Vita hinir erlendu gestir um eðli Hellisheiðarvirkjunar?

Alls staðar þar sem ég hef verið viðstaddur opinbera viðburði og íslenskir ráðamenn hafa rætt um íslenskar háhitavirkjanir fyrir raforkuver, hafa þeir eingöngu talað um að þessar virkjanir séu glæsilegt dæmi um "hreina og endurnýjanlega" orku og "sjálfbæra þróun" í orkuöflun. 

Það vekur spurningar varðandi það sem Ségoléne Royal umhverfsráðherra Frakklands fékk að vita þegar hún skoðaði Hellisheiðarvirkjun. 

1. Fékk hún að vita að orka virkjunarinnar er hvorki hrein né endurnýjanleg? 

2. Fékk hún að vita að síðustu misseri hefur afl virkjunarinnar byrjað að dala hratt og ákveðið og er nú komið úr 303 megavöttum niður í 260?

3. Var henni sagt frá því að eina forsendan, sem gefin er fyrir endingu svona virkjana er sú, að orkan endist í 50 ár og að eftir það þurfi að bíða í tvöfalt lengri tíma til þess að orkan byggist upp á ný? 

4. Var henni gerð grein fyrir því að til þess að standa við skilmála um að afhenda umsamda orku frá virkjuninni þarf að halda áfram að virkja á nýjum og nýjum svæðum á Reykjanesskaganum og einnig utan hans? 

5. Var henni sagt frá því að íslenskir vísindamenn hefðu sett fram aðferð við að gera nýtinguna endurnýjanlega og sjálfbæra með því að virkja í byrjun aðeins lítinn hluta orkunnar á svæðinu og hafa fulla yfirsýn yfir það að innrennsli heits vatns væri nógu mikið til þess að orkugetan minnkaði ekki? 

6. Var henni sagt frá aðgerðum til þess að minnka útblástur brennisteinsvetnis frá virkjuninni, sem enn sést ekki hvort muni duga? 

7. Eða var henni yfirleitt sagt frá því að gríðarlegt magn brennisteinsvetnis hefði streymt frá virkjuninni allt frá því að hún tók til starfa? 

Hlutverk afar góðra íslenskrar vísindamanna og kunnáttumanna við að ryðja braut sjálfbærri notkun jarðvarma í öðrum löndum er of mikilvægt til þess að verið sé skipulega að leyna ofangreindum atriðum þegar Íslendinga kynna þetta mikilvæga mál.

Fyrr eða síðar mun blaðran springa, og raunar er þegar byrjað að leka úr henni.  

 

 

Royal í Hellisheiðarvirkjun

Athugasemdir

[Eiður Svanberg Guðnason, 28.7.2015 kl. 19:23]

Að sjálfsögðu ekki. Hvernig  dettur þêr það í hug?

[Mörlandinn (IP-tala skráð) 28.7.2015 kl. 21:02]

Hvað gera Frakkar við kjarnorkuúrganginn?

Svar:

 "

 "

 "

 "

 "

\/

Bóka hann á aðra og setja hann í frakkavasann...

[Júlíus Valsson, 28.7.2015 kl. 22:01]

Góður pistill hjá þér Ómar, að vanda. Virkjun sjávarfalla sýnist mér vænlegur kostur. Engin efna- eða sjónmegnun og sjálfbært á meðan máninn er á sínum stað. 

[Gunnar Th. Gunnarsson, 29.7.2015 kl. 11:27]

Í þessum pistli segir þú að jarðhitaorkan sé bæði sjálfbær og ekki-sjálfbær.

Fékk hún að vita það?