélaginu. "Að reka sig á veggi" er viðeigandi lýsing á því sem fatlaðir þurfa enn að þola eftir öll þessi ár réttindabaráttu þeirra. 

Fyrir fatlaðan mann jafngildir það að komast ekki um á hjólastól sínum þar sem við hin göngum um hugsunarlaust að við, hin ófötluðu, rekum okkur á vegg í stað þess að halda áfram ferð okkar. 

Strax í upphafi starfs ferðafélags fatlaðra, Flækjufótar, voru þessir veggir hvarvetna um allt land. Smáms saman skánaði ástandið hér og þar en þegar litið er yfir þetta svið þjóðlífsins verður að segja að þetta gengur svo grátlega seint. 

Síðan Flækjufótur í upphafi starfs síns rak sig hvarvetna á veggi er liðinn um aldarfjórðungur en í könnunarferðalagi fyrir nokkrum dögum kom í ljós að enn eru hindranir fyrir fatlaðra hvarvetna.

Ég finn ekki viðeigandi mynd til að setja hér inn, en grunnástæðuna fyrir þessu ástandi er að finna djúpt í hegðun okkar, eins og til dæmis speglast vel í umferðinni. Og varðandi þessa útbreiddu hegðun gengur líka grátlega seint að breyta henni. 

Ég hef stundum birt myndir af bílum ófatlaðra í stæðum fyrir hreyfihamlaða en hugsunarleysið og tillitsleysið, sem er afleiðing þess, skín líka í almennum bílastæðum.  

Smellti þessari mynd af einu slíku tilviki í dag í bílastæði við Borgartún.

Sú gata hefur verið í umræðunni að undanförnu, meðal annars vegna bílastæðisvanda. 

Ekki bætir það vandann ef okkur finnst öllum, hverju um sig, að við eigium kröfu á að taka tvö stæði undir hvern bíl. 

Að þar sé ekki slagorðið "tveir fyrir einn!", heldur "einn fyrir tvo!"

Eins og sést er svarta bílnum ansi nákvæmlega með hvítu línuna undir miðjum bíl, svo að ekki sé möguleiki á að komast út úr bíl, sem lagt væri við hlið honum.  Þannig að ekki skortir á ökuleiknina undir slagorðinu "einn fyrir tvo!" 

 

Þurfa fatlaðir að borga tvöfalt?

Athugasemdir

[Ágústa Karla 'isleifsdóttir (IP-tala skráð) 8.4.2015 kl. 09:58]

Þegar ég lærði á bíl þá kenndi frændi minn mér það að leggja aldrei í stæði fyrir fatlaða.  Hans aðalvinna var að keyra fatlaða,þannig að hann vissi vel hvað hann var að segja.

Á þessum áratugum sem liðnir eru þá hef ég einu sinni lagt í stæði fyrir fatlaða,og ég skammaðist mín svo fyrir það að ég hef ekki gert það aftur.

Því hlutfallslega eru miklu færri stæði fyrir fatlaði en ófatlaða.  S.s miðað við höfðatölu.

[Þorsteinn Briem, 8.4.2015 kl. 11:28]

"Þetta er eitthvað sem ­heilbrigðir menn eiga ekki að gera," segir nemandi við Keili. Hann varð vitni að því þegar Bjarni Benediktsson formaður Sjálfstæðisflokksins var farþegi í bíl sem lagði í stæði fatlaðra við aðalbyggingu Keilis ..."

"Bíllinn var í stæðinu í um klukkutíma eða þar til Bjarni og félagi hans héldu sína leið.

"Við vorum nokkur á leið í skólann eftir hádegishlé. Öll bílastæði voru full og við lögðum þess vegna við íþróttahúsið sem er töluvert frá.

Þá sáum við glansbílaflota koma að húsinu og einum þeirra var lagt í stæði fatlaðra," segir nemandi sem tekur fram að það hafi verið blíðskaparveður."

Lagði í bílastæði fyrir fatlaða

[Gudjon Sigurðsson (IP-tala skráð) 8.4.2015 kl. 11:33]

Það er gott að eiga fólk eins og þig að Ómar. Þú ert óþreitandi við að benda á þetta hugsunarleysi sem ríkir allstaðar í þjóðfélaginu gagnvart þeim sem þurfa aðstoð. Ég tek hatt minn ofan fyrir þér. Takk fyrir að nenna þessum endalausa slag :)

[Þorsteinn Briem, 8.4.2015 kl. 13:09]

Fjöldinn allur af bílastæðum í Borgartúni og þar eru stórir bílakjallarar.

[Þorsteinn Briem, 8.4.2015 kl. 13:20]

Loftmynd af Borgartúni - Hægt að stækka

[Ægir Kristinsson (IP-tala skráð) 8.4.2015 kl. 16:56]

Einkanúmerið RÖSKUR segir nokkuð