JÓLAKÖTTURINN Á SPÁNI.

Ósk Eiðs Smára Guðjonhsen um þá jólagjöf að fá að spila leikinn við Real Madrid rættist ekki. Þjálfari liðsins reyndist vera Jólakötturinn sjálfur sem Eiður lenti í. En kannski var það ekki það versta sem gat komið fyrir Eið því að nú hneykslast spánskir sparkspekingar á þessu framferði Rijkards og benda á það hve þeir voru slappir sem voru valdir í stað Eiðs.

Athyglisverð er úttekt í blaði á því hve lengi þeir tíu miðju- og framlínuleikmenn Barcelona sem til greina koma, hafa spilað á leiktíðinni. Þá kemur í ljós að aðeins tveir hafa verið valdir oftar í byrjunarliðið og spilað lengur.

Þessi niðurstaða er alveg á skjön við þá mynd sem hér á landi hefur verið dregin upp af stöðu og gengi Eiðs hjá liðinu og einhvern tíma hefði maður látið segja sér það tvisvar að Eiður væri talinn eiga frekar að hafa verið inni á vellinum í þýðingarmiklum leik en sjálfur Ronaldinho.

Þetta sýnir að Eiður hefur alveg staðið fyrir sínu í keppni við gríðarlega góða knattspyrnumenn um að komast í byrjunarlið þessa meistarliðs sem nú hefur fatast flugið að manni skilst vegna þess að félagar Eiðs eru ekki í góðu formi þessa daga þegar hann blómstrar.

Eiður á heiður skilinn fyrir þrautseigju sína og vilja og verðskuldar góðar jólakveðjur frá aðdáendum sínum hér heima á klakanaum.

Rijkaard gagnrýndur fyrir að velja Deco umfram Eið Smára

Athugasemdir

[Björn (IP-tala skráð) 25.12.2007 kl. 02:06]

Hann Eiður greyið fær oft að spila en þá er það yfirleitt þannig að hann fær bara seinustu 20 mínóturnar. En annars er ég alveg sammála þér að hann á fyllilega skylið að vera í þessu liði en mér finnst samt eithverneginn alltaf eins og hann gæti verið betri eithverstaðar annarstaðar. En það er bara ég og ég veit ekki mikið.

[Túrilla, 25.12.2007 kl. 07:24]

Þarna er ég hjartanlega sammála þér. Fannst synd og skömm að hafa strákinn ekki með.
Gleðileg jól til þín og fjölskyldu þinnar. Megið þið hafa það sem allra best í framtíðinni.

[Gyða Björk Jónsdóttir, 25.12.2007 kl. 11:52]

Sammála.  Hann á allt gott skilið bæði á sigurbraut og eins þegar illa gengur.  Er frábær knattspyrnumaður.

[Gunnar Freyr Rúnarsson, 25.12.2007 kl. 14:55]

Ég held að Rijkaard hafi ekki þorað að setja Ronaldinho á bekkinn í sjálfum EL-Clasico.  Held að liðið spili mun hraðar með Eið í liðinu.  Eiður verður bara að bíða eftir tækifærinu á Bernabeu (heimavelli Real) í vor.  Hef enga trú á því að Eiður fari í annað lið í janúar.  Jólakveðja Gunz

[Benedikt V. Warén, 25.12.2007 kl. 15:13]

Jólakötturinn á Egilsstöðum óskar þér og þínum gleðilegra jóla og farsæls nýs árs. 

[Þ Þorsteinsson, 25.12.2007 kl. 16:08]

Gleðilega hátíð Ómar .

Þetta minnir mig svolítið á myndina sem ég horfði á með minni ástkæru konu á stöð 2 áðan  um sönnun að jólasveinn væri til.

Rijkaard hefur sennilega ekki nálgast valið á sýnum hópi í anda jólanna.

[Þorfinnur Ómarsson (IP-tala skráð) 26.12.2007 kl. 14:51]

Eiður Smári er einfaldlega besti keppnisíþróttamaður Íslandssögunnar. Punktur. Alveg með ólíkindum að hann skuli aðeins tvisvar hafa verið valinn íþróttamaður ársins. Árið 2003 var gengið framhjá honum með óútskýrðum dylgjum um að hann væri "ekki nógu góð fyrirmynd". Á sama tíma stóð hann af sér samkeppni nokkurra bestu framherja heims; s.s. Adrian Mutu og Hernán Crespo. Og í fyrra átti hann stórkostlegt ár: varð Englandsmeistari með Chelsea, síðan keyptur til besta félagsliðs heims á þeim tíma, Barcelona, hvar hann lék sig inní liðið og skoraði 5 mörk í sínum fyrstu 9 leikjum, sbr. þessa grein í Vísi: http://www.visir.is/article/20071218/IDROTTIR0103/71218001/-1/IDROTTIR

Takið sérstaklega eftir þessari klausu hér:

"Hann byrjaði vel á sínu fyrsta tímabili. Hann skoraði eftirminnilegt mark aðeins fjórtán mínútum eftir að hann kom inn á sem varamaður í sínum fyrsta deildarleik með Barcelona. Eiður Smári skoraði glæsilegt mark sem reyndist sigurmarkið í 3-2 útisigri á Celta Vigo.

Alls skoraði hann fimm mörk í fyrstu níu deildarleikjum sínum með Barcelona. Hann kórónaði svo góða byrjun á tímabilinu með því að skora í 2-2 jafnteflisleik gegn sínum gömlu félögum í Chelsea í Meistaradeildinni. Hann skoraði einnig gríðarlega mikilvægt mark gegn Werder Bremen í desember í fyrra sem tryggði Börsungum sæti í 16-liða úrslitunum."

Státar einhver íslenskur íþróttamaður af öðrum eins árangri?? - með fullri virðingu fyrir Guðjóni Val, sem átti stórkostlegt ár sem handboltamaður...

[Ragnheiður Guðjohnsen (IP-tala skráð) 27.12.2007 kl. 15:22]

Mikið er ég sammála og glöð að heyra að við eigum jákvæða íslendinga enn þá. Þakklát fyrir þetta, svona eigum við íslendingar að vera,  í einingu og standa saman, standa með okkar manni og hvetja hann. Vera þakklát fyrir það sem að við eigum.

Megi Guð blessa þig ríkulega.

[Ómar Ragnarsson, 29.12.2007 kl. 23:27]

Ég er sammála því að Eiður Smári sé settur skör lægra en hann á skilið og hefði átt að vera valinn íþróttamaður ársins oftar. Það er að mínum dómi hins vegar vafasamt að telja hann besta keppnisíþróttamann Íslandssögunnar.

Má ég minna á að Örn Clausen var þriðji besti tugþrautarmaður heims í þrjú ár og eini Íslendingurinn sem hefur átt heimsmet (með þremur öðrum) í frjálsum íþróttum. Einnig að Villhjálmur Einarsson jafnaði gildandi heimsmet í þrístökki og er eini Íslendingurinn sem hefur fengið silfurverðlaun á Ólympíuleikum.

Gunnar Huseby varð tvívegis Evrópumeistari í kúluvarpi og Haukur Clausen átti besta tímann í 200 metra hlaupi í Evrópu árið 1950 og setti Norðurlandamet sem stóð í þrettán ár.

Albert Guðmundsson varð bæði Ítalíu- og Frakklandsmeistari í knattspyrnu og Ásgeir Sigurvinsson var valinn besti leikmaður Vestur-Þýskalands.