Hreindýr og önnur dýr á bannlista? Já, af fenginni reynslu.

Reynsla síðuhafa af því að fljúga með dýr um borð í flugvélum er ekki góð, svo að ekki sé meira sagt. Þetta hefur að vísu aðeins gerst tvisvar, en tvisvar sinnum reynist vera tvisvar sinnum of oft. 

Fyrra skiptið var á Akureyri, flugvélin var fjögurra sæta vél af gerðinni Cessna 172 Skyhawk og farþeginn, sem setti svo sannarlega mark sitt á þetta eftirminnilega flug með dýr um borð.  

Atvikið gerðist raunar í framhaldi af algerri neitun varðandi þetta flug, en konan, sem átti hundinn, hafði samið um það að fá að verða samferða frá Akureyri, og sótti það afar fast að fá að vera með sitt elskulega, ljúfa og yndislega dýr með sér, nánar tekið hund af tæplega meðalstærð.

Konan kom samt út á völlinn með hundinn meðvitundarlausan í stórri köru eftir sérstaka lyfjagjöf að hennar sögn, auk þess sem hundurinn var kyrfilega bundinn niður af "sérfræðingi" að sögn konunnar.

Svo fór að samþykkt var að skorða hundinn niður í öryggisbelti í aftursæti vélarinnar við hliðina á hinum elskandi eiganda. 

Allt gekk vel í fyrstu og hundurinn lá alveg grafkyrr, slakur, sætur og njöraður niður,  þangað til komið var yfir Oddeyrina í klifri með stefnu á Þelamörk til að fljúga vestur yfir Öxnadalsheiði. 

Þá dundu ósköpin yfir: Hundurinn rankaði við sér og gersamlegal trylltist, urraði, gelti og ólmaðist eins og óður væri. 

Konan togaði í hálsólina en réði ekkert við hið tryllta rándýr, sem byrjaði strax að losa sig úr bindingunum, sem auðvitað var mjög sárt, svo að hann varð enn óðari; nú einnig vegna sársaukans.  

Það er skemmst frá því að segja, að snúa varð flugvélinni við í snatri og við tók keppni á milli flugmanns og hunds um það að lenda án stórslyss. 

Því miður leið það langur tími þar til aftur kom til þess að flytja dýr í flugi, og var það ungt hreindýr í það sinn. 

Það hafði verið á sýningu í Reykjavík í tilefni 200 ára afmæli borgarinnar og flutt með flutningabíl þangað frá bænum Eyjólfsstöðum í Berufirði. 

En þegar sýningunni lauk vantaði flutningstæki til baka og varð úr að dýrið yrði flutt með flugvélinni TF-HOF austur á Djúpavog, en þessi flugvél var tveggja hreyfla sex sæta vél af gerðinni Piper Apache PA-23. 

Tvær aftari sætaraðir vélarinnar voru teknar úr henni, dýralæknir sá um að svæfa dýrið og það var kyrfilega ólað niður fyrir aftan framsætin, en við hlið flugmanns sat unglingsstúlka frá Eyjólfsstöðum, sem dýrið var einstaklega hænt að. 

Lagt var af stað í prýðisveðri og flugleiðin höfð sem beinust austur á Djúpavog, nánar tiltekið austur eftir Vatnajökli sunnanverðum. 

Allt gekk eins og í sögu þar til komið var yfir ofanverðan Breiðamerkurjökul í sjð þúsund fetum. 

Þá gerðist það allt í einu að dýrið rumskaði hressilega við sér og sparkaði fast með fótunum. 

Skyndilega heyrðist smellur og allt í einu sviptist farangurshurðin aftast í vélinni upp, og dýrið rann þar út með afturfæturna, en hékk þó áfram í böndunum. 

Nú var ekkert um að ræða en að reyna að lenda vélinni með afturhluta hreindýrsins hangandi út úr vélinni aftast hægra megin. 

Þannig var hökt vestur til flugvellarins á Fagurhólsmýri, og má nærri geta að þeir, sem voru á jörðu niðri, þegar flogið var yfir þjóðveginum, og sáu flugvél koma fljúgandi með hálft hreindýr hangandi út, hafi varla trúað sínum eigin augum. 

Éftir lendingu á Fagurhólsmýri leiddi skoðun á farangurshurðinni í ljós að hreindýrinu hafði á einhvern óskiljanlegan hátt tekist að krækja klaufinni á öðrum afturfætinum í fals neðst í hurðinni, sem gat opnað hurðarlæsinguna! 

Ekki var gefist upp þarna, heldur hreindýrið bundið enn betur en fyrr, límt fyrir falsið innan á hurðinni og leiðangrinum lokið á flugvellinum við Djúpavog. 

Niðurstaða: Ekki fleiri flug með dýr, takk!

 

 

Hestur um borð í flugvél vekur reiði

Athugasemdir

[Leifur Hallgrímsson (IP-tala skráð) 12.12.2019 kl. 23:21]

Ómar þú ættir nú að muna að ég fór með hreindýrið suður á Cessna 206 TF-MYY og gekk bara vel og var ekki sögulegt.

Kær kveðja

Leifur

[Ómar Ragnarsson, 13.12.2019 kl. 00:55]

Ja, hérna! Ég biðst innilega afsökunar á þessu.  Ég man þetta líklega ekki, og mundi það heldur ekki fyrst eftir atvikið vegna þess að málið kom ekki inn á mitt borð fyrr en í lok afmælishátíðarinnar. 

Niðurstaða: Tveir flugvinir tóku að sér að redda því að Reykvíkingar gætu skoðað hreindýr í tilefni af 200 ára afmæli borgarinnar með því að fljúga með það frá Djúpavogi til Reykjavíkur og til baka aftur. 

Verkefnið tókst fullkomlega; hreindýrið var farsællega flutt yfir endilangt landið og allt annað varðandi þetta mál var algert aukaatriði.