Hið íslenska hugarfar, "að láta á þetta reyna."

Atvikið á brúnni á Vatnsdalsá sl. sumar, sem brotnaði undan 57 tonna þunga eins og sjá má í tengdri frétt er ekki einsdæmi hér á landi. Fyrir tæpum 20 árum reyndi bílstjóri einn á þungum flutningabíl að komast fyrir gamla brú í uppsveitum Árnessýslu á bíl, sem bæði var of breiður og of þungur. 

Hann virti að vettugi skilti við brúna, sem kváðu á um hámarksbreidd og þyngd og af ummerkjum var að sjá, að hann hefði ætlað að reyna að komast yfir með því að fara það hratt að brúin hefði ekki tíma til að láta svo mikið undan að hún brysti. 

Brúin, sem var að svipaðri gerð og brúin yfir Vatnsdalsá, brotnaði að vísu ekki, en bognaði hins vegar svo mikið þegar bíllinn brunaði inn á hana, að hátt burðarvirkið í henni lagðist inn og klemmdi bílinn svo að hann stórskemmdist ekkert síður en brúin sjálf. 

En bílstjórinn hafði það upp úr krafsinu að komast samt yfir með stórskemmdum á bíl og brú með því að láta á það reyna, hvort það væri hægt í staðinn fyrir að eyða um hálftíma með því að aka aðra leið. 

Í tilkynningu rannsóknarnefndar samgönguslysa kemur fram að bílstjórinn hafi ekki verið í bílbelti og kastaðist hann því til og hlaut áverka. 

Og ekki var þetta atvik heldur tilkynnt til vinnueftirlitsins. 

Bar ekki þunga bílsins

Athugasemdir

[Þorsteinn Briem, 23.11.2016 kl. 06:29]

"Ofþungi á vöru­bíl og drátt­ar­vagni hans..."?!

Sem sagt, of þungur vörubíll með dráttarvagn.

[Þorsteinn H. Gunnarsson, 23.11.2016 kl. 07:59]

Hér áður fyrr gat það átt sér stað að vörubíla lentu í útafkeyrslu og veltum, Kom það þá stundum fyrir að þeir skekktust á grind eða hásingin færðis til og bíllinn væri því allur skakkur og skældur og sporvíddin breyttist. Samt var verið að keyra þessa bíla. Það var svo ekki par sniðugt að aka þeim inn á brýr og gátu þeir fest þar og skemmt brýrnar og valdið vandræðum.

Eitt af þeim verkum sem föðurbróðir minn Bergur Arnbjörnsson Bíla-Bergur bifreiðaeftirlitsmaður af Akranesi lagði áherslu á var að góma þessa bíla áður enn þeir skemmdu brýr. Hann trompaðist algerlega þegar hann sá slíka bíla og tók bílstjórana gjörsamlega í nefið. Ég varð einu sinni vitni að slíku, en ég ferðaðist nokkuð með honum við hans störf. Enda lagðist þetta háttalag af með tímanum og annaðhvort var gert við bílana eða þeir afskráðir.

[Valdimar Samúelsson, 23.11.2016 kl. 10:00]

Ég fór á meiraprófsnámskeið hér í gamladaga.Þetta voru skrautleg námskeið og að mínu viti hálfgert vélstjóra námskeið en þetta var árið 1963. Þarna voru mektar menn og mig minnir Bergur hafi komið við sögu en hann var yfirmaður hjá eftirlitinu. Þarna var einn sálfræðingur sem ég sé enn fyrir mér enda sagði hann að bestu bílstjórarnir væru þeir heimsku.

Ég féll á rútuprófinu en má ennþá aka tíu eða meira hjólatrukkum og ótakmarkað hlass en hef aldrei gert það hér á landi þótt ég hafi ekið Petrbilt sem er Kadilak trukkana með 12 cylendra diesel með 14 hjólum og sjálf stýranlegum treiler með 10 hjólum og hlass þrjár 25 metra langar Alaska 49 tommu i.d. olíupípur. 

Já skildi vera hægt að kalla suma menn heimska sem taka 50 til 70 tonn yfir brýr sem eru hannaðar fyrir innansveitar flutninga og svo skilur fólk ekki ennþá hversvegna vegakerfið okkar er alltaf í lamasleysi.

Yfirleitt voru vöð við margar brýr sem hægt var aka yfir með jarðýtur og þessháttar.       

[Hallgrímur Hrafn Gíslason, 23.11.2016 kl. 12:57]

Ég hélt að brúin ætti að þola þrefalt það sem hún er gefin út fyrir. Þrefaldur öryggisstuðull. Etthvað var talað um það í burðarþolsfræðinni í gamladaga. Ef vegagerðin er að klikka á þessum  þrefalda öryggisstuðli þarf að taka á því.

[Valdimar Samúelsson, 23.11.2016 kl. 14:36]

Hallgrímur í upphafi er stuðullin þrefaldur en svo eldast brýr en það hefir engin leifi nema með sérstöku leifi að setja meir álag en það sem þær eða vegakerfið er gefið uppfyrir.

[Þorvaldur Sigurdsson (IP-tala skráð) 23.11.2016 kl. 20:13]

Þessi brú, sem byggð var um 1950, var hönnuð fyrir mannþröng eða 400 kg á fermetra. Það leggur sig á um 20 tonna vagnþunga. Nú fer hún niður þegar búið er að gersamlega ofbjóða henni með því að fara tugi ferða yfir hana með 60 tonna hlass, eða þrefalt reiknað burðarþol, og eiginlega undravert að hún skyldi lafa svona lengi og þó sködduð. 

Vegagerðin klikkaði ekki á þessum þrefalda öryggisstuðli og langt frá því.