Lúlli Karls var líka ótrúlegur.

Það er búið að nefna það hérna á síðunni hve ótrúlegur golfárangur Ólafíu Þórunnar Kristinsdóttur er, og beina útsendingin og myndirnar sem bárust frá keppninni staðfestu það. Skal ítrekuð aðdáun mín á henni og hennar mikla afreki. 

Fyrir tilviljun þótti ýmsum það full ótrúlegt á sama tíma, að í Ferðastiklum í gærkvöldi skyldi vera sagt frá ótrúlegu uppátæki Lúðvíks heitins Karlssonar við glóandi rennandi hraunstraum úr eldgígum við Heklurætur sumarið 1970, hvernig hann hljóp eftir örþunnri sjóðheitri skán á yfirborði hraunstraumsins og stökk af skáninni þegar farið var að rjúka úr sandölununm!

Gleymi aldrei veinunum og skrækjunum í þýsku kellingunum, sem stóðu þarna í hóp og horfðu á þessi ósköp!

En síðan bárust mér í morgun óvænt tvær ljósmyndir sem Leifur Magnússon tók.

Efri myndin er tekin skammt frá vettvangi hraunstraumskánarhlaupsins upp við Heklurætur og sést á myndinni að einhver að vísu lánað Lúlla bol, og hann er kominn með fáránlega kollu á hausinn, en á myndinni sést líka að hann er berfættur í sandölum og í neðri hluta af bikini, og á þessu tvennu, sandölunum og bikininu hljóp hann sitt fáránlega hlaup.

Ég stend við bíl minni, R-7670, sem var Fiat 850, en í baksýnn sést blár Bronkó, væntanlega bíllinn sem Lúlli var á. 

Takið eftir hraunmylsnunni, sem Lúlli stendur á berfættur eins og indverskur fakír.

Nú rifjast upp fyrir mér að mér fannst það ekki síður merkilegt hvernig hann gat sprangað um berfættur á hinni egghvössu hraunmöl.

Hugsanlega voru sandalarnir orðnir ónýtir ef myndin er tekin eftir hlaupið!

Mörg uppátæki og ævintýrir Lúlla voru jafn lygileg og spunasögur þessa óviðjafnanlega sagnameistara sem tókst oft að spinna þannig í frásögnum af eigin ævintýrum að maður trúði að lokum öllu í krafti orða Indriða G. Þorsteinssonar, að góð saga megi ekki líða fyrir sannleikann! 

Á neðri myndinni af bensínddælingu niðri á Helluflugvelli sem Lúlli hjálpaði mér við, er klæðaburður minn lítt skárri en Lúlla, ég er uppáklæddur í dökk sunnudagajakkaspariföt með lakkrísbindi, en í hvítum strigaskóm.  

Flugvélin var sú fyrsta í minni eigu, TF-GIN, sem enn er til, en hana notaði ég til að draga svifflugur á loft á Íslandsmótinu á Hellu 1970 og eru ýmsar sögur til af því. 

   

Ótrúlegt afrek hjá Ólafíu Þórunni

Athugasemdir

[Gudjón Helgason (IP-tala skráð) 5.12.2016 kl. 17:01]

Blessadur Ómar

Undirritadur hefur hlustad á ýkjusögur af Lúlla Karls hjá thér Ómar, bædi hér á Íslandi og erlendis.

Er ekki kominn tími til thess ad gefa út bók med thessum sögum ?

S.b. sögurnar af Óla Kjét rútubílstjóra !

Veit um mann sem skrifadi ritgerd um hann Óla Kjét, sem hann liggur á. Thessi madur heitir Jón Kristján Johnson, thjódfrædingur.

Virdingarfyllst

Gudjón Helgason