"Hamingjan og núið"

Sumar af einföldustu staðreyndum mannlífsins eru þess eðlis, að þær verða okkur oft ekki nógu ljósar, heldur gleymast í dagsins amstri og lífsins ólgusjó, þrátt fyrir einfaldleika sinn.

Ýmis ljóðmæli og máltæki snerta þetta, sem nefna mætti alþýðuspeki. 

Undanfarnar vikur og daga hafa verið að mótast og fá á sig endanlega mynd lítið ljóð og lag um þetta efni, og líta má á sem ófullkomnar hugleiðingar af svipuðu tagi og björgunarsveitarmaðurinn Halldór Óli Hjálmarsson á Ísafirði lýsir svo eftirminnilega í tengdri frétt á mbl.is. 

 

HAMINGJAN OG NÚIÐ.

 

Hver andrá kemur og hún fer, 

og einn og sér er dagur hver. 

Hve margir góðir dagar verða´er óvíst enn.

En morgunljóst og augljóst er,

að hvern og einn dag þakka ber, 

sem Drottins gjöf, sem þá eignast allir menn.  

 

Þótt hamingjan sé ekki alltaf gefin

og óvissan sé rík og líka efinn

munum, er við æviveginn stikum,

að ævin, hún er safn af augnablikum,

og missum ekki´á hamingjuna trúna;

hún mun í hvert sinn gefast okkur - núna.

Það er svo morgunljóst og ekki snúið;

þau eiga samleið, hamingjan og núið.

 

Hver andrá kemur og hún fer

og einn og sér er dagur hver.

Hve margir góðir dagar verða´er óvíst enn.

En fjársjóð geymir fortíðin,

sem felur í sér vísdóminn:

"Svo lengi lærir sem lifir" segja menn.

 

Er andstreymi og mistök okkur þreyta,

þá er það víst að því mun ekkert breyta,

að ævin, hún er safn af augnablikum, 

er æviveg í tímans straumi stikum.

Við megum aldrei missa á það trúna,

að mega leita hamingjunnar - núna,

því morgunljóst það er og ekki snúið,

Þau eiga samleið, hamingjan og núið.

 

Hver andrá kemur og hún fer

og einn og sér er dagur hver;

þau eiga saman, hamingjan og núið. ´ 

 

Lærði fyrir 25 árum að morgundagurinn er ekki vís

Athugasemdir

[Húsari. (IP-tala skráð) 17.1.2020 kl. 09:37]

Sæll Ómar.

Takk fyrir þetta.

Á þetta ekki að vera:

"...sem þá eignast allir menn."

Kv. 

[Ómar Ragnarsson, 17.1.2020 kl. 10:19]

Takk, sömuleiðis, - mér sást yfir þessa einföldu villu, svona nývaknaður. 

[Gunnlaugur Jónsson (IP-tala skráð) 17.1.2020 kl. 13:11]

Um NÚIÐ vil ég segja þetta: Núið er snúið... afþví að það er aldrei búið...

kv Gulli..

[Halldór Jónsson, 17.1.2020 kl. 13:25]

Sá enga villu. Er þetta eftir þjóðskáldið Ómar Ragnarsson sjálfan? Þetta er ágætur skáldskapur að mínu viti.

[Ómar Ragnarsson, 17.1.2020 kl. 14:24]

Á tímasetningunum á athugasemdunum sést, að sú fyrsta kom 09:37 og þá srax var innsláttarvillan leiðrétt, svo að hún sást ekki eftir það. 

[Húsari. (IP-tala skráð) 17.1.2020 kl. 16:34]

Sæll Ómar.

Fyrr er hagyrðingur en höfuðskáld
eins og stendur þar.

Ómar Ragnarsson hefur náð yfir landið
og miðin þó ekki væri nema með lögum eins og
Sveitaball og Botníu. Er hann þjóðskáld eða
skal hann gjalda þess að hafa samið dægurlagatexta?

Hvað með Jón í bankanum?

Efast nokkur um Bubba Morthens með lögin Blindsker
og Augun þín. Ægifagur margur textinn eftir Bubba.
Er hann þjóðskáld?

Reykjavíkurskáldið, - var það jafnframt þjóðskáld, -
hvað með Davíð Stefánsson?

Steinn Steinarr er atómskáldið, Hallgrímur Pétursson
er sálmaskáldið en hvorugan hef ég heyrt nefndan þjóðskáld.

Helgi Hálfdanarson skyldi eftir sig stórbrotið verk á
sviði þýðinga og afgreiddi Magnús Ásgeirsson út úr hringnum(!)

Jónas Hallgrímsson og Einar Benediktsson eru þjóðskáld, þar hafa
fáir verið í vafa.

Fleiri? Færri? Hvað með Sigurð Zetan og Jón frá Pálmholti
að ógleymdum Vilhjálmi sem jafnan var kenndur við Skálholt.

Næst er þá spurningin hverjir teljist til söngvara?!

Stefán Íslandi hitti mann nokkurn frá Hvammstanga
og kynnti sig: Stefán Íslandi.

Af bragði fékk hann svarið: Magnús Hvammstangi!

[Halldór Jónsson, 17.1.2020 kl. 18:57]

Ómar er þjóðskáld þar sem þjóðin syngur lögin hans og textana, ekkert síður en Jón Ólafsson langafi minn sem orkti Máninn hátt... sem fólk syngur

[Ingibjörg Ingadóttir (IP-tala skráð) 18.1.2020 kl. 23:51]

Húsari, skáldið Vilhjálmur var ekki frá Skálholti, heldur SKÁHOLTI, sem er hús við Drafnarstíg í Vesturbæ Rvíkur. Jóhanna Kristjónsdóttir keypti þetta hús og bjó þar lengi.

[Húsari. (IP-tala skráð) 19.1.2020 kl. 04:27]

Sæll Ómar.

Nokkurs misskilnings
gætir hér í aths. 8
en það geta allir séð sem vilja
að þekktustu ritsjórar landsins
á fyrri tíð töluðu hiklaust um
Vilhjálm frá Skálholti,
skáldið er bjó að Skáholti við Drafnarstíg
í Reykjavík.

Þetta er orðaleikur sem menn höfðu í frammi
og þarf ekki að útskýra fyrir nokkrum manni.

[Húsari. (IP-tala skráð) 19.1.2020 kl. 10:39]

Sæll Ómar.

Betur fer á að segja

að Vilhjálmur hafi tekið sér þetta skáldanafn:

Vilhjálmur frá Skálholti.