Eru Bláfjöllin ekki nóg? Þar eru vannýttir möguleikar.

Nú er á teikniborðinu stórbrotin hugmynd um svifbraut upp á Esju sem gefi eigendum hennar hundruð milljóna króna í tekjur. Á sama tíma er annar útsýnisstaður nálægt Reykjavík vannýttur á sumrin. 

Efsti bletturinn á Bláfjöllum er í um 700 metra hæð yfir sjávarmáli. Þangað liggur þegar greið leið á bílum og komin eru skíðamannvirki með veitingastað.

Útsýnið af þessum stað er mikilfenglegt, Reykjanesskaginn og Faxaflóinn með Snæfellsjökul sem ysta vörð, þegar horft er til vesturs og norðvesturs, meginfjöllin ofan byggða frá Akrafjalli um Esju, Botnssúlur, Hengil, Langjökul fjær til norðausturs og síðan Suðurlandsundirlendið með Heklu, Tindfjöll og loks Eyjafjallajökul og Mýrdalsjökul sem útverði í suðaustri.

Fyrir landi Vestmannaeyjar með sinn útvörð, Surtsey.

Frá Snæfellsjökli til Mýrdalsjökuls eru tæplega 300 kílómetrar í loftlínu.

Tiltölulega örfáir koma þarna á sumrin. 

Af því að þegar er komið rask og mannvirki í Bláfjöllum, er toppur þeirra ákjósanlegasti og upplagðasti útsýnisstaður sem völ er á á Suðvesturlandi, og Bláfjallaskáli eða nettur skáli efst uppi gæti orðið að fjölsóttum ferðamannastað þegar vel viðrar.

Þúsundir fólk hafa þegar hagsmuni af því að fá að ganga á Esjuna í eins og hún er, í friðsæld hennar og fegurð, sér til andlegrar og líkamlegra heilsubótar, og hlýtur þetta fjallgöngufólk að teljast ígildi lögaðila með ákveðna hagsmuni, ef Árósasamningurinn er pappírsins virði hér á landi.

Þótt víða um lönd séu kláfar á borð við Flöjen í Björgvin, er ekki þar með sagt að það þurfi að drita slíku niður hvar sem er.  Raunar er svæðið, sem Flöjen liggur um engan veginn sambærilegt við Esju hvað snertir ásýnd og ímynd. 

Í Arches-þjóðgarðinum í Utah er Delicate Arch frægasti steinboginn, og hann er meira að segja í skjaldarmerki Utah-ríkis.

Þangað liggur samt ekki hraðbraut sem rútur geti ekið á 90 kílómetra hraða í upphafslandi bílismans.

Þangað liggur svipaður og álíka langur göngustígur og liggur upp á Esju, svo að ferðafólk geti upplifað staðinn á sem líkast hátt þeirri upplifun, sem fyrstu hvítu landkönnuðirnir fengu að njóta.

Í Esjuhlíðum býðst upplifun hinnar einföldu gönguleiðar og áskorun og hressing fjallgöngunnar í viðbót, sem sífellt fleiri, já, þúsundir fólks sækjast eftir og veitir því mikla lífsfyllingu, sem flokka má undir hagsmuni.

Ekki er að sjá að spurt hafi verið um álit þessa fólks á svonefndri Esjuferju né um álit fólks á þeirri útlitsbreytingu Esjunnar, sem fyrirhuguð mannvirki munu hafa í för með sér.   

Afþakka svifbraut á Esju

Athugasemdir

[Emil Hannes Valgeirsson, 10.8.2016 kl. 09:55]

Ég vona svo sannarlega að ekki verði af þessu. Þetta er fjölfarin gönguleið og lítið varið í að hafa skröltandi kláf fyrir ofan sig þegar gengið er þarna um. En það þarf auðvitað alltaf að eyðileggja allt. Einnig er ég í vafa um hversu mikið vit er í því að stefna fjölda fólks alla leið upp á Esju. Ýmsir munu sjálfsagt fá sér spássitúr ofaná fjallinu, t.d. upp á Hábungu (hæsta hluta fjallsins), bara til þess að villast í þoku sem þarna getur skollið á fyrirvararlítið.

[Einar Bjornsson (IP-tala skráð) 10.8.2016 kl. 11:07]

Að mínu mati er heppilegast að setja kláf sem myndi ganga upp á Skálafell.  Þar er sennilega einn besti útsýnisstaður á suðvesturlandi.  Mætti hæglega nýta þann kláf einnig fyrir skíðafólk á vetrum.  Enda er skíðasvæðið í Skálafelli vannýtt og býður upp á gríðarlega möguleika.