Jarðeldarnir voru fljótir að svara fyrir sig.

Allt frá því að fyrst voru á þessari síðu leiddar líkur að því að nú kynni að vera hafið jafnvel margra alda tímabil eldgosa á Reykjanesskaga og þessu fylgt eftir í viðtali í Silfri Egils,  hafa komið fram gagnrýnisraddir á þessa sýn og það ekki síst í athugasemdum á síðunni.

Það var því skondið þegar slíkum andmælum var hreyft síðast í fyrradag í athugasemd og dregið í efa að nokkuð gysi meira næstu árin, að ákveðið svar jarðeldanna sjálfra skyldi koma nánast jafnharðan fram og raun ber vitni og vera jafn afdráttarlaust.

Hér á síðunni hafði verið bent á að nítján Kröfluelgos hefðu farið stækkandi í þau  níu ár sem liðu frá upphafi þeirra til enda, en í athugasemdum við þetta gert lítið úr þessum samanburði.  

Nú ætti kannski aðeins að sljákka í þeim sem hafa gert lítið úr jarðvísindamönnum okkar og  saka þá sífellt um um bull og ótímabæran æsing.  

Það sem gerir þeim auðveldara en fyrr að fjalla rétt og skilmerkilega um eldgosið nýja er hve fullkomin og altæk nýjasta mælingatækni er orðin.  

Upphafið að Fagradalsfjallseldum?

Athugasemdir

[Vagn (IP-tala skráð) 4.8.2022 kl. 01:54]

Fullkomin og altæk nýjasta mælingatækni dugar ekki alltaf til. Og það virðist varla líða mánuður án þess að einhver jarðvísindamaður komi ekki með yfirlýsingar og spár. Sumar rætast og aðrar ekki. Líkur segja eitt en eins og í fótbolta þá er niðurstaðan ekki örugg. Og orðalagið klukkustundum fyrir þetta gos er nokkuð lýsandi fyrir baktryggingu jarðvísindamanna og þessa fullkomnu og altæku nýjustu mælingatækni:  Komi til eldgos....Ef jarðhræringarnar á Reykjanesskaga leiða til eldgoss....telur líklegt að það fari að gjósa á næstu dögum, frekar en vikum....gæti það orðið kraftmeira....

Sem betur fer eru eldgos aðeins að meðaltali þriðja hvert ár en ekki í hvert sinn er jarðvísindamaður telur líkur á eldgosi.