Seldar árgerðir, sem ekki voru framleiddar árið sem skráð var?

Engar rannsóknir virðast hafa farið fram á því hve algengt það sé hér á landi, að bílainnflytjendur geymi bíla svo lengi óselda og óskráða, að þegar þeir eru loks seldir séu þeir orðnir ári eldri eða meira en skráð er í skráningarskírsteininum. 

Það ætti ekki að vera gild viðbára, að íslensk yfirvöld hafi ekki tök á að nálgast vottun um það hvaða dag viðkomandi bíll taldist söluhæfur og fullgild vara nýkominn af færibandinu í upprunalandinu. 

Eða að ekki sé hægt að hafa kerfið þannig, að dagsetningin á komu bílsins til landsins sé skráð en ekki skráningardagur. 

Fyrir utan árs skekkju í uppgefnum aldri, er einnig um það að ræða, að kyrrstaða nýsmíðaðs bíls í heilt ár eða meira getur um sumt valdið skemmdum eða tæringu sem ætti að verðfella bílinn í verðmati. 

Síðuhafa er kunnugt um tilfelli, þar sem bíll er skráður árgerð 2014 þótt það ár hafi enginn bíll af þessari gerð verið framleiddur, því að önnur gerð með nýju nafni, örlítið stærri, tók við af honum. 

2013 er síðasta framleiðsluár bíls af þessari gerð í öllum bílahandbókum, og þess vegna er aldur bílsins falinn ef kaupandinn veit ekki hvers kyns er. 

Tilfærsla á aldri bíls felur í sér blekkingu, sem getur verið jafngild 20-30 kílómetra þúsund tilfærslu á kílómetrastöðu á vegalengdamæli, vegna þess að fyrsta árið fellur bíllinn langmest í verði, eða um allt að fjórðung. 

Í fyrrnefndu tilfelli var kaupandanum vegna þekkingu á bílgerðum kunnugt um hinn rétta aldur bílsins, sem umboðið bauð með umtalsverðum afslætti, svo að verðið var út af fyrir sig rétt í þessu tilfelli. 

Það er raunar gamalkunnugt fyrirbrigði að framleiðendur skrái nýja bíla af annarri árgerð en hún er framleidd.  

Þetta var meginreglan áratugum saman hjá bandarískum bílasmiðum, sem kynntu nýjar árgerðir oft síðsumars eða að hausti árinu áður en samsvaraði því sem gefið var upp og auglýst. 

Síðustu bílar af árgerðinni 1956 voru yfirleitt seldir síðsumars og 1957 árgerðirnar kynntar og seldar nokkrum mánuðum áður en áður en árið 1957 gekk í garð. 

En nýju árgerðirnar voru svo rækilega auglýstar um leið og framleiðsla þeirra hófst, að allir vissu hvers kyns var. 

Ekki er síðuhafa kunnugt um hvernig árgerðir bíla voru skráðar í nýskráningum vestra, en yfirleitt vissu kaupendur um aldur bílanna sem þeir keyptu.  

Ef hægt er réttilega að kvarta yfir sinnuleysi íslenskra yfirvalda varðandi stórfelld fjársvik með tilfærslu á vegalengdamælum bíla, má líka átelja íslensk yfirvöld fyrir að rannsaka ekki líka skráningar ágerða í skráningarvottorð bíla. 

Málið þoli ekki frekari tafir

Athugasemdir

[Gunnar Heiðarsson, 14.4.2019 kl. 08:42]

Fyrir svo utan það að bílar sem standa um lengri tíma, stundum á hafnarbakka, geti skemmst, þá veldur svona röng skráning mönnum oft erfiðleikum þegar versla þarf varahluti. Sjálfur átti ég bíl sem var nýskráður í maí 2006 og því skráður árg. "06. Staðreyndin var að verksmiðjurnar hættu framleiðslu þeirra um áramót "05 - "06 og komu með nýjan bíl á markað. Umboðið hér hélt því fram að framleiðslubreytingin hafi orðið um mitt ár "06.

Þegar þurfti að kaupa varahluti í þennan bíl var það ekkert vandamál ef verslað var við umboðið sjálft, það hélt utanum skekkjuna í sínum bókum, en ef ætlunin var að kaupa þessa varahluti annarstaðar, sérstaklega ef pantað var að utan, varð að tilgreina bílinn árg "05, svo réttir hlutir væru afgreiddir.

Það á skilyrðislaust að setja í skráningu bíla framleiðsluár, þó fyrsti söludagur geti einnig verið til staðar. Þá skal nota dagsetningu sem framleiðandinn sjálfur gefur upp. Að skrá dagsetningu þegar bílinn kemur til landsins nægir ekki þar sem bílar geta verið geymdir um langan tíma erlendis, alveg eins og hér.

[Valdimar Samúelsson, 14.4.2019 kl. 09:53]

Ég lenti í tveim atvikum eitt var þegar ég keypti Volvo Lapplander en þeir voru búnir að standa einhver ár í Svíþjóð maður en þeir voru skráðir hér sem mig minnir 1980 en það var engin leið að fá rétt ártal á pappíranna. Sama með Korando en það lenti ég í vandræðum með varahluti vegna vitleysu. Bifreiðaeftirlitið var alltaf mjög lokað og ómannvænt sem er sama í dag.

[Bóas Börkur (IP-tala skráð) 14.4.2019 kl. 12:38]

hlýt að eiga metið... keypti 94 árg af Range Rover Classic sem var framleiddur 1990. hann var nýskráður óekinn 94 semsagt. þegar ég ætlaði að skrá hann sem fornbíl 25 ára voru svörin Nei, það verður að fylgja framl.árinu. Enn voru því 4 ár eftir þar til hann gat orðið fornbíll, þá semsagt 29 ára !!

[Ásgrímur Hartmannsson, 14.4.2019 kl. 20:37]

Þetta á ekki að vera vandamál, þeir geta ekki breytt árgerðinni nema fikta í VIN númerinu, og það er dáldil framkvæmd.