Áfram, Lára Hanna !

Lára Hanna Einarsdóttir hefur sýnt stórkostlegt fordæmi að undanförnu með skeleggri baráttu sinni gegn Bitruvirkjun. Þetta er nákvæmlega það, sem okkur hefur vantað, nýtt og öflugt baráttufólk. Þegar brautryðjendur eins og Guðmundur Páll Ólafsson hafa verið nógu lengi að er þeirra góða barátta afgreidd sem þráhyggja og þeir sjálfir sem kverúlantar.

Virkjanafíklarnir hafa nýtt sér yfirburði fjármagns, valda og aðstöðu til að sækja fram á svo mörgum stöðum og jafnfram svo hratt, að þeir hafa komið sínu fram. Við þurfum fólk í forystu á hverjum stað á borð við Láru Hönnu, fólk sem þorir, fólk sem tekur af skarið.

Bitruvirkjun er ekki aðeins fráleit hugmynd hvað snertir fórn á náttúruverðmætum. Hún er líka fráleit þótt engin slík verðmæti væru í veði, vegna þess að nýting Hengils- Hellisheiðarsvæðisins er þegar komin fram úr allri skynsemi og svæðið verður allt orðið dautt og kalt eftir nokkra áratugi, einmitt þegar okkur á eftir að vanta þetta afl til að knýja flota rafbíla og skipa.

Þessi virkjun er ofbeldi gagnvart afkomendum okkar.

Áfram, Lára Hanna!

Athugasemdir

[Gunnar Th. Gunnarsson, 13.5.2008 kl. 16:37]

Líkurnar á því að svæðið verði orðið dautt og kalt eftir nokra áratugi eru "óverulegar" eins og segir í matinu á umhverfisáhrifunum.

Svo er náttúrulega einkennilegt að þetta skuli vera ofbeldi gagnvart afkomendum okkar þegar þau svæði sem mest er hampað af Láru Hönnu eru töluvert frá virkjuninni. Svæðið á áróðursplakati Láru, fyrir ofan Hveragerði verður áfram óraskað. Virkjunin verður ekki sýnileg þaðan og í sambandi við hávaðann frá borholunum, þá segja  mótmælendur virkjunarinnar, að hann verði óbærilegur og að ólíft verði í Hveragerði vegna brennisteinsvetnismengunar 70 daga á ári. Þessu er slegið fram sem staðreyndum án þess að það sé rökstutt frekar.

Svo er það einkennilegt að þessi dökka mynd sem dreginn er upp, skiptir svo greinilega engu máli, því ef okkur vantar rafmagn á bíla, eins og þú talar um, þá er allt í lagi að virkja þarna.

[Ómar Ragnarsson, 13.5.2008 kl. 21:14]

Ég tel alls ekki allt í lagi að virkja þarna, heldur ætti nú að láta staðar numið og eiga Hverahlíð og Þrengslin eftir til góða þegar svæðið kólnar. Ég hef upplýsingarnar um kólnunina frá Sveinbirni Björnssyni, Grími Björnssyni og Stefáni Arnórssyni. Sömuleiðis ströng aðvörunarorð frá Jóhannesi Zoega, fyrrverandi hitaveitustjóra.

[Snorri Sigurjónsson (IP-tala skráð) 14.5.2008 kl. 09:52]

"Lára Hanna Einarsdóttir hefur sýnt stórkostlegt fordæmi að undanförnu með skeleggri baráttu sinni gegn Bitruvirkjun."

Ég tek heilshugar undir þessi orð þín Ómar um hana Láru Hönnu.  Hún hefur með einstökum og vel rökstuddum hætti vakið marga til umhugsunar í umhverfismálum að undanförnu og aðdáunarvert að fylgjast með hvernig hún hefur af einskærri hugsjón og fórnfýsi verið málsvari einstæðrar náttúru.  Oft hef ég dáðst að áralangri náttúruverndarbaráttu þinni og dugnaði við að sýna þjóðinni hversu mikið er í húfi fyrir okkur og komandi kynslóðir.  Margir hafa lagt hönd á plóg  en hér þarf að beita rökum og það hafi þið Lára Hanna svo sannarlega gert.  Með þrotlausu starfi margra virðist fólk, smátt og smátt, vera að átta sig á hvert stefnir, en því miður vilja verndunarsjónarmiðin víkja þegar skammtíma gróðahyggja og von um atkvæði blinda.  Einmitt þess vegna og vegna þess að kjörnir fulltrúar okkar á Alþingi eru allt of margir haldnir þessari blindu, vanmeta óspillt náttúruauðæfi og hafa oftrú á stóriðju, þá veitir okkur ekki af að standa saman.  Áfram Lára Hanna !

[Petra Mazetti (IP-tala skráð) 14.5.2008 kl. 10:18]

Virkjunin verður sýnileg frá 7 stöðum af þeim sem eru á veggspjaldinu. Hinar 6 myndirnar eru úr Reykjadal og Klambragili og ef maður ætlar að ganga frá Ölkelduháls í Reykjadal eða kemur gangandi úr Innstadal á leiðinni þangað svo að eitt dæmi sé tekið, þá hefur maður gott útsýni yfir virkjunina á leiðinni - öræfatilfinningin þar með farin.

[Gunnar Th. Gunnarsson, 14.5.2008 kl. 12:07]

Þetta er villandi fullyrðing Petra. Myndirnar og svæðið sem hampað er, hverirnir og jarðmyndanirnar sem sýndar eru í nærmynd, eru það langt fyrir neðan virkjunina, að þær sjást ekki. Myndirnar sem teknar eru í átt að Reykjadal, þar sem hann sést í fjarska, eru teknar ekki fjarri virkjunarstaðnum.

[Gunnar Th. Gunnarsson, 14.5.2008 kl. 12:29]

Það er merkilegt að náttúruverndarsinnar skuli fá "öræfatilfinningu" fyrir þessu svæði, steinsnar frá fjölfarnasta þjóðvegi landsins, á sama tíma og þeir mótmæla að gerður sé heilsárs vegur yfir Kjöl, því það eyðileggi mörg þúsund ferkílómetra svæði. Og það þó einungis sé verið að byggja upp veg sem fyrir er!

[Bjartur (IP-tala skráð) 14.5.2008 kl. 19:02]

Já, það er gott að vera vitur eftir á.  En það er líklega fátt hægt að gera varðandi Suðurlandveg héðan af.  Finnst það hinsvegar ekki, sem slíkt, réttlæta frekari aðgerðir á svæðinu.  Finnst mér svolítið eins og væri verið að réttlæta glæp, með glæp.  Eða hvað?

Sama hvað fólk kýs að kalla það finnst mér þær forsendur; að í lagi sé að raska meira því þegar hafi verið raskað í fortíðinni, heldur ómálefnalegar.  Ekki svo að skilja að ég sé endilega dómbær á gefnar forsendur.

[Leifur Þorsteinsson, 15.5.2008 kl. 10:10]

Hvað er þetta með ykkur virkjunarandstæðing þið fynnið

virkjunum allt til foráttu, sem þýðir bara eitt, meiri brenslu

á kolvetnum., ÞIÐ HLJÓTIÐ AÐ VERA Á MÁLA HJÁ OLÍU

FÉLÖGUNUM eins og þessium náttúrusinnum er svo tamt að

segja um þá sem ekki eru sama sinnis og þeir.