Mörg yfirburða íslensk nýyrði, svo sem sjálfviti.

Besta fyrirmyndin um notkun íslenskunnar og sköpun nýyrða er auðvitað Jónas Hallgrímsson, með orð eins og samúð og ljósvaka. 

Nýyrðið sjálfviti hjá Valgarði Egilssyni heitnum hefur yfirbyrði yfir þýska alþjóðaorðið besservisser að öllu leyti. Það er einu atkvæði styttra, það lýsir betur hugarfari sjálfvitans, sem telur sjálfur sig sjálfan vita flest betur en aðrir. 

Síðan rímar orðið á móti orðinu hálfviti sem leiðir hugann að því að í mörgum tilfellum er sjálfvitinn mun verra fyrirbæri en hálvitinn; jafnvel mesti hálfvitinn sjálfur. 

Emil Björnsson átti nýyrðin ferna og hyrna ef ég man rétt, og gott ef afburðaorðið þyrla var ekki hans smíð. 

Hann var andvígur nýyrðinu léttmjólk, vegna þess að léttmjólk er þyngri en rjómi. 

Lagði til nýyrðið þynnka, en ekki fékk það hljómgrunn hjá kímnisnauðum löndum hans. 

Hér um árið lagði ég til nýyrðin fis, flugfis eða fisflugvél og sídrif og tog yfir ensku orðin quadra-trac og torque sem er þýtt með orðinu drejningsmoment á dönsku. 

Danska orðið fimm sinnum lengra en hin og fjögur atkvæði í stað eins. 

„Erfitt að rífast við brauðrist á þýsku“

Athugasemdir

[Örn Einar Hansen, 1.4.2019 kl. 18:46]

Þetta er engan veginn rétt hjá þér ... hvað hefur orðið "sjálfvit" fram yfir orðið besserwisser? Orðið "besserwisser" þýðir "sá sem veit allt betur". Hvað þýðir sjálfviti? Sá sem veit allt sjálfur? Ef hann veti það ekki sjálfur, hvernig veit hann  það þá ... er hann "vitur" af því hann "veit það ekki sjálfur", heldur tekur þetta allt frá "besserwissanum".  Þetta orð, er svona álíka hjákátlegt, og sýnir hvað Íslendingar almennt hafa littla málkunnáttu ... og orðið "hálfviti" ... veit hann bar helminginn, helminginn af hverju? Og hver dæmir um það hver sé "heilvita"?

Þú ættir að lesa einhverja heimspeki, og ef þú átt í erfiðleikum með að skilja hana ... stúdera hana lítið. Hvað þýðir "cogito ergo sum"? Hver var það sem sagði, "Scio me nihil scire".

Orðið "besserwisser" þýðir alls ekki, að viðkomandi sé vitlaus né hafi rangt fyrir sér, oftast hið gagnstæða ... né heldur þýðir það að einhver hafi fengið þetta upp úr sjálfum sér.

Orðin "hálfviti" og "sjálfviti", sýnir hveru illa Íslendingar eru að sér, hvað varðar heimspeki ... og hversu margir háskólagengir Íslendingar ganga með "gráður", sem þeir hafa engan rétt á.

[Þorvaldur Sigurdsson (IP-tala skráð) 1.4.2019 kl. 22:19]

Reyndar er samúð ekki smíði Jónasar. Það mun mega rekjast til Sigurðar skólameistara.

[Ómar Ragnarsson, 1.4.2019 kl. 23:20]

Orðið besservisser hefur oftast verið notað af öðrum en þeim sjálfum sem háðsyrði um menn sem telja sig vita flest betur en aðrir. 

Auðvitað eru margir þeirra afar vel að sér og pirra kannski marga með því að láta það óspart í ljósi, en orðið má bæði nota í neikvæðri og jákvæðri merkingu.