7.5.2018 | 11:16
"Skrifaðu flugvöll."
Sagan af bankamanni í Reykjavík sem fór í framboð í Dalasýslu fyrir Alþýðuflokkinn hér í gamla daga er löngu orðin sígild.
Í þessum landshluta, frá Dölum yfir í Húnavatnssýslu, var landbúnaður aðal atvinnugreinin, og var fylgi krata afar lítið, - má sem dæmi nefna, að í Vestur-Húnavatnssýslu fékk flokkurinn aðeins eitt atkvæði í nokkrum kosningum í röð, og þrátt fyrir ákvæði um leynilegar kosningar, þóttu yfirgnæfandi likur á því að frambjóðandinn, presturinn í Hindisvík, væri sá eini sem kysi frambjóðanda krata.
Róðurinn var því þungur fyrir Adolf Björnsson í Dölunum, þangað til hann fékk mann með sér á fundina til þess að skrifa niður helstu ummæli og málefni, sem brunnu á fólki.
Þegar einn fundarmanna sagði að meðal þess sem vantaði í héraðinu væri flugvöllur, henti Adolf það á lofti og sagði myndulega við aðstoðarmann sinn: "Skrifaðu flugvöll!"
Þetta vakti kátínu fundargesta, sem vissu að miklu brýnni úrlausnarefni voru í Dölum en flugvöllur.
Húsnæðismálin eru aðal málefni komandi borgarstjórnarkosninga, en það vekur samt ákveðinn aulahroll þegar framboð, sem hafa enn sáralítið fylgi, yfirbjóða aðra með loforðum upp á 10 þúsund nýjar íbúðir á ári.
"Skrifaðu 10 þúsund íbúðir!" minnir dálítið á "skrifaðu flugvöll!" hér um árið.
Eru einfaldlega að ljúga | |
Tilkynna um óviðeigandi tengingu við frétt |
Bæta við athugasemd [Innskráning]
Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.