Bob Zubrin var naskur fyrir meira en 20 árum um gildi Íslands vegna marsferða.

Alveg frá því fyrir aldamót hefur helsti talsmaður marsferða, Bob Zubrin, verið óþreytandi hvatamaður ferða til mars sem formaður alþjóðasamtaka áhugafólks um slíkar ferðir og jafnvel landnám manna á mars. 

Tímaritið Time var árið 2000 með vandaða aðalgrein og forsíðumynd sem lýsti eins ítarlega og hægt var hugmyndum manna þá um athafnir og framkvæmdir manna á mars. 

Fljótlega beindist athygli manna að Íslandi, sem eins konar æfingasvæði, og kom Zubrin í sérstaka kynnisferð til landsins þar sem hann átti fundi við Íslendinga og meðreiðarfólk bæði í Reykjavík og norður í Mývatnssveit. 

Meðal annars var flogið með Zubrin sérstaklega yfir Kverkfjöll og hann kom í stutt sjónvarpsvital í lok þeirrar ferðar. 

Var afar fróðlegt og eftirminnilegt að kynnast þessum frömuði á þennan hátt. 

Í framhaldi af Íslandsferðinni kom sendinefnd frá samtökunumm til Íslands þremur árum síðar og var þá fylgst með ferð hennar norður í Gjástykki þar sem skoað var hugsanlegt æfingasvæði fyrir marsfara framtíðarinnar. 

Ekki var síður áhugavert að hitta þetta fólk, sem var hámenntað einvalalið. 

Nú, rúmum tuttugu árum eftir að Time birti sína tímamótaumfjöllun, er flest af því sem þá kom fram og þótti næsta ótrúlegt, að koma fram á þann hátt, að Zubrin hefur verið framsýnn í meira lagi þegar hann fór í Íslandsferðina sína. 

Til dæmis var í fyrstu ekki alveg víst að Ísland yrði fyrir valinu, því að þá var verið að skoða fleiri möguleika, sem síðar kom í ljós að voru lakari en Ísland. 

Athafnir marsáhugafólksins hér á landi eru nú búnar að festa sig rækilega í sessi og sannast enn og aftur hve einstakt land okkar, einkum hinn eldvirki hluti þess, er á heimsvísu. 

Marsjeppi við Holuhraun

Athugasemdir

[Vagn (IP-tala skráð) 28.7.2022 kl. 13:09]

"Til dæmis var í fyrstu ekki alveg víst að Ísland yrði fyrir valinu, því að þá var verið að skoða fleiri möguleika, sem síðar kom í ljós að voru lakari en Ísland. ".    Lakari hótel, lakari matsölustaðir, lakara næturlíf. Það er alltaf gaman að ferðast til spennandi og framandi staða frekar en í sitt nærumhverfi, sérstaklega þegar einhver annar borgar.

[Ómar Ragnarsson, 30.7.2022 kl. 00:05]

Vagn er ljósárum á eftir því hugsjónafólki, sem kom til Íslands til að vinna að merkum rannsóknum. 

Zubrin kom ekki til landsins i einkaþótu og flaug ekki í könnunarskyni um landið á þyrlu, heldur á 25 ára gamalli fjögurra sæta eins hreyfils vél. 

Svipað var að segja um aðra í leiðangri Zubrins hvað snerti gististaði þar sem hverri krónu var velt fyrir sér og gist í heimagistingu.   

Fyrirlitning Vagns á þessu fólki ber vott um sérstaka tegund af vænisýki um næturlíf og sukk af þess hálfu.