Heppilegur staður, sem leysir vanda.

Jón Grétar Sigurðsson hefur um árabil staðið sig vel í því að byggja upp aðstöðu fyrir ferðaþjónustu sunnan við Þjóðveg eitt þar sem hann liggur sunnan við Skaftafell. 

Nú er þessi dugnaður hans og þar á undan dugnaður hjónanna Önnu Ragnarsdóttur og Jóns Benediktssonar við uppbyggingu í Freysnesi að skila sér. 

Þarna er ákjósanlegt flugvallarstæði og þannig í sveit sett, að flug til og frá flugbrautunum þarf ekki að vera umtalsverð truflun fyrir ferðafólk í þjóðgarðinum, því að helstu náttúruperlur þess eru allar norðan við þjóðveginn. 

Umferð um veginn með sínum umferðarhávaða er álíka mikil truflun og flugumferðin, sem er heldur fjær en landumferðin. 

Yfirleitt er þjóðgörðum skipt í mismunandi svæði eftir því hve mikil röskun er af mannavöldum innan þeirra. 

Flokkunin felur í sér fimm flokka, og mannvirkin neðan brekku í Skaftafelli, í Freysnesi og við hringveginn og flugvöllinn falla inn í þann flokk, sem er með þolanlega röskun, af því að hún er að öllu leyti afturkræf. 

Og með því að byggja þarna upp er verið að létta af vaxandi ágangi upp við Skaftafellsbrekkurnar, þar sem þjóðgarðsmiðstöðin er. 

Síðar meir væri alveg mögulegt að færa þjóðveginn og flugvöllinn sunnar, ef menn vildu minnka hávaða frá umferð á landi og í lofti og færa umsvifin vegna vaxandi ferðamannastraums enn fjær brekkunni. 

Flugstöð rís í Skaftafelli

Athugasemdir

[Hábeinn (IP-tala skráð) 17.6.2017 kl. 18:17]

Þarf ekki að fara fram umhverfismat, umræða og söfnun umsagna? Athuga hvort varp raskist eða friðaðar plöntur fari undir malbik? Eins gætu verið einhverjir einstakir steinar þarna eða einstakar sandmyndanir. Eða er í lagi að rústa náttúruverðmætum ef það á að gera flugvöll? Á að endurtaka rauðhólaraskið? Nú vantar náttúruverndarsamtök og fólk sem ekki er hlutlægt sem getur barist fyrir því að vandlega sé rannsakað áður en farið er í framkvæmdir. Það er víst ekki hér að finna.

[Rafn Haraldur Sigurðsson (IP-tala skráð) 17.6.2017 kl. 21:35]

Ég hef heyrt það frá ólygnum að álfarnir í Gálgahrauni hafi flutt sig til í stein við flugvallarstæðið sem stendur til að leggja þarna í sveitinni. Þeir eru alls ekki ánægðir við fréttirnar og haft er eftir aðalálfinum honum Ómuri að ef að lagningu brautarinnar verður þá muni það hafa óafturkræf áhrif á búsetu álfa á Íslandi.

[Ómar Ragnarsson, 18.6.2017 kl. 10:55]

Það á nú reyndar ekki að "gera flugvöll" þarna eins og Hábeinn fullyrðir.

Hann virðist aldrei hafa ekið hringveginn sem liggur meðfram flugvallarstæðinu, sem hefur verið þarna í marga áratugi með þessum tveimur flugbrautum án þess að Hábeinn eða aðrir hafi haft nokkuð við það að athuga.

Né heldur haft neitt að athuga við það að hringvegurinn var lagður um þennan stað. 

Það stendur aðeins til að malbika flugbrautirnar á sama hátt og hringvegurinn var malbikaður á sínum tíma án þess að Hábeinn risi þá upp á afturlappirnar. 

Flugbrautirnar og hringvegurinn hafa verið á þessu sandflæmi í 40 ár og ekki hefur verið stingandi strá á flugbrautunum. 

Malbikun hringvegarins á sínum tíma var afturkræf framkvæmd. Það er hægt að fjarlægja malbikið ef Hábeinn er að fara á límingunum út af þessu slitlagi og einnig hægt að fjarlægja malbikið af flugbrautunum ef þær eru taldar vera allt annars eðlis en þjóðvegur, bara af því að flugvélar nota þær.. 

[Ómar Ragnarsson, 19.6.2017 kl. 00:48]

Því má bæta við að þjóðvegurinn, sem liggur í boga við flugvöllinn, svo að hann lendir inni í stórri beygju á veginum, er upphleyptur og var ekið í hann þúsundum tonna af möl. 

Flugvöllurinn er hins vegar náttúrugerður og ekkert slíkt vafr gert þar, heldur settar mekringar meðfram flugbrautunum, sem auðvelt er að fjarlægja á einum degi.

Ef fjarlægja ætti öll mannvirki, sem komin eru á þessu svæði, og taka þau fyrst sem mestu raski hafa valdið, yrði að byrja á upphleyptum vegum, brúm, stóru hóteli í Freysnesi, bensínstöð og sjoppu og stóra þjóðgarðsmiðstöð undir Skaftafellsbrekku.

Það yrði fyrst að brjóta niður byggingarnar og brýrnar, rífa veginn niður og flyja efnið úr honum brott, en síðast að fjarlægja merkingarnar á flugvellinum, sem eru það eina sem teljast mega aðskotahlutir.

Það er dapurlegt að þurfa að svara Hábeini til þess að bera af sér sakir vegna stórfelldra náttúruspjalla við Skaftafell.

En ef ekki er svarað, kunna lesendur að halda að hann þekki þetta svæði manna best.