Langnæsti nágranninn; 285 kílómetra leið yfir sundið.

Grænland er langnæsti nágranni Íslands; aðeins 285 kílómetrar frá Straumnesi yfir til Blossevillestrandarinnar handan Grænlandssunds, þar sem allt að 3700 metra háir fjallarisar gnæfa yfir jökulinn sem er næstum því 20 sinnum stærri að flatarmáli en allt Ísland og meira en 200 sinnum stærri en Vatnajökull.  

Grænland býr yfir gríðarlegum andstæðum, teygir sig sunnar, vestar, norðar og austar en Ísland.

Þegar verið er á hábungu jökulmiðjunnar sýnast samt allar leiðir liggja upp á við; það er eins og jökuflæmið bjagi sjóndeildarhringinn. 

Og yfirgengilega björt hvíta þessa risajökuls gerir það að verkum, að himinninn er ekki eins heiðblár og hann er á samsvarandi stað á miðjum Vatnajökli. 

Meðalhitinn í Tingmiarmiut á austurströndinni í júlí er aðeins um fjögur stig á sama tíma og meðalhitinn að degi til í Kangerlussuaq á svipaðri breiddargráðu á vesturströndinni er rúmlega 16 stig!   

Svo þurrt er á nyrsta hluta Grænlands, næst pólnum, að þar er auð jörð og enginn jökull. 

Grænland er yfirgengilegt; já, það ná engin orð yfir þennan stórkostlega nágranna, sem er svo nálægt okkur, að frá flugbrautinni gömlu í Aðalvík er styttra flug yfir til Grænlands heldur en til Hvolsvallar.  

Synti til Grænlands á tveimur vikum

Athugasemdir

[Halldór Jónsson, 19.5.2020 kl. 14:43]

Grænland er yfirþyrmandi stórkostlegt. Það ert eiginlega engin leið fyrir okkur meðalskussa að komast um það nema á þyrlum. Fjöllin og stærðin er þvílík. Ekki furða að Trump væri til í að kaupa það.

Það er til mynd á netinu frá byggingu Thule flugvallar. Mögnuð mynd.

Íslendingar gerðu vel í að efla tengslin við Grænland, sem er land möguleikanna.

[Björn. (IP-tala skráð) 20.5.2020 kl. 07:42]

Það merkilegasta við þessa frétt sem vitnað er í,er að selurinn Kári er með sporð og getur synt,jafnvel langar sjólengdir,það væri óskandi að fiskifræðingarnir hjá hafró læsu þessa grein og fræðast um leið.

[Sigurjón Hauksson (IP-tala skráð) 20.5.2020 kl. 10:52]

 Sem betur fer þá er Kári ekki með sporð!

[Björn. (IP-tala skráð) 20.5.2020 kl. 11:58]

Takk Sigurjón,hann er með hreifa,mín mistök.