Lýsandi að þurfi að bægja burt grun um eldfima rafbíla.

Í fréttu af óvenju tíðum bílbrunum að undanförnu má sjá, að ástæða er talin til þess að geta þess sérstaklega að þessi fjölgun sé ekki að kenna brunum í rafbílum.   

Þetta er alveg lýsandi í ljósi þess, að um langt skeið hafa verið á sveimi tröllasögur um það hve miklu hættulegri rafbílar séu varðandi brunahættu en bensín- eða dísilbílar. 

Hámarki náði þessi kvittur þegar rafbíl var kennt um bruna stærsta bílahúss Noregs, en það fregnaðist daginn eftir, að bensínbíll af gerðinni Opel Zaphira hefði valdið brunanum.   

Einnig vakti það umræður um eldhættulega rafbíla, þegar það barst út, að slökkviliðið á höfuðborgarsvæðinu hefði haldið sérstaklegar slökkviæfingar varðandi rafbíla. 

Samsvarandi æfingar hefðu ekki verið haldið vegna bíla knúmum eldsneyti. 

Í þeirri umræðu gleymdist alveg að geta þess, að vegna samfelldrar tilveru eldsneytisknúinna bíla væri langt um liðið síðan þörf hefði verið á slíkri æfingu, enda hefðu þeir á sínum tíma tekið við af hestum, sem búa yfir lítilli eldhættu. 

Eldur getur auðvitað komið upp í rafhlöðum og rafkerfum, en það eru líka rafkerfi í eldsneytisknúnum bílum, og orðin sem notuð eru mismuninn á þeim og rafbílum eru lýsandi:  

 

Eldsneytisknúinn. Rafknúinn.  

Eldsneytisgeymir. Rafgeymir. 

Brunahólf.        Rafstraumur. 

Brunahreyfill.    Rafmagnshreyfill. 

Sprengihreyfill.  Rafmagnshreyfill.  

Enda lauk umræðunni á sínum tíma með því að koma með niðurstöður rannsókna á eldsvoðum í bílum þar sem miðað var við eknar vegalengdir og eldur í rafknúnum bílum reyndist vera tíu sinnum fátíðari en í eldsneytisknúnum bílum. 

En kviksagan um að rafbílar búi yfir margfalt meiri eldhættu virðist lifa áfram,  fyrst það þarf að taka það fram um öldu bílbruna, að það séu ekki rafbílar, sem henni valda. 

 

„Tilviljanakenndar gusur“

Athugasemdir

[Vagn (IP-tala skráð) 20.8.2020 kl. 03:33]

"Enda lauk umræðunni á sínum tíma með því að koma með niðurstöður rannsókna á eldsvoðum í bílum þar sem miðað var við eknar vegalengdir og eldur í rafknúnum bílum reyndist vera tíu sinnum fátíðari en í eldsneytisknúnum bílum."  Tesla safnaði þeim gögnum og þar voru allir bílar knúnir bensíni bornir saman við Teslur. Teslur eru ekki ódýrir og óvandaðir bílar og það er leitun að mjög gamalli Teslu. Að nýjar Teslur brenni síður en gamlar bensíndruslur kemur engum á óvart. Það eina sem kemur á óvart er að menn sem vilja láta taka sig alvarlega skuli nota svona blekkjandi tölfræði og telja það hið besta mál. Hver ætli sé ástæða þess að ekki eru bornir saman brunar sambærilegra bíla? Fer þá glansinn af rafbílunum?

"En kviksagan um að rafbílar búi yfir margfalt meiri eldhættu virðist lifa áfram," ...Semsagt umræðunni lauk ekki við þennan undarlega samanburð, sumir hættu bara að hlusta og heyra og héldu það þess vegna.

[Benedikt V. Warén, 20.8.2020 kl. 17:27]

Ritstjórn Pressunnar
Föstudaginn 25. október 2019 19:00

Aðstandendur Omar Awan, 48 ára svæfingarlæknis í Flórída í Bandaríkjunum, hafa stefnt bílaframleiðendanum Tesla vegna dauða Omars í febrúar síðastliðnum.

Omar missti stjórn á bíl sínum, Tesla Model S, þann 24. febrúar síðastliðinn með þeim afleiðingum að hún endaði utan vegar. Omar slasaðist ekki alvarlega í árekstrinum; hann var með meðvitund, óbrotinn og ekki með innvortis meiðsli.

Eftir óhappið kom upp eldur í rafhlöðu bílsins en Omar gat sig hvergi hreyft. Dyrnar voru harðlæstar og þegar viðbragðsaðilar komu á vettvang gátu þeir ekki heldur komist inn í bílinn. Omar var löngu látinn þegar viðbragðsaðilum tókst að ná honum úr bílnum og var líkið raunar svo illa brennt að erfitt reyndist að bera kennsl á það.

Í stefnunni segir að Omar hafi dáið í „dauðagildru“ þegar eldurinn kom upp. Galli virðist hafa gert það að verkum að ekki reyndist unnt að opna bílinn eftir óhappið með fyrrgreindum afleiðingum.

Stuart Grossman, lögmaður fjölskyldunnar, segir við Newsweek að það sem geri málið sérstaklega sorglegt er sú staðreynd að Omar hafi valið Tesluna því hún taldi hana öruggari kost en aðrir lúxusbílar í svipuðum verðflokki, til dæmis Mercedes Bens.

https://www.dv.is/pressan/2019/10/25/segir-tesluna-vera-daudagildru-svaefingarlaeknir-komst-ekki-ut-ur-bilnum-og-brann-inni/