Golf-flokkurinn er dæmi um umferðarvandann, sem stækkun bíla veldur.

Síðan Volkswagen Golf kom fram á sjónarsviðið 1973 hefur þessi bílgerð verið með einna mestu söluna í Evrópu og því gott dæmi um þróun bíla í álfunni á þessum tíma. 

Meira að segja hefur ákveðinn stærðar- og verðflokkur bíla í Evrópu verið nefndur Golf-flokkurinn. 

Fyrsti Golfinn var 3,70m á lengd og 1,61m á breidd og 750 kíló. 

Núna er Golf 4,27 m á lengd og 1,79 á breidd og meira en 1200 kíló. 

Hann hefur lengst um meira en hálfan metra, breikkað um 18 sentimetra og þyngst um næstum hálft tonn. 

Keppinautarnir, svo sem Ford Focus, Opel Astra og Toyota Corolla, eru bæði lengri og breiðari en Golf, og það er einkum breikkunin sem fólk verður vart við, því að það munar um hverja 20-25 sentimetra breikkun, þegar lagt er í stæði. 

Sem dæmi um það hve þessi breikkun er mikil má nefna, að sex sæta bílar í efri verðflokkum hér áður eins og Toyota Crown, Volvo 240 og Ford Zephyr voru 10 sentimetrum mjórri en Golf er nú. 

Krafan um sífellt stærri og voldugri bíla er í raun umhverfisvandamál í borgum, þar sem flatarmál gatnakerfisins er takmarkað. 

Sem dæmi má nefna, að ef bílarnir 100 þúsund, sem ekið er daglega um Miklubrautina yfir Elliðaárnar, væru hálfum metri styttri hver að jafnaði, myndu losna daglega samtals 50 kílómetrar af malbiki, sem myndu vera auðir í stað þess að vera þaktir bílum.   

Bílarnir þykkna og þyngjast

Athugasemdir

[Hallgrímur Hrafn Gíslason, 27.6.2019 kl. 08:50]

Var Volvó 244 einhverntíman 6 sæta?

Er Up ekki í svipaðri stærð og gamli 

Golfinn.  Kaupandinn velur væntanlega stærð við sitt hæfi, óháð nafni

[Ómar Ragnarsson, 28.6.2019 kl. 00:47]

244 var í svipuðum stærðar- og þyngdarflokki og hinir nefndu bílarnir. Meira að segja sjálfur Aston Martion Lagonda, sem var meira en fimm metra langur, var álíka breiður og Astra, Focus og Golf. 

Greinin fjallar um meðalbílinn af svonefndri minni millistærð, sem eru mest seldu bílgerðir heims og hafa um áratuga skeið verið skilgreindir í svonefndum Golf-flokki í Evrópu.  

Up er fjarri því að vera meðalbíll, heldur er hann minnsti bíll VW-verksmiðjanna, stærðarflokkum fyrir neðan Golf og selst í margfalt minna magni en Golf. 

Golf var alls ekki í flokki minnstu bíla í upphafi. Póló kom fyrr á markað og var miklu minni og svipað var að segja um Mini, Renault 5 og Fiat 127. n