Stinningskaldi skapar sandmistur.

Á leið eftir hjólastígum og gangstígum í dag frá Kringlunni austur í Spöng í Grafarvogshverfi varð maður óþyrmilega var við það, að svo mikið ryk af götum borgarinnar hefur sest um alla borg, að þegar það komu vindhviður, uppgefnar um 15 m/sek samkvæmt vedur.is, feyktu þær upp rykinu af gatnakerfinu án þess að helsti valdur ryksins aðra daga, stórir bílar sem þyrla því upp, kæmu við sögu. 

Á nokkrum stöðum stóð rykstrókurinn inn í andlitið og sandur settist í augun. 

Myndin sem fylgir tengdri frétt á mbl.is sýnir einmitt hvernig aðeins einn stór bíll getur búið til fyrirbæri, sem lítur tilsýndar út eins og sandstormur. 

En það getur líka vindur sem er þó ekki meira en um 15 metrar á sekúndu í hviðum. 

Tðlurnar sem birtar eru í fréttinni eru sláandi, 366 grömm (afsakið, míkrógrömm, sjá athugasemd) á hálftíma, en heilsuverndarmörkin eru 50 yfir heilan sólarhring. 

Ekki amalegt fyrir borg sem er búin að fá Umhverfisverðlaun Norðurlanda. 

 

Svifryk yfir heilsuverndarmörkum

Athugasemdir

[Þjóðólfur í Ómynd (IP-tala skráð) 16.4.2018 kl. 21:19]

Í Framsókn var stillt friðar,

fjandskapnun ýtt til hliðar,

en samt bar'að hálfu,

því Simmi tók sjálfu,

er þau sólin settust á Viðar...

http://www.visir.is/g/2018180419104/sa-sem-atti-ad-bjarga-imynd-sigmundar-eftir-panamaskjolin-faer-enga-peninga 

[Þorvaldur Sigurðsson (IP-tala skráð) 16.4.2018 kl. 21:27]

Ég efast nú um, og má þó hafa rangt fyrir mér, að við værum mikið á ferð í sandveðri þar sem sandmagnið í hverjum rúmmetra lofts væri 366 grömm. 

[Ómar Ragnarsson, 16.4.2018 kl. 21:33]

Þetta eru 366 míkrógrömm. 

[Þorvaldur Sigurðsson (IP-tala skráð) 16.4.2018 kl. 21:57]

Nú lét ég duga að lesa bloggpistilinn. Þar kom þessi tala, 366 grömm, fram.

[Halldór Egill Guðnason, 17.4.2018 kl. 00:22]

 Ef borgaryfirvöld hefðu haft manndóm og dug í sér undanfarin ár og þrifið götur reglulega eins og gert er í flestöllum siðmenntuðum borgum væri ástandið ekki svona slæmt. Rykið sem verið er að þyrla upp núna er jafnvel margra ára gamalt. Í dag (gær) fannst svo sannarlega fyrir þessu bæði í augum og munni. Meðan sóðar stjórna lagast ekkert.

 Góðar stundir, með kveðju að sunnan.

[Ómar Ragnarsson, 17.4.2018 kl. 00:53]

Raunar hefur þessi slóðaskapur í hreinsun viðgengist í borginni um áraraðir. 

En á árum áður þegar göturnar voru malargötur voru þær stundum vökvaðar. En ekki minnist ég þess að svifryksmælingar hafi komið til fyrr en löngu síðar. 

Og á meðan enginn hitamælir er til að mæla sjúklinginn, verða engin gögn til um það hvort hann sé með of háan hita.