Menn hafa líka beinbrotnað í árekstri tveggja rafhjóla á hjólastíg.

Lögmál Murphys fjallar um að geti eitthvert fyrirbæri farið úrskeiðis á einhvern hátt, muni það gerast og það jafnvel fyrr en flesta gruni. 

Sé til dæmis hægt að skrúfa eitthvað skakkt saman muni það gerast. 

Þegar komnir voru fleiri en einn bíll á göturnar á Íslandi fyrir rúmri öld leið ekki á löngu þar til að fyrsti árekstur tveggja bíla varð.

Og var auðvitað fréttnæmur, því að slíkur árekstur hafði aldrei áður orðið í sögu landsins. 

Í ársbyrjun 2019 skullu tvö rafknúin reiðhjól saman, sem komu úr gagnstæðri átt á hjólastígnum á Geirsnefinu og axlarbrotnaði annar hjólamaðurinn. 

Tvær ástæður voru fyrir þessum sérkennilega árekstri, þar sem annar hjólamaðurinn fór skyndilega þvert í veg fyrir hinn. 

1. Sá sem beygði þvert fyrir hinn var að reyna að lesa niður fyrir sig á orkumæli hjóls síns. Það var hálfrokkið og hann sá ekki nógu vel á mælinn, en hafði reyndar láðst að athuga það fyrirfram að hægt var að hafa ljós á honum. 

2. Hann hafði á nokkrum kafla reynt að staðsetja hjólið með því að fylgjast með punktalínunni á miðju stígsins. Hún var hins vegar orðin máð að mestu vegna vanrækts viðhalds stígsins. Þessi ástæða var að sjálfsögðu aðeins meðvirkandi; hjólreiðamenn eiga auðvitað ekki að horfa beint niður fyrir sig á fullri ferð í umferðinni. 

Meðfylgjandi mynd er tekin af stígnum á Geirsnefi EFTIR að hann var málaður meira en ári seinna.

Síðuhafi var spurður eftir þennan árekstur hvort þetta sýndi ekki ljóslega að of hættulegt væri að hjóla á rafreiðhjólum. 

Svarið var það, að engin leið væri að varast svona uppátæki ökumanna yfirleitt. 

Ef valið stæði um það að mæta ökumanni reiðhjóls, sem væri að reyna að lesa niður fyrir sig við aksturinn á 20 km hraða -  

- eða að mæta ökumanni bíls á 80 km hraða, sem væri að lesa á snjallsímann sinn, - 

þá yrði rafreiðhjólið fyrir valinu.  

Eftir árekstur á fjölförnum hjólastíg fyrir sunnan Akureyri fyrir nokkrum misserum var greint frá því að ætlunin væri að breikka stíginn úr 2,5 metrum upp í 3, en stígurinn um Geirsnef er mjórri.   

Rákust saman á rafmagnsskútum