Endurupptaka nú, - annars glatast gögn!

Nú er liðinn það langur tími frá því að Guðmundar- og Geirfinnsmálin voru afgreidd á algerlega ófullnægjandi hátt, að mikilvæg vitni, sem verður að tala við, eru orðin það öldruð, að það er annað hvort að fá vitnisburð þeirra nú eða aldrei. 

Fimm slík vitni hafa haft samband við mig í trúnaði, tvö fyrir rúmum áratug, og þrjú eftir að bókin "Hyldýpið" kom út síðastliðið sumar. 

Eitt vitnið er þegar látið, en nýjustu þrjú vitnin eru á lífi. Vitnisburður eins þeirra kann að hafa mikil áhrif á málið. 

En það er sameiginlegt þessum vitnum, að ef þau stíga fram, tengist vitnisburður þeirra öðrum smærri sakamálum frá árunum 1974-1977. 

Mikilvægasta vitnið áræðir ekki að stíga fram vegna þessa og þeirrar óvissu, sem ríkir um meðferð málsins. Öðru máli myndi gegna ef málið yrði tekið upp og nýir rannsakendur hefðu frumkvæði að því að ræða við vitnið, og þá helst með því fororði, að smærri sakamálin yrðu afgreidd með sama hugarfari og gert var í vinnu Sanneiksnefndarinnar í Suður-Afríku á sínum tíma. 

Það, að aldrei var rætt við mikilvægasta vitnið, mun að vísu hugsanlega koma fram síðar að því látnu, ef ekki verður rætt við vitnið nú, og þá mun það verða undrunarefni, af hverju aldrei var rætt við þetta lykilvitni. 

Líklegasta skýringin yrði sú, að framburður þessa vitnis hefði raskað þeirri "rörsýn" sem rannsakendur og ákærendur höfðu og sveigði allt starf þeirra í þá átt að komast að fyrirfram ákveðinni niðurstöðu. 

P.S.  Nú er greint frá því á ruv.is að endurupptökunefnd hafi heimilað endurupptöku máls Tryggva Rúnars Leifssonar. Jafnvel þótt þetta verði eina endurupptakan er þetta risaskref í málnu. 

„Manns saknað í Keflavík“

Athugasemdir

[Valdimar Samúelsson, 24.2.2017 kl. 12:08]

Ómar ég hélt að það væru bara Kaþólskir prestar sem mættu hylma yfir vitorðsmönnum og það í stærsta mál Íslandssögunar.Ég vona samt að þeir tali við þetta fólk sem þú fjallar um í bókinni. Ég get ekki séð að það eigi að gera lítið úr útskurði hæstaréttar þegar þetta fólk viðurkenndi að hafa drepið og brennt líkið.

[Húsari. (IP-tala skráð) 24.2.2017 kl. 14:35]

Sæll Ómar.

Vitni í þessum málum eiga það við samvisku sína
ef þau greina ekki frá hugsanlegri vitneskju og
því verður vitanlega aldrei vísað til framtíðar
heldur til síns heima.

Réttarkerfið býr yfir margs konar ráðum
vitni til verndar ef þvi er að skipta og því er
vandséð ef einhver sem byggi yfir upplýsingum
kynni að kjósa að þegja frekar en að njóta og neyta
þeirra úrræða sem eru þó fyrir hendi.

[Þorsteinn Briem, 24.2.2017 kl. 14:43]

"... og þá helst með því fororði, að smærri sakamálin yrðu afgreidd með sama hugarfari og gert var í vinnu Sannleiksnefndarinnar í Suður-Afríku á sínum tíma."

"IX. kafli. Fyrning sakar, brottfall viðurlaga og uppreist æru."

Almenn hegningarlög nr. 19/1940

[Ómar Ragnarsson, 24.2.2017 kl. 17:59]

Takk, Steini.  Húsari góður, því miður veit ég um málavöstu hjá mikilvægasta vitninu og skil aðstöðu og afstöðu vitnisins, sem hefur hingað til byggst á óvissunni um það á hvaða hátt réttvísin nálgist málið. 

[Húsari. (IP-tala skráð) 24.2.2017 kl. 20:07]

Sæll Ómar.

Vitnið treystir þér að best verður séð og
því held ég að menn ættu að líta til þeirra fjölmörgu
afbrigða sem eru fyrir hendi til þess að yfirheyrsla
geti farið fram og vætti vitnis prófað og treyst.

[B.N. (IP-tala skráð) 25.2.2017 kl. 00:23]

Ég átti heima stutt frá Dráttabraut Keflavíkur nánar tiltekið á Berginu. Eitt skiptið þegar ég var peyi ætlaði ég að ganga í gegnum Dráttarbrautina í Keflavík eins og oft áður var mér vísað frá af lögreglumanni með þeim orðum að ég mætti ekki fara þarna í gegn. Ég sá að það var mikið um að vera brúða eftirlíking af manni sem lá við trésmíðahúsið í slippnum man ég vel eftir og við hliðina á brúðunni var númerað spjald en þessi spjöld voru fleiri hér og þar um slippinn hvert með sitt númer. Ég man vel að Erla Bolladóttir var þarna í þessari vettvangsrannsókn og líklega allir þeir sem voru flæktir í málið á þessum tímapunkti líka mig minnir að ég hafi séð Sævar bregða fyrir.  Það er sennilega hægt að finna gögn um þennan atburð í skjölum um rannsókn Geirfinnsmálsins og þá í leiðinni hvenær þetta gerðist nákvæmlega en ég man ekki hvaða ár þetta var.

Baldvin Nielsen

[B.N. (IP-tala skráð) 25.2.2017 kl. 00:50]

Fann þetta í ákærunni 23.janúar 1977 hefur þá þetta líklega verið ég þá 13 ára peyi vá 40 ár síðan að ég fékk ekki að fara um Dráttabrautina sjá hér neðar úrdrátt sem ég fann í ákærunni. Kv. Baldvin Nielsen

,,A.10. Rannsóknarlögreglan aflaði smám saman ýmissa rannsóknargagna, sem vikið er að í

héraðsdómi, og hinn 23. janúar 1977 setti hún á svið atburðina í Dráttarbrautinni í Keflavík.''

 

[villigunnarsson (IP-tala skráð) 25.2.2017 kl. 01:05]

Æi, Ómar hættu þessu kjaftæði. Öll minniháttar brot síðan 1977 eru löngu fyrnd.

[Húsari. (IP-tala skráð) 25.2.2017 kl. 14:17]

Sæll Ómar.

Í texta mínum hér að framan nota ég orðið 'vitni'.

Þessi orðanotkun er alröng eins og flestir hljóta að sjá´.

Biðst velvirðingar á þessum mistökum mínum.