Loftmengun í 20 daga á ári yfir heilsuverndarmörkum.

Á ársfundi Umhverfisstofnunar sl. föstudag birtust í nokkur augnablik á tjaldi nokkrar tölur varðandi loftgæði hér á landi. 

Þar mátti sjá að í 20 daga á ári geti loftmengun farið yfir heilsuverndarmörk á höfuðborgarsvæðinu. 

Þessi tala segir þó hvergi nærri alla söguna, því að þeir dagar eru margfalt fleiri þegar loftið er mengað án þess að verða heilsuspillandi. 

Það er einkum svifryk sem veldur þessari mengun, en brennisteinsvetni í lofti er þó viðvarandi um það bil hálft árið, og þrátt fyrir virðingarverða viðleitni Orku náttúrunnar til að draga úr henni með stórmerkri aðferð við niðurdælingu, er orkuvinnslan á Hellisheiði og Hengilssvæðinu ekki sjálfbær, heldur rányrkja vegna græðgi þeirra, sem ákváðu stærð Hellisheiðarvirkjunar í upphafi og kórónuðu ábyrgðarleysi sitt með því að semja um orkusölu allt of langt fram í tímann. 

Til að stöðva orkufallið hefur verið boruð mjög aflmikil hola við Hverahlíð, en brennisteinsvetnið frá henni mun flæða óhindrað yfir til höfuðborgarsvæðisins í ríkjandi vindáttum á því svæði, því að ekki verður hægt að koma við niðurdælingu á brennisteinsvetninu frá Hverahlíð. 

Það kann í ljósi raunveruleikans að sýnast brandari að auglýsa Reykjavík sem þá borg heimsins þar sem sé hreinast loft og hafi auk þess fengið umhverfisverðlaun Norðurlandaráðs, en í raun er þetta ekki aðeins grátbroslegt, heldur hryggilegt.  

90% mannkyns andar sér menguðu lofti

Athugasemdir

[Valdimar Samúelsson, 6.5.2018 kl. 19:09]

Ómar góð grein og það hefir alveg gleymst að tala um alla mengunina uppi á Hellisheiði.Ég var búinn að skrifa nokkrum sinnum um þetta og ekki má gleyma vatns mengunin þar sem ýmsir m

almar fara út í vatnið. Heimssíða þeirra sýnir það allt.  Talandi samt um ríkið þá er skrítið hve bílar í t.d. Bandaríkjum verða minna rykugir heldur en hér hjá okkur.  

[Ómar Ragnarsson, 6.5.2018 kl. 22:40]

Þetta á líka við bíla víðast í Evrópu eins og í Bandaríkjunum samkvæmt því sem vinir mínir þar segja.