Tölurnar virðast birtast að meðaltali mánuði á eftir raunveruleikanum.

Það er athyglisvert, að þegar kortin yfir stöðu mála í kórónuveikinni eru skoðuð aftur í tímann, verður atburðarásin rökréttust sem miðað er við að tölurnar, sem birtast, spegli í raun ástandið eins og það var í raun 3-6 vikum fyrr. 

Afleiðingar stórra hópsmita eða bylgna í einstökum löndum komi fram allt að sex vikum eftir að orsakirnar áttu sér. 

Þegar þetta er skoðað sést líka hið mikilvæga, að áhrif breytinga á sóttvörnum koma fram að meðaltali um 3-4 vikum síðar; bylgja vegna slökunar á aðgerðum, en rénandi bylgja vegna harðnandi aðgerða. 

Þegar þetta er haft í huga ætti það að geta auðveldað öllum að líta raunsærra á ástandið hverju sinni og en ella væri og taka heilshugar þátt í aðgerðum.

Það er til dæmis athyglisvert hvernig lönd, sem virtust með lítið smit í gangi á sama tíma og þau færðust í vöxt hér á landi, eru nú ýmist komin fram úr okkur eða að nálgast okkur. 

Margir vildu að við tækjum þessi lönd í til fyrirmyndar á þann hátt að slaka verulega á. 

En nú sést betur, að þetta var hvergi nærri svona einfalt mál.  

Staðan er grafalvarleg víða í Evrópu

Athugasemdir

[Ómar Geirsson, 23.10.2020 kl. 21:29]

Blessaður nafni.

Það er bara vegna þess að þessir margir eru heimskir, skilja ekki neitt um veirur, smitleiðir þeirra, eða hvernig smit þeirra lúta veldisvexti.

Þessir margir fengu pláss í umræðunni vegna einbeittar ritstjórnarstefnu Morgunblaðsins og Fréttablaðsins, sem og þú hefur orðið var við háværa einstaklinga sem mæta um leið og þú tjáir þig kóvid og heimsfaraldurinn.

Allt rétt sem þú segir, en þetta var líka jafn rétt í sumar, í haust, eins og það er núna.

Ég sá á Moggablogginu áðan að ennþá fyrirfinnst þar maður sem vitnar í meintan árangur Svía, sem voru svo heppnir að veiran kom seint til þeirra og var þróttminni en í löndum eins og Spáni, Frakklandi, Ítalíu og Bretlandi, þar sem hún breiddi úr sér fyrr, og eru í dag að glíma við aukinn fjölda smita.

Margföldun fjölda smita.

Vil því vitna í Þórólf, þegar hann sagði þegar talsfólk sænsku leiðarinnar innan fjölmiðlastéttarinnar spurði hann um árangur eða stöðu Svía varðandi kóvid, þá sagði Þórólfur kjarna málsins;

Svíar hafa sloppið vel ennþá (dálítið skrýtið miðað var mannfallið þar) en það veit enginn hvernig þeir fara út úr næstu bylgju.  Ég vona hins vegar að þeir sleppi vel.

Því hver vill óska öðrum illvíga farsótt??

En í þessum orðum Þórólfs fólst að ekkert í aðgerðum sænskra sóttvarnaryfirvalda verndaði sænskan almenning, en hins vegar vissi enginn um hvar veiran yrði illvíg, eða mildari miðað við það sem óttast væri.

Það er eins með veiruna og lúpínuna, það tekur tíma að breiða úr sér, virðist jafnvel meinlaus í upphafi.  Það er eins og hún þurfi ákveðin grunnfjölda til að springa út.

En þegar það gerist, þá verður fjandinn laus.

Hann er laus í Evrópu í dag.

Kveðja að austan.