Gæti þetta verið einföld ástæða: Of stutt á milli pedala?

Dularfullur en mögulegur galli á Tesla-bílum gæti stafað af öðrum orsökum en þeim að bílarnir gefi sér sjálfir inn. 

Rafbíll síðuhafa, Tazzari Zero örbíllinn, hefur nefnilega átt þetta til svo að jafnvel hafi orðið vægur árekstur úr í eitt skiptið, þegar bakkað var úr stæði. 

Það kom ekki að sök, því að afturhluti Tazzari bílsins er með mjúkt plast í ysta byrði, sem fjaðraði án þess að brotna.  Á hinum bílnum sást ekkert! 

En við skoðun eigandans hefur komið í ljós, að í þeim tilfellum, sem bíllinn hefur tekið upp á svonalöguðu, var það bílstjórinn sjálfur sem gaf bílnum inn afl þegar hann ætlaði sér að gera þveröfugt, að hemla.  

Þetta gerðist það oft á fyrsta ári bílsins, að hugsanlega getur svipað gerst á öðrum rafbílum. 

En ástæða þess að þetta sýndist vera bíllinn að verki var einfaldlega þríþætt: 

1. Rafhreyflar eru hljóðlausir, og þess vegna er þessi inngjöf afls svona lúmsk. Ef um eldsneytisknúinn bíl væri að ræða, myndi heyrast hressilega í vélinni. Eða að hann myndi hiksta og drepa á sér.  

2. Tog rafhreyfla nær yfir allt snúningssviðið alveg frá núlli og sé óvart snert við aflgjöfinni með fætinum, kippist bíllinn hressilega af stað og það drepst einfaldlega ekki á honum. 

3. Sé stutt bil á milli aflgjafarpedalans og hemlapedalans, getur það komið fyrir að stigið sé óvart á báða pedalana samtímis.  Við það kemur fát á ökumanninn, sem skilur ekkert í því afhverju bíllinn kippist áfram, og bregst ósjálfrátt þannig við að stíga af fullu afli á hemlapedalann, en gefa á sama tíma bílnum óvart fullt afl áfram. 

Einn annar ökumaður en síðuhafi hefur fengið að taka í Tazzari-bílinn og er sá hávaxinn og langfættur og notar skó af stóru númeri. 

Þrátt fyrir aðvörun fyrirfram steig hann óvart á báða pedalana í miðri ökuferð, en áttaði sig strax vegna aðvörunarinnar, sem hann hafði fengið. 

Sé ofangreint lykillinn að lausn þessa máls, er lausnin einföld: Að auka bilið á milli aflgjafarpedala og hemlapedala. 

P.S. Hugsanlega mætti útvíkka tölvuleg tengsl hemla og aflgjafar með búnaði, sem slæi út aflgjöfinni samastundis ef stigið er óvart á hana á sama tíma og stigið er á hemlapedalann. 

Skoða mögulegan galla í Tesla-bifreiðum