Minnismerki um verkmiðjurnar, sem áttu að "bjarga Suðurnesjum."

Fyrir fjórtán árum fór fram einhver stærsta skóflustunguathöfn, sem haldin hefur verið hér á landi, í Helguvík skammt utan Keflavíkur. 

Þetta var löng röð af þáverandi ráðamönnum, fulltrúum sveitarfélaga á svæðinu, Norðuráls, orkusölum og ráðherrum úr ríkisstjórn Sjálfstæðisflokks og Samfylkingarinnar, sem röðuðu sér upp á lóð kerskála fyrir fyrsta áfanga komandi álvers.   

Herinn var farinn tveimur árum fyrr og við blasti auðn á Suðurnesjum, sem álverið átti að "bjarga", rétt eins og álver í Eyjafirði átti að "bjarga Norðurlandi" um 1990 þegar ekki var lengur hægt að framleiða þar vörur fyrir hin hrundu Sovétríki.  

Álverið nyrðra reis aldrei, en Akureyri stendur þó enn.

Á opnum fundi með fulltrúa Norðuráls 2009 játaði hann því, að kerskálinn, sem byrjað hafði verið á í Helguvík, yrði aðeins þriðjungur eða fjórðungur álvers af nauðsynlegri stærð, sem væri 360 þúsund tonna framleiðsla á ári. 

Til þess að standa við slík áform átti eftir að semja við rúmlega tug sveitarfélaga á leiðinni milli Helguvíkur og Skaftárhrepp um háspennulínur og virkjanir, en auðvitað var samningsaðstaða þeirra engin, því að þeim var öllum stillt upp við vegg í þessu máli með hinni glæsilegu skóflustunguhátið. 

Áður en ár var liðið frá hinni miklu skóflustunguathöfn var ríkisstjórnin sprungin og sömuleiðis blaðran öll, sem hátimbrað bankakerfið var. 

Eftir stóð nakin stálgrind kerskálans þráða, en áfram var þó þráast við að koma upp verksmiðju í staðinn heilmiklu kísilveri, sem orðið gæti mikill léttir fyrir alla í Reykjanesbæ. 

Nú virðist þetta eftir allan vandræðaganginn hafa snúist við, og í fyrirsögnum af þessu máli segir: "Mörgum er létt í Reykjanesbæ."  

Eftir standa þögul minnismerkin um versmiðjum, sem áttu að bjarga Suðurnesjum. 

 

 

Mörgum létt í Reykjanesbæ

Athugasemdir

[Vagn (IP-tala skráð) 2.12.2022 kl. 13:26]

"Mörgum" er sagt án þess að nokkur hafi kannað það.

Þegar hávær en fámennur hópur lagði upp með það að loka verksmiðjunni með öllum ráðum var fátt til varnar. Umhverfisstofnun átti til dæmis að drekkja í kvörtunum og skipti þá engu vindátt, hvort einhver starfsemi var eða hvar á jarðarkringlunni kvartandi var staðsettur. Íbúar þurfa því að greiða hæsta útsvar á landinu eitthvað áfram og treysta því að ekki fari fyrir ferðaþjónustunni aftur eins og í covid þegar atvinnuleysi var um 50%.

[Ragnar (IP-tala skráð) 2.12.2022 kl. 15:45]

Það alvarlegasta af þessu er fjárglæfrastarfssemi þeirra sem stýra lífeyrissjóðunum eins og bjánar og frekju valdhafa sem heimta að sjóðirnir taki þátt í alls konar bralli, sem oftast er glapræði fyrir eigendur eða áhætta sem slíkir sjóðir ættu alls ekki að taka þátt í.

Í stjórnunarstöðum hér og þar í brallinu er óhæft fólk eða glæpamenn.

Málið með Helguvík sýna þetta svart á hvítu.