Margar misþekktar samverkandi ástæður?

Oftast eru það margar samverkandi og þekktar ástæður, sem valda slysum. 

Ef ein ástæðan er tekin út og ekki til staðar gerist oft tvennt:

1. Það verður ekkert slys. 2. Slysið verður miklu stærra en ella. 

Nokkur atriði hafa þegar verið nefnd varðandi stórslysið í gær. 

1.  Bílaleigubíll stansar á veginum til þess að beygja yfir þvert yfir hann og komast að merktum útsýnisstað. 

2.  Um allt sunnanvert landið er lúmsk hálka, vegna þess að í röku lofti í nokkurra stiga frosti myndast oft hálkuglæra, sem ökumenn sjá ekki. 

3. Viðkomandi vegarkafli er ekki í flokki sama vegar 50 kílómetrum vestar varðandi hálkuvarnir af hálfu Vegagerðarinnar. Það eru ekki til peningar í það. Svona svipað og var í í óhappi á Biskupstungnavegi á dögunum. 

4. Ökumanni rútu mistekst að komast framhjá kyrrstæða bílnum, ekur á hann og rútan rennur út af veginum og veltur. 

5. Nokkrir af farþegunum kastast út úr rútunni og verða jafnvel undir henni. Ályktun: slíkt gerist yfirleitt ekki ef fólk er í bílbeltum. Spurning: Voru ekki belti í rútunni? Er það ekki skylt?

6. Ef það voru belti í rútunni, slösuðust einhverjir, sem voru í bílbeltum inni í rútunni við það að aðrir farþegar, sem ekki voru í beltum, köstuðust á þá? Ef það voru belti, af hverju voru ekki allir í þeim?  Það verða nefnilega allir að vera í beltum til þess að þau virki fullkomlega á heildina litið. 

7. Hvernig var ástand hjólbarðanna undir bílunum tveimur?

Atriði númer 5, 6 og 7 eru næsta dæmigerð fyrir íslensk umferðarslys að því leyti, að þeim er yfirleitt sleppt í upplýsingagjöf um slysin. Af hverju? 

Atriði númer 1 til 4 eru þess eðlis að ef eitt þeirra var ekki til staðar hefði ekki orðið neinn árekstur og ekkert slys. 

Í dag, daginn eftir slysið, er mest gert úr því að bilaleigubíllinn skyldi hafa verið stöðvaður, það sé hættulegur ósiður erlendra ferðamanna. 

Ályktun: Engir erlendir ferðamenn, engin slys. Það er heila málið. Finndu útlendinginn í málinu. 

Bíðum nú við, fólkið í bílnum ætlaði að komast út á merktan útsýnisstað og þetta var eina leiðin. Hvað var athugavert við það?  Til hvers eru merktir útsýnisstaðir? Eða var hann kannski ekki nógu vel merktur fyrr en komið var að honum? 

Eða þurfti ökumaðurinn að aka yfir heila óbrotna línu til að komast að honum? 

Ef svo var, af hverju var þannig um hnúta búið? Ef þetta var svona, hvernig átti erlendi ferðamaðurinn að vita fyrirfram um það að útsýnisstaður væri merktur, en ekki hægt að komast að honum á löglegan hátt nema aka framhjá honum, snúa við á löglegan hátt og koma til baka? 

Vissi íslenski rútubílstjórinn ekki um það í tæka tíð að þarna væri merktur útsýnisstaður og að þess vegna væri hætta á því að fólkið í bílnum á undan kynni að vilja komast þangað? Eiga bara útlendingar að vita slíkt?

Já spurningarnar hrannast upp af því að það vantar enn svo mörg atriði í upptalningu á orsökum slyssins og það er svo einfalt að leita að erlendum blóraböggli. 

Í frétt í gær var greint frá því að erlendir ferðamenn skiluðu 535 milljörðum inn í þjóðarbúið á ári. 

Samt eru ekki fyrir hendi núllkommannúlleitthvað prósent af þessari upphæð til þess að við höfum okkar margnefnda "innviði" í lagi. Í fréttinni var kvartað yfir því að hver einstakur ferðamaður skilaði minna fé í kassann hjá okkur en árið áður. "Enginn er búmaður nema að barma sér" og þarna má sjá hugsanlega hluta af ástæðu þess hve litlu er varið í innviðauppbygginguna.  

Helsti umferðaröryggissérfræðingur okkar segir að hvað öryggi á íslenskum þjóðvegum snerti, sé ástandið hjá okkur eitt það versta í Evrópu, jafnvel verra en hjá fátækustu þjóðum álfunnar á Balkanskaga. 

Það er nefnilega það. 

 

Skyndiákvarðanir ökumanna skapa hættu

Athugasemdir

[GunniS, 28.12.2017 kl. 10:14]

ég hef tekið eftir innanbækjar í Reykjavík að ökumenn sem eru á stórum bílum, keyra þannig að þeir eru alveg ofan í rassgatinu á bíl fyrir framan, og þeir eiga að vita að svona stór bíll stoppar ekkert á punktinum ef eitthvað gerist. 

[Valdimar Samúelsson, 28.12.2017 kl. 10:20]

Ómar einfaldaðu þetta.

Það stansaði bíll á veginum þar sem umferð er í báðar áttir á 80 plús KM hraða.. 

[Birgir Guðjónsson (IP-tala skráð) 28.12.2017 kl. 12:24]

Ökumenn VERÐA að hafa meira bil milli bíla en gert er í dag, á það bæði við í þéttbýli sem og á vegum úti.

Maður þarf hvað eftir annað að hægja á sér þegar einhver stingur sér á milli bíla til að vera 10 m fljótari að næsta rauða ljósi.

[Ómar Ragnarsson, 28.12.2017 kl. 14:42]

Engar upplýsingar hafa birst um hraða bílanna, og heilmikið vantar varðandi merkingar og fleira, sem gætu hafa skipt máli. 

Þess vegna hrannast spurningarnar upp. Vonandi verður með rannsókn á þessu slysi hreinsað betur upp það sem máli skiptir en var í stóra slysinu á brúnni yfir Hólsselskíl fyrir um tuttugu árum. 

Þar var skautað framhjá einu af lykilatriðunum, varðandi orsakir slyssins, blekkjandi útlit vanræktrar brúar, og í staðinn var ökumaður rútunnar talinn bera alla ábyrgð á því, sviptur ökuréttindum og skellt á hann fangelssdómi ef ég man rétt.