Ótrúleg tilviljun eða klaufaskapur?

Það eitt að einhver sé staddur nálægt vettvangi morðtilraunar eða morðs sannar svo sem ekkert endanlega að viðkomandi sé hinn seki. 

En það verður hins vegar að teljast ótrúleg tilviljun ef satt er, að af tveimur, sem grunaðir eru um að hafa saman staðið að tilræði í Bretlandi, skuli annar vera háttsettur foringi í rússnesku leyniþjónustunni og hafa farið að eigin sögn sem ferðamaður að skoða einmitt þessa borg og einmitt þessa daga í stuttri ferð þegar sá atburður átti sér stað að fyrrum "svikara" við leyniþjónustuna voru brugguð banaráð. 

Jafnvel þótt gögn sanni ekki sekt hans, er málið afar vandræðalegt fyrir Pútín sem nánast einvald í Rússlandi og fyrrum yfirmann hjá rússnesku leyniþjónustunni, ekki síst með tilliti til fyrri ummæla hans um "svikara" við málstað leyniþjónustunnar og Rússland og með tilliti til fjölda morða á rússnesku andófsfólki. 

Gegnir raunar furðu, ef satt er, að Skripalmálið skuli vera svona vaxið, því að maður hefði haldið að það hefði átt að vera betur dulbúið hverjir meintir tilræðismenn væru. 

Tvennt blasir þó við, hvernig sem málum er háttað:  Atvikið hefur fælingarmátt gagnvart hugsanlegum "svikurum" og andófsmönnum gagnvart Pútín og ef aftur verður látið til skarar skríða, verður betur um hnúta búið eins og raunin hefur reynst í fyrri morðum á andólfsfólki í Rússlandi, svo sem Önnu Politkovskaju. 

Tilræðismaðurinn rússneskur foringi

Athugasemdir

[Gunnar Th. Gunnarsson, 27.9.2018 kl. 13:02]

Tek undir þetta, Ómar. Mér fannst í upphafi afar ósennilegt að Rússar væru svo vitlausir að gera þetta, vitandi að þeir væru fyrstir á grunlistanum. Annað hefur komið á daginn.