Ólíklegt að þetta breyti neinu.

Meiðsli eru hluti af íþróttum. Muhammad Ali kjálkabrotnaði í fyrsta bardaga sínum við Ken Norton 1973 og var aldrei úr því skorið, hvort það gerðist snemma eða seint í bardaganum og hafði í raun nokkur úrslitaáhrif, því að í tveimur bardögum þeirra síðar var afar mjótt á mununum. 

Sonny Liston bar við sliti í upphandleggsvöðva þegar hann gafst upp sitjandi á stólnum í fyrri bardaga þeirra, en allir sáu að hann átti ekki roð í Ali. Liston þóttist geta sýnt þetta á röntgenmynd, en aldrei sást hún. Pacquiao hefur ekki boðið fram nein sönnunargögn um eyms sín og Maywaether segist hafa glímt við svipuð vandamál fyrir bardagann. 

Þegar George Foreman fékk slæman skurð á augnabrún á æfingu fyrir bardagann við Ali í Zaír 1974 varð að fresta bardaganum um sex vikur. Pacquiao og hugsanlega líka Mayweather ákváðu að biðja ekki um frestun enda óvíst um að meint meiðsli væru þess eðlis að hægt væri að fá slíku framgengt. 

Arturo Gatti barðist þrisvar í mögnuðum bardögum við Mickey Ward og handarbrotnaði í einum þeirra án þess að það breytti úrslitum í þeim bardaga. 

Ekki var að sjá í bardaga Mayweathers og Pacquaio í nótt að sársauki eða meiðsli í öxl hömluðu Manny í að ná sér í stig, þótt hugsanlega hefði dregið úr áhrifamætti einstakra högga. Úr því að það var stigafjöldi sem réði úrslitum en ekki bit bestu högga voru úrslitin næsta eðlileg.   

Ekki var heldur að sjá í horni hans á milli lota að axlarmeiðsli væru viðfangsefni, en það sannar svo sem ekki neitt, því að sé um slíkt að ræða, getur verið varasamt fyrir hnefaleikara að láta andstæðinginn komast á snoðir um slíkan veikleika. 

Muhammad Ali var 31 árs þegar hann tapaði fyrir Ken Norton 1973 og átti því nokkur ár framundan til að vinna sig upp í áskorandastöðu gagnvart þáverandi heimsmeistara George Foreman með því að berjast aftur við Norton og Frazier, einu mennina sem hann hafði tapað fyrir. 

Foreman var 24 ára og að öllu eðlilegu átti hann nægan tíma framundan til að berjast fyrir titli sínum.

Staðan er önnur nú. Mayweather er 38 ára og Pacquiao að verða 37. Þeir eru augljóslega á enda ferils síns og afar ólíklegt að Manny fái annan bardaga við Mayweather sem er að skipuleggja sinn síðasta bardaga í haust.

Manny verður því sennilega að sætta sig við þá staðreynd að Floyd Mayweather er besti hnefaleikamaður okkar samtíðar.  

Axlarmeiðsli í bardaga aldarinnar