Áfram kjöraðstæður til að menga sjó við landið?

Fyrir nokkrum árum upplýsti íslenskur skipstjóri, sem siglt hefur í áratugi um heimsins höf, í viðtali við blað, sem gefið var út í Straumsvík, að hvergi í heiminum fyndust jafn góðar aðstæður til að skola kjölvatni og hvers kyns óþverra í sjóinn og á Íslandi.

Víðast annars staðar, jafnvel í Afríku og Asíu, lægju þung viðurlög við slíku, jafnvel fangelsisvist og missir skipstjórnarréttinda.

Skipstjórinn hafði siglt oft með súrál til Íslands um þveran hnöttinn og vissi hvað hann væri að segja. Á Íslandi væri honum alveg óhætt, það væri alltaf gott að "koma heim".

Ég birti myndir af viðtalinu oftar en einu sinni og bar málið meira að segja munnlega upp í umhverfis- og auðlindaráðuneytinu.

En því miður virðist mikið til því sem Árni Finnsson formaður Náttúruverndarsamtaka Íslands sagði á málfundi, að vegna mikils umfangs verkefna náttúruverndarfólks á landi, næði baráttan ekki nema niður í fjöru, því miður.

Og enn lítinn árangur að sjá, þrátt fyrir viðleitni Landhelgisgæslunnar.

Sýknaður af því að olíumenga sjó

Athugasemdir

[Þorsteinn Briem, 25.1.2016 kl. 19:29]

Lög um varnir gegn mengun hafs og stranda nr. 33/2004:

"25. gr. Refsiviðurlög.

Brot gegn lögum þessum og reglugerðum settum samkvæmt þeim varða sektum eða fangelsi allt að tveimur árum nema þyngri refsing liggi við samkvæmt öðrum lögum. Sé um stórfelld eða ítrekuð ásetningsbrot að ræða skulu þau varða fangelsi allt að fjórum árum.

Tilraun til brota og hlutdeild í brotum á lögum þessum og reglugerðum settum samkvæmt þeim er refsiverð eftir því sem segir í III. kafla almennra hegningarlaga.

26. gr. Sektir.

Sektir má ákvarða lögaðila þó að sök verði ekki sönnuð á fyrirsvarsmenn eða starfsmenn hans eða aðra þá einstaklinga sem í þágu hans starfa, enda hafi brotið orðið eða getað orðið til hagsbóta fyrir lögaðilann. Þó skal lögaðili ekki sæta refsingu ef um óhapp er að ræða. Einnig má, með sama skilorði, gera lögaðila sekt ef fyrirsvarsmenn eða starfsmenn hans eða aðrir einstaklingar sem í þágu hans starfa gerast sekir um brot eða ef það stafar af ófullnægjandi tækjabúnaði eða verkstjórn.

27. gr. Farbann.

Ef brotið er gegn ákvæðum laga þessara og brotið tengist skipi skal skipið sett í farbann og er eigi heimilt að láta það laust fyrr en málinu er lokið og sekt auk málskostnaðar greidd að fullu, svo og kostnaður eftirlitsaðila. Um farbann fer að ákvæðum laga um eftirlit með skipum.

Þó er heimilt að láta skip laust fyrr ef sett er bankatrygging eða önnur trygging jafngild til greiðslu sektar og alls kostnaðar.

Til tryggingar greiðslu sektar samkvæmt grein þessari, málskostnaðar og kostnaðar eftirlitsaðila skal vera lögveð í skipinu í tvö ár."

"Viðauki I.

A. Starfsemi sem getur valdið bráðamengun á hafi eða ströndum vegna eðlis starfseminnar og/eða nálægðar hennar við sjó.

   1. Fiskimjölsverksmiðjur.
   2. Álframleiðsla.
   3. Áburðarframleiðsla.
   4. Sements- og kalkframleiðsla.
   5. Kísiljárnframleiðsla.
   6. Kísilmálmframleiðsla. ..."

Steini Briem, 22.1.2014

[Halldór Egill Guðnason, 25.1.2016 kl. 23:54]

Í okkar gríðarstóru landhelgi er að finna aðeins eitt varðskip við eftirlit, hverju sinni. Jafnvel ekkert á stundum. Eftirlit er því nánast ekkert og þetta vita flestir sem leið eiga um okkar hafsvæði, hvort heldur inn eða erlendir. Enginn hefur hugmynd um hve miklu er hent í hafið kringum landið, eða hverju. Sennilega færi um flesta, ef sú vitneskja væri aðgengileg. Meðan eftirlit er nánast ekkert og lítill vilji til að bæta þar úr, mun hver sem er áfram getað losað það sem hentar í hafið kringum okkur, því miður.

 Góðar stundir, með kveðju að sunnan.