Er "skítseiðið", "sá seki" að ljúga?

Á samfélagsmiðlum má sjá mörg andstæð sjónarmið varðandi ýmis mál, og er Klaustursmálið engin undantekning í því.

Undanfarna daga hefur verið mikið rætt um það á sumum bloggsíðum að "þolendurnir" á Klausturbarnum, sexmenningarnir, geti fundið út hvert það "skítseiði" og "sá seki" var, sem stóð fyrir "árásinni" á þá á hinum fræga bar. 

Í þessum skrifum er málinu alveg snúið við og málið talið glæpsamlegt og árás á sexmenningana, hluti af stóru samsæri, og sé nú mikilvægt að hafa hendur í hári árásarmannsins, sækja hann til saka og fá hann dæmdan. 

Einnig að rannsaka "RUV-árás" á Framsóknarmenn hér um árið og tengsl hennar við "árásina" á Gunnar Braga Sveinsson, svo að saknæmur þáttur RÚV í Klausturmálinu verði afhjúpaður. 

Þannig sé hægt að snúa málinu við, svo að "skítseiðið" og þeir, sem eru raunverulega sekir, fái refsidóm, hugsanlega líka RÚV, en þolendurnir fái hins vegar fulla samúð og traust. 

"Skítseiðinu" er í einum bloggpistlanna líkt við þann uppljóstrara, sem átti einna mestan þátt í að Nixon Bandaríkjaforseti varð að hrökklast frá völdum, og var nefndur leyninafninu Deep Throat. 

Sem sagt: Í Watergatemálinu var Deep Throat "skítseiðið" sem gerði árás á Nixon, sem var þolandi í málinu.  

Verst er að Nixon skyldi ekki geta afhjúpað Deep Throat á sínum tíma likt og nú hefur verið gert á íslenska blogginu varðandi þekktan nafngreindan Pírata. 

Þá hefði Nixon getað setið með fullri virðingu og traustu fylgi út kjörtímabilið og forsetaembættið ekki fallið í hendur hinum skelfilegu Demokrötum.

Um síðir gaf Deep Throat sig fram og nú hefur Bára Halldórsdóttir sagst vera Marvin. 

En er þá ekki næsta skref að úr því að það var létt verk að sanna "sekt" nafngreinds Pírata, að sanna að Bára Halldórsdóttir segi ósatt og sé að taka á sig "árás" "skítseiðisins" eða jafnvel sameiginlega árás margra skítseiða.    

 

„Ég er þessi Marvin“

Athugasemdir

[Richard Þorlákur Úlfarsson, 7.12.2018 kl. 08:11]

Ef þetta er rétt hjá þér að hún sé að taka á sig "árás" "skítseiðisins" eða jafnvel sameiginlega árás margra skítseiða, þá er það snilld að nota konu sem er fötluð og sam­kyn­hneigð.

Það fer engin að kæra hana til lögreglunnar.

[Guðmundur Ásgeirsson, 7.12.2018 kl. 17:38]

Það eru alveg til lyf við þessu.

[Þorsteinn Siglaugsson, 7.12.2018 kl. 18:26]

Hvort það eru til lyf sem virka á þetta veit ég ekki Guðmundur. En það eru til ýmis efni sem valda því. Sum vaxa á umferðareyjum 

En komi til þess að Bára verði kærð til lögreglu, sem mér finnst því miður ekki ólíklegt, legg ég til að hafin verði fjársöfnun til að styðja hana í málarekstrinum og til að standa straum af hugsanlegum sektum.

[Guðmundur Ásgeirsson, 7.12.2018 kl. 18:59]

SDG brá fyrir sig samlíkingu úr fótbolta í viðtali á Bylgjunni. Talaði um að sá sem væri nýbúinn að skora sjálfsmark væri um leið sá liðsmaður sem legði hvað mest kapp á að bæta úr og gera betur.

Ef hann eða einhver af hinum sem komu fram á upptökunum kæra uppljóstrarann eða höfða mál gegn henni, þá yrði það ekki bara annað sjálfsmark svo ég noti sama líkingamál, heldur í þetta sinn úr vítaspyrnu.

Enginn gæti orðið (raunverulegur) sigurvegari í slíku máli.

[Þorsteinn Siglaugsson, 7.12.2018 kl. 19:26]

Já, ég hugsa nú að sá leikmaður sem skoraði sjálfsmark úr vítaspyrnu yrði rekinn úr liðinu. Og "sjálfsmark" Sigmundar var nú eiginlega skorað úr vítaspyrnu.