Vítaspyrna er fast leikatriði, ekki satt?

Vítaspyrna er eitthvert einfaldasta fasta leikatriðið í knattspyrnu. Maður hefði haldið að varnarmenn röðuðu sér þannig við teiginn að þeir ættu sem mesta möguleika á að ná frákastinu, ef markmaður verði. En, nei, það gerðu varnarmennirnir íslensku ekki nú fyrir fáum mínútum. Þeir stóðu þrír í hnapp öðrum megin í teignum og skildu mestallan teiginn eftir handa Skotum.

Þegar Kjartan Sturluson varði, voru allir íslensku varnarmennirnir víðsfjarri frákastinu og Skotar gátu keppst um það að ná boltanum og skora.

Þetta var grátlegt, fram að þessu hafði íslenska liðið staðið sig mjög vel að mínum dómi og sótt nær látlaust í upphafi hálfleiksins.  

Skotar unnu nauman sigur

Athugasemdir

[Ómar Ragnarsson, 10.9.2008 kl. 20:25]

Nú er leiknum lokið og Íslendingar voru grátlega nærri því að ná jafntefli, því að þeir áttu það mikið í leiknum og uppskáru mark, sem hefði orðið verðskuldað jöfnunarmark, hefðu menn ekki sofið á verðinum rétt á undan og á meðan vítaspyrnan örlagaríka var tekin.

[Haraldur Bjarnason, 10.9.2008 kl. 21:12]

Sammála þér Ómar. Það var grátlegt að tapa þessum leik. Strákarnir voru miklu meira með boltann en Skotarnir og spiluðu betur. Þessi tvö mörk voru hrein slys. Kristján stóð sig vel en erfitt að saka hann um þetta víti á hálum vellinum. Hann fórnaði sér bara en þessi lélegi dómari dæmdi þó rétt þarna, þetta var víti. Rétt hjá þér, það var eins og strákarnir gerðu ekki ráð fyrir frákastinu á boltanum. Óli Jóh. er á réttri leið með þetta lið og ég held að næstu úrslit eigi eftir að koma óvart.

[S. Lúther Gestsson, 10.9.2008 kl. 23:12]

Auðvitað koma upp atvik í leik sem þessum sem leikmenn missa einbeitninguna. Enn þetta er gjörsamlega óafsakanlegt hjá atvinnumönnum. Þeir hreinlega áttu aldrei von á því að Kjartan myndi verja spyrnuna og svoleiðis hugsa menn bara ekki um sína eigin samherja.

[Gunnar Th. Gunnarsson, 11.9.2008 kl. 00:10]

Ótrúlegur sofandaháttur í vítinu og reyndar einbeitingarleysi í ca 4 atvikum. Annars flottur leikur hjá þeim, einn sá besti í langan tíma.

[Grétar (IP-tala skráð) 11.9.2008 kl. 09:14]

Ef að sé og ef að mundi

átján lappir á einum hundi.

Ef að mundi og ef að sé

átján fætur á einu fé.

Það er nú sjaldnast hægt að taka einstök atvik út úr þó svo auðvitað séu sum afdrifaríkari en önnur. Eins og brotið hans Kristjáns. Mér fannst hvorugt liðið vera að skapa sér áberandi mikið af færum í leiknum og í nokkrum tilfellum vorum við ansi heppnir í vörninni. Dómgæslan var "óvenjuleg" oft á tíðum en ég held að það hafi á hvorugt liðið hallað. Annars sammála þjálfaranum að betra liðið hafi tapað.