Um að gera að fá krabbamein í byrjun kvótaárs?

Nú má sjá samspil peninga lífs og heilsu víða í fréttum, ekki bara í kjarabaráttunni. 

Orðalagið á fyrirsögninni hér að ofan er kannski hastarlegt en það er þó viss sannleiksbroddur í henni, því að nýr veruleiki blasir við krabbameinssjúklingum ef taka á tillit til krafna ríkisvaldsins um kvóta á krabbameinslyf.

Þau ár sem sjúklingar, sem þurfa tiltekin lyf gegn vágestinum, eru fleiri en í meðalári, fá þeir sjúklingar lyfin, sem eru svo heppnir að "kvótinn" á lyfjameðferðina er ekki búinn þegar krabbinn uppgötvast. 

Þess vegna má umorða þennan kalda veruleika þannig að fyrir það, sem verða krabbameinssjúklingar á annað borð, sé um að gera að fá krabbann sem fyrst á kvótaárinu.

Annars megi þeir éta það sem úti frýs og allt tal um jafrnæðsreglu stjórnarskrár eigi ekki við. 

Í gær var ég í skoðun á Lansanum þar sem manni er skipað fara upp með hendur. 

Í ljósi hins nýja veruleika kom eftirfarandi partur úr lagi Stuðmanna upp í hugann: 

Upp með hendur!

Niður með brækur!

Peningana, ellegar þú færð ekkert lyf!

 

Kjarabarátta „um líf fólks og heilsu“

Athugasemdir

[Helga Kristjánsdóttir, 4.6.2015 kl. 01:50]

Samfylkingaýkjur! Ég þekki konu sem nýlega var útskrifuð sem alheil af krabbameini,eftir dýr lyf GUÐI sé lof.92 ára kona var strax tekin í svokallaðan fleygskurð á brjósti í apríl,var þó ekki í bráðri hættu.

[Ómar Ragnarsson, 4.6.2015 kl. 10:35]

Bréfaskrifin milli stjórnendannna í þessum máli voru engar "Samfylkingarýkjur" heldur blákaldar staðreyndir varðandi það ástand að í gildi væri kvóti á fjölda þeirra sem fengju nauðsynlega bráðameðferð, því að krabbinn bíður ekki rólegur á meðan kerfið hikstar og erfitt er fyrir lækna að meta hve hratt hann vex og hvenær fólk er eða er ekki í bráðri hættu.

"Útskrifuð sem alheil af krabbameini" eins og þú orðar það, segir stóran hluta sannleikans. 

Konan, sem fékk þessa meðferð, sem þú lýsir, var inni í kvótanum, og því var hægt að koma henni til bjargar af öryggi með því að gefa henni hin dýru lyf STRAX en ekki einhver tíma síðar þegar það gæti orðið of seint. 

[Þorsteinn Briem, 4.6.2015 kl. 16:42]

Ómar nú á grænni grein,
greindur var í síma,
alltaf fær hann innanmein,
á alveg réttum tíma.