ÁLVER HANDA ÖLLUM.

Atburðir síðasta sólarhring sýnir nauðsyn þess að sú draumsýn rætist að óslitin röð álvera blasi við erlendum ferðamönnum þegar þeir koma út úr Leifsstöð, - risaálver í Helguvík verði fyrsta mannvirkið sem blasi við þeim. Síðan er ótækt að jafn frumstætt sveitarfélag og Vogarnir taki við af Reykjanesbæ og nú hefur íbúafundur þar krafist álvers. Þótt Alcan reisi álver í sveitarfélaginu er fráleitt að álverið í Straumsvík verði lagt niður, þótt því hafi verið hótað til að hræða Hafnfirðinga til að knékrjúpa fyrir risaálveri þar.

Álverið í Straumsvík nýtur svo góðra kjara um orkuverð og er rekið með svo miklum hagnaði að auðvitað leggur eigandi þess það ekki niður. Og síðan væri upplagt að plata Hafnfirðinga, sem vildu ekki að álverið stækkaði til austurs, með því að stækka það til vesturs.

Hafnfirðingar neituðu því aldrei að álverið stækkaði í þá átt og því hefur verið lýst yfir að ekki verði rokið í atkvæðagreiðslu aftur, - í það minnsta ekki að frumkvæði bæjarstjórnarinnar.  

Af því að það hefur ekki fundist pláss fyrir álver í Reykjavík, því miður, verða erlendir gestir að þrauka ferðalagið í gegnum borgina með þá gulrót fyrir framan sig að tvær stórar og myndarlegar málmbræðslur blasi við þeim í staðinn þegar komið er inn í næsta sveitarfélag fyrir norðan höfuðborgina.

Þessar verksmiðjur þarf að hafa sem stærstar svo að tryggt sé að menn þurfi ekki að upplifa hinn mjög svo gamaldags Hvalfjörð með sínum krókótta vegi án þess að njóta nútíma tæknivædds útsýnis.   

Þótt röð háspennulína og virkjana eigi eftir að létt ferðamönnum lundina á leiðinni frá Leifsstöð alalt austur undir Landmannalaugar og láta þá sakna minna álveraleysisins í austurátt frá Reykjavík er ótækt að þeir stansi á útsýnisstað á Kambabrún án þess að sjá álver.

Sjá þarf til þess að risaálver sjáist sem víðast á Suðurlandi og kannski væri ráð að láta rætast gamla drauminn frá 1955 um hraðbraut um Þrengsli og Flóa þvert yfir Forirnar.

Þá væri tryggt að álverið sæist eins vel og unnt væri þegar komið væri niður í Þrengslunum og jafnframt von til að ná því takmarki síðustu aldar að ekkert votlendi verði eftir á Suðurlandi.

Draumavegurinn frá 1955 yfir Forirnar, þá slæmu vilpu, myndi þá rætast um síðir og Ísland komið í hóp iðnþróaðra ríkja.  

Alcan óskar framlengingar á samkomulagi við Landsvirkjun

Athugasemdir

[Gunnar Th. Gunnarsson, 21.6.2007 kl. 11:57]

Þessi áróðurstækni þín er ekki alveg nógu fínpússuð hjá þér til að hún virki, nema e.t.v. gagnvart afar illa upplýstum einstaklingum.

"....og nú hefur íbúafundur þar krafist álvers". (í Vogum) Var það ekki svakalega sniðugt að Hafnfirðingar fengu að kjósa um álver þar? Gildir eitthvað annað í Vogum?

[Árni Gunnarsson, 21.6.2007 kl. 12:32]

Álver í Þorlákshöfn yrði örugglega gífurleg auglýsing fyrir vatnsútflutning Jóns Ólafssonar þaðan.

Er ekki mögulegt að nota sömu flutningaskip? Þau flyttu súrál til Þorlákshafnar og svo neysluvatnið til baka! Þarna hygg ég að möguleikar um mikla hagræðingu séu í sjónmáli og vert að skoða málið af gaumgæfni.

[Tryggvi L. Skjaldarson, 21.6.2007 kl. 13:56]

Því miður Ómar, þá er það ekki fráleitt að Alcan loki álverinu í Straumsvík.  Það er  bara nokkuð líklegt og jafnvel fyrr en margur hyggur.  Þessi 40 ára gamla rúta stendst ekki lengi samkeppni við nýjustu módelin.  Spurning hvað Hafnfirðingarnir sem trúðu þér og öðrum sem héldu því fram að Alcan væri með  hræðsluáróður og kusu gegn stækkun hugsa núna?   

[Ómar Ragnarsson, 21.6.2007 kl. 14:19]

Ég trúi því tæpast að þeir Hafnfirðingar sem kusu gegn stækkun álversins telji það í lagi að stækka það frekar til vesturs en austurs. Ég held að margir sem kusu gegn stækkun hafi verið þeirrar skoðunar að best væri að álverið færi alveg í burt.

Um það er ekki gott að segja en með ólíkindum er hægt er að túlka atkvæðagreiðsluna á annan veg en þann að Hafnfirðingar kusu gegn stækkun.

Það er rétt að álverið í Straumsvík stenst ekki samkeppni við ný og hagkvæmari álver ef það þarf að borga sama orkuverð og nýju álverin borga í öðrum löndum.

En þannig er það ekki heldur fær álverið orkuna á útsöluverði og þess vegna gefur það Alcan nokkra milljarða í hagnað á hverju ári þótt það sé af gömlu gerðinni.

Ef þú ert með rútu sem er með sérsamning við olíufélögin um að fá eldsneytið á hálfvirði getur hún verið samkeppnisfær við nýtísku rútu þar sem þarf að borga fyrir orkuna í topp.

[Gunnar Th. Gunnarsson, 21.6.2007 kl. 17:15]

Afhverju kynnirðu þér ekki Ómar hvað stóriðja er að borga fyrir rafmagn í OECD löndunum áður en þú talar um útsöluverð? Ísland er þar í meðallagi.

Ef ekki væri fyrir rangfærslurnar og bullið, gæturðu eflaust orðið ágætis áróðursmeistari.

[Guðjón I. Guðjónsson (IP-tala skráð) 21.6.2007 kl. 17:17]

Kæri Ómar

Ég hnaut um þessa setningu:

"Síðan er ótækt að jafn frumstætt sveitarfélag og Vogarnir taki við af Reykjanesbæ og nú hefur íbúafundur þar krafist álvers."

Hvað þýðir "frumstætt sveitarfélag"? Er kannski týnda hlekkinn að finna í Vogunum :)

Kveðja, Gaui

[Anna (IP-tala skráð) 22.6.2007 kl. 09:38]

Tek undir með síðasta manni - hvað áttu eiginlega við með "frumstætt sveitarfélag".  Þú hljómar eins og þú sért að tala um eitthvað krummaskuð á hjara veraldar - hvernig væri að skreppa þangað og skoða bæinn - það tekur tæpan hálftíma að fara þangað.  Það er jafn mikið lýðræði í því fólgið að Vogabúar kjósi með álveri eins og að Hafnfirðingar kjósi á móti.

[Kári Gautason, 27.6.2007 kl. 21:22]

,,Afhverju kynnirðu þér ekki Ómar hvað stóriðja er að borga fyrir rafmagn í OECD löndunum áður en þú talar um útsöluverð? Ísland er þar í meðallagi."

Hvernig væri að sýna einhverjar heimildir fyrir þessu með raforkuverðið?