Véfrétt sem getur þýtt margt.

Einhver ástæða hlýtur að vera fyrir sérstakri yfirlýsingu Century Aluminium um að verið sé að "yfirfara áætlanir um álverið í Helguvík". Athygli vekur að gengi hlutabréfa fyrirtækisins hefur rýrnað um meira en 80% síðan í maí. Heimsmarkaðsverð á áli stefnir enn niður á við. Og þá er að fara að giska á hvað liggi að baki.

Kannski það sama og hefur gerst ítrekað áður, bæði á Reyðarfirði, Bakka og í Straumsvík: Því miður kemur í ljós í næstu yfirlýsingu fyrirtækisins að álverið verði ekki hagkvæmt nema það verði tvöfalt stærra en nú er áætlað. Les: Virkja í Kerlingafjöllum og/eða á Torfajökulssvæðinu.

Eða: Nú eru erfiðir tímar og þið verðið að liðka fyrir okkur á alla lund og betur en áður var inni í myndinni. Eða: Ef þetta heldur svona áfram niðurávið hjá okkur verðum við að fresta framkvæmdum og sjá til hvort rofi til.

Og þá er spurt á móti: En varla ætla þeir að fresta neinu úr því þeir tiltaka sérstaklega hvað álverið verði gott og einnig hvað það sé nauðsynlegt að reisa það í þágu gjaldþrota þjóðar?

En svarið við þeirri spurningu gæti verið að með þessu séu þeir aðeins að rökstyðja enn frekar að við eigum enga aðra völ en að ganga að hvaða afarkostum sem okkur eru settir, - annars verður ekki reist álver í Helguvík.

Það er sama aðferð eins og notuð var vegna áforma um stækkun álversins í Straumsvík fyrir einu og hálfu ári. Þá var gefið í skyn, að ef ekki yrði samþykkt að fara með álverið upp í 460 þúsund tonn á ári myndi það einfaldlega verða lagt niður.

Þá rétt tókst að stöðva það ferli en nú er mótstaðan minni þegar "hnípin þjóð í vanda" á í hlut.

Fer yfir áform um Helguvík

Athugasemdir

[Gunnar Th. Gunnarsson, 21.10.2008 kl. 23:32]

"In the current environment, we have ceased making any new capital commitments and are reducing project spending".

"Construction continues at the company's greenfield smelter project at
Helguvik, Iceland".

Þannig að það er ljóst að þeir eru ekki að skoða aðra staði fyrir starfsemi sína og þeir ætla að halda ótrauðir áfram hér, en með öllum hugsanlegum hagræðingaraðgerðum.

Ég held að það sé alveg sama hvað þeir hefðu sagt, það er alltaf hægt að túlka allt á versta veg, ef menn eru þannig innstilltir. En eigum við bara ekki að bíða og sjá hvað liggur í farvatninu?

[Ómar Ragnarsson, 22.10.2008 kl. 00:34]

Jú, jú, auðvitað skulum við bíða og sjá til. En það er alltaf gaman að geta sér til um hlutina, einkum þegar tilgáturnar í svipuðum tilfellum áður hafa reynst réttar.

[Nína S (IP-tala skráð) 22.10.2008 kl. 01:22]

Æ, Ómar minn

Af hverju kemur ekki þitt blað inn um póstkassann minn? Af hverju geristu ekki rannsóknarblaðamaður án æsifréttastíls? Rödd þín þarf að heyrast víða og alltof margir eru ekki með netið, t.d. eldri borgarar margir hverjir. Þú hefur látið þjóðmálin til þín taka, sérstaklega umhverfismálin. Hitt er svo annað, að mörg önnur mál hljóta að brenna á jafnárvökulum manni. Og þú sem vilt fá svör, raunveruleg svör, og trúlega að eðlisfari afar forvitinn. Mig grunar að þú sért í tvíburamerkinu. Er það vitleysa. Mér er sagt að tvíburar vilji fá skýr svör - engar refjar. Kveðja. 

