Furðulega fjölbreytt veður á hjólaferðalagi í gær.

Á hringferð um Vestfirði, leiðinni frá Hólmavík til Ísafjarðar og síðar í suður frá Ísafirði í gær var veðrið aldeilis furðulega misjafnt. 

Kannski verður maður meira var við þetta á vélhjóli en á bíl, en í Ísafjarðardjúpi voru margar tegundir af veðri og blés úr tveimur ólíkum áttum, annars vegar á sunnan en hins vegar lagði hafgolu inn firðina. 

Og ýmist rigndi eða að sólin skein í heiði. 

Svona hélt þetta áfram alla leiðina, bjart á Ísafirði, rigning í Önundarfirði, þurrt í Dýrafirði en þokusuddi Arnarfjarðarmegin á leiðinni yfir Hrafnseyrarheiði.

Það var rigning og blindþoka á Dynjandisheiði, en stafalogn, sléttur sjór og flugur í loftinu í Vatnsfirði. 

Á Hjallahálsi var síðan slydduhraglandi sem kom úr suðvestri en frá Gilsfirði var þveröfug vindátt, norðaustan. 

Ennþá virðist þetta sumar ekki ætla að verða mjög ferðamannavænt. Gæti það bæst ofan á hækkun krónunnar sem vandi fyrir ferðaþjónustuna. 

 

Þrumuveður og haglél í dag

Athugasemdir

[Þorsteinn Briem, 14.7.2017 kl. 10:20]

Erlendir ferðamenn á Íslandi skæla sig nú yfirleitt ekki í svefn eins og Mörlendingar vegna fjölbreytts veðurfars.

Hér í Minsk, höfuðborg Hvíta-Rússlands, rigndi svo mikið á nokkrum mínútum síðdegis í gær að gatan sem ég bý við breyttist í fljót og stúlka dansaði þar berfætt í rigningunni.

En klukkutíma síðar var gatan aftur orðin þurr.

Í mikilli rigningu er tíminn hér í flestum tilfellum notaður vel til þvotta og uppáferða en ekki til að skæla úr sér augun.