Nýtur fegurðarinnar og Hringvegarins. Fljótið allt friðað síðar?

Nú hefur Goðafoss verið friðaður og er það vel. 

Margir fossar á Íslandi eru þó vatnsmeiri en Goðafoss. Rennsli í Urriðafossi í Þjórsá er að meðaltali 352 rúmmetrar á sekúndu og 184 í Dettifossi, en 84 í Goðafossi. 

Goðafoss er heldur ekki hæstur. Dettifoss er 44 m og Gullfoss 32, en Goðafoss er 11 metra hár. 

Engu að síður er Goðafoss líklega þriðji frægasti fossinn hér á landi, því að stærðartölur segja ekki allt. 

Fossinn er afar fallegur og sýnist vera stærri, hærri og vatnsmeiri en hann er. 

Hann á sér merka sögu varðandi kristnitökuna þegar Þorgeir Ljósvetningagoði henti hinum heiðnu goðum sínum i fossinn og fór öðruvísi að en gert var í Reykjavík, þar sem öndvegissúlurnar, heimilisguðir Ingólfs Arnarsonar og niðja hans, voru enn í eldhúsi 130 árum eftir kristnitökuna. 

Síðast en ekki síst er lega Goðafoss ákjósanleg, því að hann er alveg við Hringveginn og sést vel frá honum. 

Friðun þessa yndislega foss er því fagnaðarefni á alla lund. 

Ofar í ánni eru Aldeyjarfoss og Hrafnabjargafoss, sem mætti vel athuga að setja lika á friðunardagskrána ásamt Skjálfandafljóti og vatnasviði þess í heild. 

Áforma að friðlýsa Goðafoss

Athugasemdir

[Gunnar Heiðarsson, 18.7.2019 kl. 22:03]

Aldeyjarfoss er tvímælalaust með allra fegurstu fossum landsins, sem og Goðafoss.

Að vísu þarf að leggja örlítið meira á sig til að skoða henn en Goðafoss, þó ekki meir en svo að það ætti flestum að vera auðvelt.