[Bjarne Örn Hansen (IP-tala skráð) 22.10.2008 kl. 06:25]

Minnir mig á gamla barnabók, sem var lesin upp fyrir okkur börnin hér áður.  Man ekki söguna, en að mig minnir þá gekk út á að ekki skyldi setja öll eggin í sömu körfu.

[Sævar Helgason, 22.10.2008 kl. 10:07]

"Ef þetta heldur svona áfram niðurávið hjá okkur verðum við að fresta framkvæmdum og sjá til hvort rofi til."

Er þetta ekki líklegasta skýringin... ?   Það finnst mér.

[Þorsteinn Briem, 22.10.2008 kl. 10:40]

Nína.

Frægar meyjar: Gene Kelly, Steinunn Sigurðardóttir, Sophia Loren, Sean Connery, Claudia Schiffer, Greta Garbo, Leonard Cohen og Ómar Ragnarsson.

Meyjar eru hagsýnar og duglegar en lítið gefnar fyrir langar og hugmyndafræðilegar samræður og vilja miklu frekar láta verkin tala. Þær vilja helst vera á fartinni, ekki þó stefnulaust, heldur að sinna einhverjum verkefnum. Meyjar hafa rökfasta hugsun og eiga bágt með að þola hirðuleysi og slóðaskap.

[Guðbjörn Guðbjörnsson, 22.10.2008 kl. 14:17]

Það er vonandi að þeir fari með þetta í 460.000 tonn!

[Þorsteinn Briem, 22.10.2008 kl. 15:32]

Guðbjörn. Samkvæmt viljayfirlýsingu Orkuveitu Reykjavíkur og Norðuráls vegna fyrirhugaðs álvers í Helguvík, og áætlunum sem liggja að baki henni, var gert ráð fyrir að Norðurál greiddi um 2,1 krónu á kílóvattstund í 25 ár.

Því meira sem nýtt álver hér myndi framleiða, því meira þyrfti það að flytja inn af hráefni, sem er nú ekki ókeypis. Og því meira ál, sem álverin framleiða, því meira rafmagn þurfa þau til starfseminnar og rafmagnsframleiðsla hér er nú engan veginn ókeypis heldur.

Raforkukostnaður meðalheimilis hérlendis hafði í byrjun september síðastliðins hækkað um 15% hjá flestum orkuveitum landsins frá ársbyrjun 2007 og raforkukostnaður íslenskra fyrirtækja hefur að sjálfsögðu einnig hækkað.

Þar að auki þyrfti Landsvirkjun, eða önnur íslensk raforkufyrirtæki, að taka lán erlendis fyrir virkjunarframkvæmdunum og nú er mun dýrara fyrir íslensk fyrirtæki að taka erlend lán en fyrr á þessu ári, ef fyrirtækin geta þá fengið slík lán á annað borð.

Skuldir Landsvirkjunar voru rúmlega 3,7 milljarðar Bandaríkjadala 31. júní síðastliðinn, eða um 438 milljarðar króna, miðað við 117 króna skráð gengi á Bandaríkjadal í dag.

Í árslok 2007 nam byggingarkostnaður þess hluta Kárahnjúkavirkjunar, sem ekki var kominn í rekstur, samtals 13,2 milljörðum króna en 105,9 milljarðar króna voru færðir meðal aflstöðva fyrirtækisins, auk 9,3 milljarða króna í flutningskerfi.

Þar að auki hefur verð á áli hrunið um 37% frá því í júlí síðastliðnum.

Landsvirkjun stendur því frammi fyrir gríðarlegum erfiðleikum á næstu árum og því hefur ráðningarsamningur Friðriks Sophussonar, forstjóra Landsvirkjunar, verið framlengdur til allt að tveggja ára.

[Gunnar Th. Gunnarsson, 22.10.2008 kl. 15:44]

Þetta með 37% verðhrun á áli er villandi staðhæfing, runnin undan rifjum áróðursmaskínu virkjana-andstæðinga. Álverð er, þrátt fyrir þessa lækkun, ennþá hærra en bjarsýnustu spár gerðu ráð fyrir, þegar samningar voru gerðir við Alcoa. Auk þess er gengisstaðan hagstæð Landsvirkjun, þó hún þýði hærri skuldastöðu í dollurum.  

