SUV þýðir ekki "jeppi", heldur "Sport-Nytja-Farartæki", "SUV" á ensku.

Toyota Cross og fjöldi svipaðra bíla á okkar tímum minna svolítið á Subaru Leone aldrifsbílana sem komu á markað fyrir hálfri öld.  

Þeir voru með heilsoðna byggingu og aðeins aukna veghæð, og þar að auki með millikassa fyrir hátt og lágt drif. 

Fengu bílar af þessu tagi auk bíla á borð við Renault Espace og Dodge Caravan, sem voru aðeins með framdrif heiti í skilgreiningunni SUV, þ.e. sport utility vehicle. 

Heima á Íslandi datt ekki nokkrum manni í hug að kalla þessa bíla jeppa eða jepplínga. 

Tuttugu árum eftir upphafið skall á ein sterkasta tískubylgja í sögu bílaframleiðslu, SUV-æðið sem ekkert lát er á, heldur fer vaxandi.  

Bestu lýsinguna á þessu æði gaf maður, sem var nýbúinn að kaupa sér bíl, sem auglýstur var sem "fyrsti rafjeppi á Íslandi." 

Þegar honum var sagt að ekkert afturdrif væri á "jeppanum" og hann fenginn til að skoða aftur undir bílinn, leit hann hróðugur upp og sagði: "Það skiptir engu máli; það halda allir að þetta sé jeppi."

Reynsla flestra bílaframleiðenda er sú, að langflestir kaupendanna skeyta sig kollótta um það þótt afturdrifið vanti í "jeppanna" og er líklegast að sama gildi um Corolla-jeppann. 

Að vísu er hægt að fá hann búinn afturdrifi og hækkar hann ekkert við það, en verðið á honum hækkar um 8 þúsund evrur í Þýskalandi, eða sem svarar hátt á aðra milljón krónur. 

 

Toyota Corolla er orðin fullorðin

Athugasemdir

[Rafn Haraldur Sigurðsson, 16.1.2023 kl. 09:29]

Ég man að við kölluðum þessa aldrifsbíla slyddujeppa.

[Gunnar Heiðarsson, 16.1.2023 kl. 09:34]

Sæll Ómar. 

Þetta mál virðist vera að festast í okkar tungu, að kalla alla bíla sem skilgreindir eru sem SUV erlendis sem jeppa hér á landi. Þetta er leiðinleg málvilla.

Aldrei myndi ég kalla minn Discoveri jeppa. Frekar tala um nokkuð stórann og rúmgóðan station bíl, sem er þægilegur til ferðalaga. Hins vegar á ég alvöru jeppa, eða Susuki Vitara, gamlan og gróðann. 

Svo má auðvitað deila um hvort jeppi geti í raun verið annað en Jeep. Lennti í því fyrir nokkrum árum, í heimsókn til fjarskyldra ættingja í vesturheimi, afkomendur vesturfara, að segjast eiga jeppa. Þar ætti ég við Korando sem ég átti æ þeim tíma, jeppi sem sennilega komst næst því líkjast Jeep. Þetta vakti að vonum nokkrum ruglingi. En þetta er auðvitað önnur saga.

Hitt liggur alveg ljóst fyrir að svokallaðir SUV bílar og einnig Crossover bílar geta aldrei kallast jeppar, hvort heldur notast er við íslenska merkingu þess orðs eða ameríska.

Kveðja

[Aðalsteinn Geirsson (IP-tala skráð) 16.1.2023 kl. 13:40]

Dústra kemst meira en margur ,,SUV", hærra undir lægsta punkt en á flestum, hægt að velja framdrif eða fjórhjoladrif og læsa, og fyrsti gírinn er svipaður og 2. gír í lága drifinu á Lödu sport. Samt verður hann aldrei annað en vel útbúinn fólksbíll, eða ,,vúff".