Farsóttir virða ekki landamæri.

Sjá má á netinu ýmsar athugasemdir varðandi afskiptasemi og ráðríki erlendra aðila á borð við ESB í kórónuveirumálinu, og íslensk yfirvöld átalin fyrir að taka við fyrirskipunum erlendis frá í málinu. 

Engu er líkara en sumir þessara gagnrýnenda haldi, að hver þjóð um sig eigi að "taka Trump á" málið og lýsa því einfaldlega yfir að veiran hafi þegar verið sigruð hér á landi og sé ekkert tiltökumál. 

En farsóttir virða ekki slíkar yfirlýsingar né landamæri og það er ekkert athugavert við það að til dæmis Danir nefni þau lönd þar sem gul viðvörun, minnsta viðvörun, eigi við. 

Og þeir skilgreina ekki aðeins Ísland á þennan hátt, heldur fleiri lönd. 

Sjálfir lýsum við Íslendingar yfir því að Ítalía sé mikið áhættusvæði gagnvart okkur og það rímar líka við nýjustu aðgerðirnar þar í landi, sem komu fram í fréttum kvöldsins. 

Danir skilgreina Ísland sem áhættusvæði

Athugasemdir

[Ómar Geirsson, 10.3.2020 kl. 07:02]

Blessaður nafni.

Ekki veit ég hvað hvöt rekur þig áfram til að skrifa þennan pistil, vona að það sé ekki lífsþreyta.

Þetta er rangt.

Kínverjar lokuðu á smitsvæði, það eru settu upp landamæri þar sem enginn fór á milli nema undir eftirliti.  Þeir eru að ná tökum á veirunni.

Singapúr setti strax hömlur á innflutningi á smiti frá sýktum svæðum, slógust svo við það veirusmit sem var komið.  Þetta er borgríki, gífurlega þéttbýlt en þeim hefur tekist að koma í veg fyrir smit í áhættuhópum.  Þeir fengu veirusmit frá Kína einna fyrstir, samt eru aðeins 160 skráð tilvik, þar 93 sem hafa fengið fullan bata.

Suður Kórea glímir við faraldur, en þeir rekja hann til afglapa kristins safnaðar þar sem haldið var leyndu að 2-4 safnaðarmeðlimir hefðu verið í Whuan, allavega einn kom með smit með sér, og náði að sýkja marga safnaðarmeðlimi.  Á meðan rótin var ekki þekkt, þá dreifðist vírusinn út í einni borg, en núna hafa þeir náð tökum á útbreiðslu hans.  Lykilatriði að stöðva innflutning á smiti.

Allt veirusmit á Íslandi í dag kemur frá skíðasvæðum Norður Ítalíu, með þessum örfáum undantekningum frá einu svæði í Austurríki.

Ef við hefðum gripið til sömu ráðstafana og Kínverjar gagnvart Hubei héraði, Singapúrar eða Suður Kórea, þá væru smit hér ennþá innan við 5.

Þetta eru staðreyndir nafni, og þú rífst ekki við staðreyndir.

Í þessu er ekkert sem útilokar að veiran finni sér ekki nýjar smitleiðir í framtíðinni, en hver vika sem landið er laust við þennan ófögnuð, er vika sem færir okkur nær sumrinu, og nær öruggri lækningu, því hún mun koma.

Þegar mannslíf eru annarsvegar, hver er efinn??

Kveðja að austan.

[Ómar Ragnarsson, 10.3.2020 kl. 08:03]

Pistillinn er einmitt skrifaður sem stuðningur við aðgerðir á borð við þær, sem þú nefnir, og andmæla þeim, sem reyna að gera eðlilegar ráðstafanir tortryggilegar með því að flokka sumar þeirra sem ofríki og afskiptasemi. 

Aðgerðir eru einmitt nauðsynlegar en innihaldslítið gaspur án aðgerða er til lítils. 

[Ómar Geirsson, 10.3.2020 kl. 11:55]

Sökin og misskilningurinn er þá minn nafni.

Landvættir verða kannski ekki eilífðir, en það er eilíf þörf fyrir þá.

Kveðja að austan.