Aðgát skal höfð...

P.S. í upphafi pistils. Í ellefu ára sögu þessarar bloggsíðu hefur það aldrei gerst fyrr, að á einum degi hafi málefni, sem tekið er fyrir í bloggpisti, tekið svo stórkostlegum breytingum til hins verra, að efni bloggpistilins er í raun orðið úrelt. Það er kannski dæmi um það hve þetta mál hefur komið landsmönnum í svo opna skjöldu, að fólk á varla til orð.  

Af þessum sökum verður að skoða kveðskapinn hér með tilliti til þess sem lá fyrir snemma í morgun og herma hann upp á almennari og illskárri hegðun en nú hefur verið upplýst að var á ferð á barnum Klaustri. 

Þetta eru almenn aðvörunarorð á tímum snjallsímanna.  

 

 HUGSANLEG LEIÐBEINING ÞINGFORSETA TIL HVERS ÞINGMANNS. 

 

Þú ekkert skalt segja ef ertu á börum, 

orðinu ei halla, jafnvel á förum. 

Ógát þú varist við aðstæður hálar, 

orðin, þau draga menn einatt á tálar.  

Aðgát skal höfð í nærveru skálar. 

 

Mundu að hugsa aldrei upphátt, 

og engum að svara né gera neitt uppskátt. 

Úr meinlausu fjasi magnast þrasið. 

Haltu þig vel frá hassi´eða grasi

að haltu kjafti frá fyrsta glasi. 

 

Á börunum eiga menn bara að sulla

en blaðra´ekki´á´meðan og vera að bulla. 

 

Taktu þig á ef þú ert á þingi

svo þingið ekki í breytingum springi 

og verði með þig sem smáttvirtan þingmann

með hæstvirtan ráðherra og háttvirtan þingmann

sem lægstvirtan ráðherra´og lágtvirtan þingmann.  

„Maður bara varð sér til skammar“

Athugasemdir

[Jón Garðar (IP-tala skráð) 29.11.2018 kl. 11:40]

Já Gunnar Bragi getur reynt að draga allt til baka eftirá, en eftir stendur (og það vissu reyndar margir fyrir) að Árni Þór var notaður sem drullusokkur fyrir Geir Haarde - jafnvel hræsnaranum Helgu Völu Helgadóttur datt ekkert skárra í hug sem prýddi Árna en að benda á að hann væri góður í rússnesku, það nýtist auðvitað vel í Finnlandi.

[Borgari (IP-tala skráð) 29.11.2018 kl. 12:29]

Ég skil þetta ekki með Árna Þór var VG tilbúin að gera hvað sem er til að losna við hann úr pólitíkinni á Íslandi?

[Þorsteinn Siglaugsson, 29.11.2018 kl. 13:04]

Það er eins og málglað kerlingin sagði: Orð eru til alls vís.

[Ragna Birgisdóttir, 29.11.2018 kl. 13:46]

Öll þau ummæli sem þarna eru viðhöfð um konur,karla,samkynhneigða,fatlaða bera vott um algjöra siðblindu og heimsku. Þessu fólki er ekki stætt á þingi lengur og ættu öll að víkja strax.Það er gott að þessi upptaka kom fram.Sýnir það sem þjóðin hefur verið að tala um að traust til Alþingismanna og kvenna er við alkul.

[Hörður Þormar, 29.11.2018 kl. 14:44]

"Þessi rumpulýður!", eru þau orð sem mér er einna minnisstæðast að hafa heyrt úr stóli alþingis. Eru þau kannski enn í fullu gildi?

[Helgi Þór Gunnarsson, 30.11.2018 kl. 17:47]

Góður Ómar! 

Kær kveðja frá Eyjum.