Afar mikilvægt skref. Fágætt svæði sem vantaði alltaf.

Leitun er að svæði, sem er jafn fágætt á heimsvísu og hægt að ná mynd af og því svæði sem nú hefur verið gert að hluta Vatnajökulþjóðgarðs. 

Herðubreið og næsta nágrenni hennar hefur sárlega vantað í þjóðgarðinn og ber að fagna þessari viðbót.

Á meðfylgjandi loftmynd sjást fimm af þeim tíu atriðum, sem segja má að geri vatnasvæði Jökulsár á Fjöllum að því sem það er. 

1. Dyngja. (Kollóttadyngja) Ein af mörgum á svæðinu. 

2. Móbergsstapi. (Herðubreið). Flottasti stapinn á jörðinni. 

3. Gígaröð, móbergshryggur. (Herðubreiðartögl). Fyrirbrigði, sem hvergi finnst á þurrlendi jarðar nema á Íslandi. 

4. Stórt eldfjall. (Snæfell). 

5. Stór hraunbreiða. (Ódáðahraun). 

Úr "Kóróna landsins", sem er í ljósmyndasöngljóðabókinni "Hjarta landsins" og á Spotify: 

 

"Allvíða leynast á Fróni þau firn, 

sem finnast ekki í öðrum löndum: 

Einstæðar dyngjur og gígar og gjár

með glampandi eldanna bröndum. 

Við vitum ekki´enn að við eigum í raun 

auðlind í hraunum og söndum,  

sléttum og vinjum og urðum og ám

og afskekktum sæbröttum ströndum. 

 

Í ísaldarfrosti var fjallanna dís

fjötruð í jökulsins skalla

uns Herðubreið lyfti sér upp gegnum ís, 

öskunni spjó og lét falla. 

Er frerinn var horfinn var frægð hennar vís; 

svo frábær er sköpunin snjalla. 

Dýrleg á sléttunni draumfögur rís

drottning íslenskra fjalla.

 

Að sjá slíkan tind

sindra í lind

og blómskrúðið bjart

við brunahraun svart! ...

 

...Seytlar í sál 

seiðandi mál: 

Fjallanna firrð, 

friður og kyrrð."

Vatnajökulsþjóðgarður stækkar

Athugasemdir

[Valdimar Samúelsson, 29.6.2019 kl. 22:34]

Veit þetta er ekki í takt en  Hér er dálítið merkileg grein um áróður ESB í Tékkóslóvakíu á sínum tíma Eigin kona mesta áróðurspólitíkus fékk stöðu áróðursdeildar ESB þar í landi Er ekki þetta að ske á Íslandi. https://www.brugesgroup.com/media-centre/papers/8-papers/786-federalist-thought-control-the-brussels-propaganda-machine?fbclid=IwAR0ZBaOb2NNkaox_YilN-w_pj2u2uiOeNf-os8Xp1cWDVihJVGKr6Gv5kzU

þetta er hreint ótrúlegt en sama og manni grunaði. Geymið greinina í hið minnsta.