64 km stytting. Bratti úr 21% niður í 8%.

Leiðin yfir Öxi hefur falið í sér um 61-71 kílómetra styttingu þjóðleiðarinnar kringum landið miðað við Þjóðveg númer eitt. Nú hefur styttingin að vísu minnkað um 7 km eftir þverun Berufjarðar, en er samt geysimikil.   

Á myndinni sem birt er í viðtengdri frétt á mbl.is sést hvernig nýr malbikaður vegur getur leyst hinn gamla af hólmi og minnkað 21 prósent halla á núverandi malarvegi niður í 8 prósent, sem er sami halli og er í Kömbunum. 

Stóra spurningin fólst í því, hvernig Vegagerðin hyggðist leysa eitt vandasamasta verkið í íslenskri vegagerð, en það felst í því að búa til þann hluta nýs vegar sem lægi hina bröttu leið niður í Berufjörð og þarf helst að geta nýst sem heilsársvegur. 

Svo er að sjá af gögnum, sem birt voru á fjarfundi að þetta verði gert farsællega og var fróðlegt að sjá hvernig hönnuðir vegagerðarinnar gætu leyst það þarfa verkefni. 

Útboð sex milljarða Axarvegar kynnt

Athugasemdir

[Vigfús Ingvar Ingvarsson (IP-tala skráð) 4.2.2022 kl. 09:39]

Sæll Ómar

Mér sýnist myndin varla geta verið efst úr Skriðdalnum. Vegurinn er vinstra megin við ána á þeim slóðum. Er þetta ekki tekið þar sem komið er upp úr Berufirðinum?

Vigfús

[Ómar Ragnarsson, 4.2.2022 kl. 10:03]

Búinn að breyta textanum. Myndin er Berufjarðarmegin af því svæði þar sem vegurinn verður lagður snilldarlega til að leysa málið. 

[Hallgrímur Hrafn Gíslason, 4.2.2022 kl. 11:39]

Sæll Omar, það eru 54 km styttra að fara Öxi en Breiðdalsheiði, samkvæmt vegagerðinni

[Ómar Ragnarsson, 4.2.2022 kl. 12:37]

Þeir vegagerðarmenn nefndu sjálfir 61 og 71 km styttingar á hringleiðinni á fjarfundinum í morgun, og í pistli mínum stendur "hefur verið um 60 til 70 km styttra".  Nú hefur Berufjörður verið þveraður og sú stytting uppgefin sjö kílómetrar miðað við leiðina um Breiðdalsheiði. 

Réttara væri að miða styttinguna um við fjarðaleiðina, sem er öll malbikuð og miklu auðeknari en vegurinn um Breiðdalsheiði, og þá stendur það eftir að styttingin með Öxi verði 65 km, því að nýja leiðin á að verða kílómetra styttri en núverandi Axarvegur. 

Þetta er því eftir sem áður alveg einstaklega mikil samgöngubót.  

[Jónas Gunnlaugsson, 4.2.2022 kl. 12:45]

Slóð

Nýr Axar vegur mun spara 733 miljónir á ári, og borga sig upp á þremur til fjórum árum. Vegagerðin, fólkið, heldur áfram að spara sömu upphæð um ókomin ár. Veg yfir sprengisand norður, og austur í Kárahnjúka, strax.