Hlýindin breyta ánum, farvegunum og leiðunum yfir þær.

Jökulsárflæður svonefndar á austanverðri Gæsavatnaleið hafa löngum verið einn skemmtilegasti kaflinn á slóðakerfi hálendisins.  

Þetta er vestasti hluti Jökulsár á Fjöllum sem flæmist eftir sandinum í óteljandi samliggjandi grunnum smákvíslum sem venjulega hafa verið ágætlega færar ef ekið er hiklaust áfram. 

Og bara gaman að spretta úr spori og láta gusurnar ganga yfir bílana. 

En ef mikill vöxtur er í ám á borð við þessa á,  vegna hlýinda, leysingar og aurburðar, geta aðstæður breyst mikið og lúmskt til hins verra. 

Ástæðan getur til dæmis verið sú, að ef mikil hreyfing er á sandinum, sem áin bert fram, má stundum alls ekki hægja á ferðinni á jeppanum, hvað þá að stansa. 

Þá safnast aur að hjólum bílsins svo að hann veður pikkfastur. 

Svo er að sjá af myndum að þetta hafi gerst á Flæðunum í gær. 

Þegar áin er í þessum ham, getur ástandið orðið þannig, að ekkert nema þyrla geti aðhafst til bjargar fólkinu í bílunum. 

 

Flúðu upp á þak eftir að bílar festust

Athugasemdir

[Gunnar Heiðarsson, 1.8.2019 kl. 07:19]

Fór þessa leið fyrir nokkuð mörgum árum síðan, frá Nýadal um Gæsavötn, Urðarháls og niður Flæðurnar. Einkar skemmtileg leið og oft langað að fara hana aftur.

En hvernig er það, hafði gosið í Holuhrauni og hraunið frá því einhver áhrif þarna vestur á Flæðurnar?

[Ómar Ragnarsson, 1.8.2019 kl. 11:28]

Nei, en ekki fyrr en komið er austar á sandinn.  

[Sigurður Antonsson, 1.8.2019 kl. 11:43]

Skemmtileg og greinagóða færslu hjá Ómari að vanda. Fór þessa leið einbíla á litlum Suzuki árið 1986. Þá var ekki mikið í ánni þrátt fyrir leysingatíð. Skiptir máli að farið sé snemma dags til að forðast bráðnunina þegar dagshitinn stígur.

Áður en farið var yfir Flæðurnar frá Drangjökli mættum við Þjóðverjum sem voru nýkomnir frá Öskju. Þeim hafi gengið vel að komast yfir jökulvatnið og voru að skoða nýútsprungin blóm Fjallakobba í kolsvörtu hrauninu. Alltaf síðan hefur mér fundist djarft að fara þarna yfir. Búið var að vara okkur við í Jökuldal, en lítið má út af bera ef ekki er farið ákveðið yfir þennan "hafsjó". Nafnið eitt ætti að slá bjöllur en útlendir vita minna um leiðbeinandi heiti. Nú þykir sjálfsagt að senda þyrlu hvert sem er ef menn taka rangar ákvarðanir en minna talað um kostnaðinn sem því fylgir.  Gunnar, ég held að leiðin verði meira spennandi vegna áhættunnar og nýrunnins hrauns?