Framararnir! Frækið lið!

Það er stutt síðan ég skrifaði bloggpistil með þessari yfirskrift, en það var þegar Fram vann FH og hleypti öllu í uppnám í deildinni. Þá héldu sumir að Fram hefði með þessu gagnast Keflvðíkingum einum, því enginn bjóst við að Fram gæti unnið tvö efstu liðin í deildinni og allra síst á lokasprettinum þegar toppliðin tjölduðu öllu sem til var.

En auðvitað gerði Fram ekki upp á milli toppliðanna heldur vann þau bæði og réði þar með úrslitum á toppnum auk þess að tryggja sér Evrópusæti.

Hvílík umskipti frá undanförnum áratug!

Keflvíkingar geta ekki sakað Framara um að hafa unnið með FH-ingum með frammistöðu sinni í dag fremur en FH-ingar voru súrir yfir því að Framarar tóku upp á því að vinna þá um daginn.

Sem Framari síðan ég var enn ófæddur óska ég mínum mönnum til hamingju með frábæran endasprett og karakter og vísa til baráttusöngsins sem ég birti um daginn.  

FH Íslandsmeistari 2008

Athugasemdir

[Elías Guðmundsson (IP-tala skráð) 28.9.2008 kl. 07:59]

Ómar minn árangur Frammara er ofar vonum, en hefði nú ekki verið drengilegt að óska FH til hamingju með titilinn svona í leiðinni ?

[B.N. (IP-tala skráð) 28.9.2008 kl. 11:11]

Ég fór á leikinn í gær eftir fyrsta markið í leiknum sem Keflavík skoraði nema eftir hálfleik var eins og andlega hliðin hafi gefi sig hjá strákunum. Þeir hreinlega þoldu ekki álagið að verða Íslandsmeistarar eftir nokkrar mínútur og því gat Fram kláraði leikinn mjög létt.

Baldvin Nielsen, Reykjanesbæ

[Jóhann Páll Símonarson, 28.9.2008 kl. 12:04]

Heill og sæll Ómar.

Ég tek undir með þér þessi árangur sem þjálfari Fram hefur skapað léttleika og leikgleði leikmanna og gífurlegan kraft sem þetta lið hefur spilað í síðari umferð. Ég sem Frammari og fyrrverandi leikmaður varð klökknaði þegar Keflavíkingar skorðuð fyrsta markið þá hélt ég hreinlega að við værum búnir að tapa. Því ég var búinn að segja það áður að ég væri að fara til Keflavíkur að sjá mitt lið fagna Evrópusætinu. Enn viti menn síðan verður skipting Almar Ormarsson þessi knái piltur kemur inná og var ekki lengi að jafna leikinn. 

Eftir það varð of mikil spenna hjá mótherjum okkar og Framarar skoruðu enn og aftur og sigruðu 2-1. Fagnaðarlætin í leikslok var gífurleg meðal stuðningsmanna og leikmanna, sem sungu með leikmönnum. Leikurinn var góður á hálfu beggja liða sem börðust hetjulega á blautum vellinum. Keflvíkingar voru óheppnir að sigra ekki deildina enn FH urðu Íslandsmeistarar eftir æsispenandi keppni. Til Hamingju FH.

Framarar til hamingju með ykkar frábæra árangur.

[Hörður Hilmarsson (IP-tala skráð) 28.9.2008 kl. 12:11]

Innilega til hamingju, Ómar og aðrir Framarar með fína frammistöðu og góðan árangur í Landsbankadeildinni 2008.
Með Vals- og fótboltakveðju
Hörður Hilmarsson

[S. Lúther Gestsson, 29.9.2008 kl. 00:30]

Ég hef sagt það áður að ég skil eiginlega ekki hvaðan þetta Fram lið kom. Það var aldrei neinn að tala um Fram, þeir voru bara svona einhverstaðar og enginn veitti þeim einhverja sérstaka athygli. Svo bara koma þeir og taka Evrópusætið af okkur KR- ingum?

Og allir eru jafn hissa á af hverju Fram tekur 3 sætið, menn fóru bara að líta á töfluna fyrir síðustu umferð. Það man varla neinn eftir að hafa spilað við þá.

Skiljanlegt af hverju við KR ingar veittum þeim enga sérstaklega athygli, við unnum þá 2x 2-0 í sumar svo ekki voru þeir mikið fyrir okkur þá.

Enn já, já til hamingju FH og OK...til hamingju Fram. 

[Gunnar Th. Gunnarsson, 29.9.2008 kl. 00:48]

Þorvaldur Örlygsson, (föðurbróðir Almars, þess er jafnaði) er magnaður þjálfari. Hann þjálfaði lið Fjarðabyggðar í fyrra með frábærum árangri.

[Ómar Ragnarsson, 29.9.2008 kl. 03:02]

Ég biðst afsökunar á því að óska FH ekki til hamingju með verðskuldaðan titil. Það kom í ljós, sem ég minntist á fyrr í sumar, að það var ómetanlegt fyrir þá að vera með besta bekkinn í deildinni, það er, mestu breiddina í leikmannahópnum.

FH bjó við hefðina en Keflvíkingar ekki. Þeir Suðurnesjamenn koma til leiks næsta sumar reynslunni ríkari og vonandi kemur sá tími að endurvakinn verði ljóminn sem geislaði af ÍBK í kringum 1970 þegar Guðni Kjartansson og Einar Gunnarsson voru kjölfesta landsliðsins og Rúnni Júl brilleraði þann stutta tíma sem honum gafst vegna stöðu hans í popptónlistinni.

Og vel á minnst - Rúnar er sá leikmaður að okkur bræðrum mér og Jóni frátöldum, sem á að baki feril hjá Stjörnuliði mínu alveg frá upphafi fram á þennan dag. Hann verður aldrei seldur.