Hinn daglegi biti sem ræður úrslitum?

Leynitrixin, sem getið er um í tengdri frétt sem ráð við ofþyngd, felast meðal annars í því að forðast að hafa sæta og orkumikla bita eða gómsætt viðbit sjáanlegt eða handhægt. 

Nú er það svo, að þegar maður bætir á sig einum smábita eða einu glasi eða smáflösku, lítur það eitt og sér ekki út fyrir að geta haft afgerandi áhrif á holdafarið. 

En þá verður að líta til þess, að í langflestum tilfellum er aðeins um að ræða fá grömm að meðaltali á dag, sem fólk þyngist. 

Og þetta er svo lúmskt þegar það gerist hægt og bítandi. 

Aðeins fimm gramma þynging á dag gera næstum tvö kíló á ári eða 20 kíló á áratug og 50 kílóa þyngingu á 25 árum. 

Þegar bitinn góði eða glasið góða blasa við, getur verið gagnlegt að hugsa sem svo: Það verður einmitt þessi biti, eða þetta glas sem á eftir að ráða úrslitum um það hvort ég þyngist í dag eða þyngist ekki. 

Svipað leynitrix er að hafa vigt ævinlega sjáanlega, vigta sig tvisvar á dag, gera glímuna við aukakílóin líka samfelldu langhlaupi og miða við þyngdina þegar vaknað er á morgnana. 

Siðuhafi var orðinn 97 kíló fyrir tæpum sex mánuðum, og enda þótt þessi þyngd teldist samkvæmt alþjóðlegri formúlu þar um, vera nákvæmlega á mörkum ofþyngdar, en ekki ofþyngd, var tilhugsunin um það að vera í raun að rogast með tíu aukakíló allan daginn, eða sem svarar fimm tveggja lítra flöskur upp stiga, orðin óþægileg. 

Því var hafið átak fyrsta vetrardag í haust, sem miðaði að því að ná 10 kílóa léttingu á einu ári. 

En þetta getur verið meira en að segja það, þrátt fyrir vigtina og smámunasemina varðandi bitana og glösin. 

Axlarbrot í ársbyrjun truflaði, því að því fylgdu miklar legur og rýrnun vöðva, sem eru eðliþyngri en fitan. 

Aftur var hægt að auka hreyfingar þegar kom fram í febrúar og æfingar fyrir aukið afl, snerpu og þol, en þá truflaði aukinn vöðvamassi mælingarnar í hina áttina. 

20 mars var fimm mánaða afmæli léttingarinnar, þyngdin komin niður í 88 kíló og hlaupatíminn frá 1. hæð upp á 5. hæð með mælingu skeiðklukku kominn að nýju niður í 30 sekúndur.

En þá fór vöðvaþyngingin samfara slökun á aðhaldi að segja til sín, og nú er þyngdin komin upp í 90 kíló. 

Þessi ferill jafngildir tveggja mánaða töf á léttingunni og má ekki við svo búið standa. 

Þrjú leynitrix sem hjálpa þér að léttast

Athugasemdir

[Emil (IP-tala skráð) 9.4.2019 kl. 22:31]

Þetta er lúmskt, ég var orðinn allt of þungur og við konan gerðum tvennt.

Fyrir 6 mánuðum fórum við á Keto mataræðið og settum okkur daglega orkuþörf í my fitnesspal appinu í símanum. Síðan þá er ég búinn að missa 43kg og konan 20kg. Að við séum að þessu saman hefur hjálpað mikið. Ég fer einnig mikið í ræktina og það hjálpar.

Það þarf hver og einn að finna sína leið, sína aðferð til að halda sér í þeirri þyngd sem viðkomandi kýs.

kv.

Emil