Hann fattar þetta ekki ennþá?

Mosatætarinn á Dusterjepplningnum virðist ekki fatta ennþá um hvað mál hans snýst. Biðst afsökunar á því að brot hans hafi falið sér spjöll á viðkvæmum mosa, því sem hann kallar jarðveg. 

Það bendir til þess að hann telji, að þetta hefði verið í lagi ef hann hefði spólað í sandi utan vega. Rétt eins og gaurinn gerði í Krepputungu hér um árið og lýst var í pistli á undan þessum. 

Hann svarar ekki spurningu blaðamanns um það hvort hann hafi ekki vitað, að akstur utan merktra slóða og vega er ekki leyfilegur á Íslandi. 

Hann skilur ekki ástæðuna fyrir þessu banni, bæði hér á landi og til dæmis í eina jeppaþjóðgarðinum í Bandaríkjunum. 

Ef hverjum einasta ferðamanni á jeppa, en þeir skipta tugþúsundum árlega, er gefið veiðileyfi á að tæta og trylla hvar sem er og hvenær sem er utan vega, er boðið upp á stórfellda árás, ekki bara á íslenska náttúru, heldur á upplifun þeirra 80-90 prósent ferðamannanna sem vilja kynnast henni ósnortinni í tign friðar og kyrrðar, þá er það óverjandi með öllu. 

Hvers vegna eru meira en 20.000 kílómetrar af merktum jeppaslóðum hér á landi ekki nóg fyrir hann, fyrst Bandaríkjamenn sætta sig við meira en 1600 kílómetra á sambærilegum slóðum? 

 

Mosatætarinn biðst afsökunar

Athugasemdir

[Haukur Kristinsson (IP-tala skráð) 11.11.2018 kl. 00:37]

Því ætti útlendingur að fatta þetta? Jú, hann biðst afsökunar fyrir sig og hans teymi. Biðst innherjaþjófurinn Bjarni Ben afsökunar eða hans teymi? Sem er búinn að spæna upp "mosa siðsemis og réttlætis" í viðkvæmum gróðri landsins. Hefur hann fattað þetta eða hækjan hún Kata?

[Már Elíson, 11.11.2018 kl. 01:22]

Og hvað bætir þessi auma afsökun ? - Hver ber í raun ábyrgðina á þessu níðingsverki gagnvart landinu ? - Þarf ekki að gera einhverja ábyrga t.d. EF leigusali hefur ekki gert þessum aulum grein fyrir því með bækling t.d. hvar megi keyra og hvar ekki, að hann beri ábyrgðina í enda dags ? - Er ekki rétt að hafa háar og öruggar tryggingar fyrir útleigu jeppa eða fjallabíla sem hafa hug á ferðum um hálendi landsins? - Eða jafnvel lögleiða "dash-cam" eða eins konar ökurita í þessa bíla þannig að hægt sé að skoða myndir að loknum leigutíma og ÁÐUR en leigutaki fer úr landi. - Við erum ennþá með tvo þumla á vettlingunum og í sauðskinnskónum í þessum málum.