Talsvert er um að misfarið sé með stæði hreyfihamlaðra.

Fyrir nokkrum árum var fjallað um það í allmörgum pistlum hér á síðunni hvernig stundum væri misfarið með stæði fyrir hreyfihamlaða. 

1. Fullfrískt fólk leggur í stæðin og afsakar sig með því að það "ætli að skreppa stunda stund inn." En hvernig á hinn hreyfihamlaði, sem kemur að uppteknu stæðinu að vita um það?

2. Fullfrískt fólk leggur í stæði fyrir hreyfihamlað ef annað stæði við hliðina er laust. En hvernig getur sá sem þetta gerir verið viss um hve lengi stæðið við hliðina verði autt? Afsökunin hefur hjá sumum verið sú, að stæðin séu of mörg, til dæmis við bankaútibú Lb í Hamraborg. Þegar því er bent á að nær sambyggt sé hús með fjölmörgum öldruðum, og einnig apótek og þjónusta þarna, sem veldur því að miklu fleiri hreyfihamlaðir eru þarna á ferð en annars staðar, segjast hinir ganglötu ekki hafa vitað um það. Svona eins og að þeir sem ákváðu að hafa stæðin fleiri en eitt hafi ekki vitað hvað þeir voru að gera. 

3. Verst er þegar fullfrískir aðstandendur hins hreyfihamlaða leggja bílnum í sérmerkt stæði þótt enginn hreyfihamlaður sé í bílnum, jafnvel fyrir utan Tryggingarstofnunina! Engir ættu að vita það betur en hinir nánustu hve mikils virði þessi stæði eru fyrir raunverulega hreyfihamlað fólk. Ég hef orðið vitni að því að sumir bílar með merkinu í glugganum eru sárasjaldan með hinn hreyfihamlaða um borð. Og jafnvel að merkið sé flutt á milli bíla, af því að verið sé að reka erindi hins hreyfihamlaða, sem er heima hjá sér, -eEinhver lélegasta og eigingjarnasta afsökun sem hugsast getur.  

4. "Stæði fyrir fatlaða" er ónákvæmt orð og einnig eru brögð að því að fólk herji út merki í glugga bíls síns út á sjúkdóm, sem hefur enga hreyfihömlun í för með sér. 

4. 

Nýja merkið sýnir manneskju í virkni

Athugasemdir

[Húsari. (IP-tala skráð) 11.7.2018 kl. 06:59]

Hvort sem litið er á upprunalega merkingu eða yfirfærða þá 
stenst þessi fyrirsögn ekki.

Nei, Matthías er ekki búinn að ráða mig en það er stutt í það!

[Aztec, 11.7.2018 kl. 18:21]

Þetta er alveg rétt hjá þér, Ómar. Svona tilfelli eru mjög tíð. Það heyrir næstum til undantekninga að það sjáist hreyfihamlaður einstaklingur leggja í stæði fyrir fatlaða.

Í dag í Kringlunni voru miðaldra hjón sem lögðu í stæði fyrir fatlaða. Áður en þau stigu út, dró maðurinn skírteini úr pússi sínu og setti það í framrúðuna, sem gaf til kynna að það var einungis notað til að leggja í þannig stæði. Hin mjög ófötluðu hjón stigu svo út og gengu rösklega að dyrunum. Engin líkamleg fötlun eða neitt.

Vandamálið með þessi skírteini er að þau ganga kaupum og sölum og þau er einnig auðveld að falsa. Ekki stendur nafn hins fatlaða á framhliðinni (bakhliðin er ekki sýnileg), því síður mynd (etv. skiljanlegt), en bílnúmerið stendur heldur ekki, svo að enginn veit hvort eigandi bílsins sé réttmætur handhafi skírteinisins. Þetta mætti sýslumaðurinn á höfuðborgarsvæðinu taka til athugunar og breyta reglum fyrst misferli eru svona algeng.

Af slæmri reynslu af íslenzka skrifræðinu í svona upplögðum málum, þá á ég ekki von á að neitt verði gert fyrr en liðin verða 3 þúsund ár.

[Frímannn (IP-tala skráð) 18.7.2018 kl. 19:25]

P-merkið á að fylgja fatlaða einstaklinginum en ekki bílnum. 

Merkið má færa á milli bíla en handhafi merkisins einn má nota merkið.