[Þorsteinn Briem, 22.10.2008 kl. 17:44]

Gunnar minn.

1. Verð á raforku hækkaði samhliða verðhækkun á olíu.

2. Verð á olíu hefur hrunið.

3. Verð á áli hefur hrunið.

4. Landsvirkjun skuldar nú miklu meira í íslenskum krónum talið en hún gerði fyrir skömmu.

5. Landsvirkjun (til dæmis) þarf að taka stór erlend lán til að reisa hér stórar virkjanir.

6. Nú er mun dýrara en áður fyrir íslensk fyrirtæki að taka lán erlendis, ef þau fá erlend lán á annað borð.

7. Tveir plús tveir eru jafnt og fjórir.

[Gunnar Th. Gunnarsson, 22.10.2008 kl. 17:51]

Þetta með dýrari lán er alveg rétt, en greiðslubyrðin fyrir Landsvirkjun af núverandi lánum er ekk erfiðari en áður. En hættu að tala um hrun á álverði, það er villandi. Þú ættir frekar að tala um þann söðul sem hæsta álverðið sat í. Núverandi álverð er gott fyrir Landsvirkjun og við skulum vona að það lækki ekki meira en ca. 20% í viðbót. Við verðum í góðum málum ef svo verður. Lækkandi olíukostnaður getur þýtt að hjól atvinnulífsins fari að snúast betur óg neysla aukist í kjölfarið, sem er forsenda ansi margra atvinnugreina.

[Gunnar Th. Gunnarsson, 22.10.2008 kl. 17:56]

.... og með aukinni neyslu, hækkar álverð að nýju, þ.e. eftirspurnin eykst

[Þorsteinn Briem, 22.10.2008 kl. 19:19]

Gunnar.

1. Brent Norðursjávarolía lækkaði í verði á markaði í London í dag, fór í rúma 65 Bandaríkjadali tunnan í fyrsta skipti frá því í maí 2007, og verðið er nú svipað í dollurum talið og árið 1990, fyrir 18 árum, en verðið var um 140 dollarar í maí síðastliðnum.

Það er verðhrun, hvernig sem á það er litið.

Raforkuverð til álvera er tengt heimsmarkaðsverði á áli og þar með afkoma til dæmis Landsvirkjunar. Álverðið er nú um 2.100 Bandaríkjadalir fyrir tonnið og hefur ekki verið lægra í þrjú ár, eða frá haustmánuðum 2005. Og það hefur lækkað um 37% síðstliðna þrjá mánuði, sem er hraðasta verðlækkun á áli í sögunni.

Verðið var 3.300 dollarar þegar það fór hæst í júlí á þessu ári. Verðið nú er hins vegar svipað í dollurum talið og það var árið 1995, fyrir 13 árum.

Það er verðhrun hvernig sem á það er litið.

Reisa þarf virkjanir á skömmum tíma og taka til þess stór erlend lán, sem greidd eru til baka á löngum tíma í erlendum gjaldeyri, auk vaxta. Raforkuverðið er aftur á móti í samræmi við heimsmarkaðsverð á áli og mjög litlar líkur eru á að það hækki aftur á næstunni vegna efnahagsástandsins í heiminum.

[Gunnar Th. Gunnarsson, 23.10.2008 kl. 08:10]

Álverð hefur hækkað mikið frá því gengið var frá samningum um sölu á raforku til álvers Alcoa Fjarðaáls. Það var snemma árs 2003. Frá þeim tíma hefur verðið hækkað mikið þar til núna, fyrir þremur mánuðum.

[Þorsteinn Briem, 23.10.2008 kl. 13:20]

Verð á til dæmis áli og olíu hækkaði mikið á tímabili vegna aukinnar eftirspurnar, þar til fyrir skömmu að verðið hrundi vegna snarminnkaðrar eftirspurnar í heiminum.

Í ársbyrjun 2003 höfðu álmarkaðirnir hins vegar verið í lægð næstliðin ár, þá voru vextir á alþjóðlegum lánamörkuðum lágir og lánshæfismat Landsvirkjunar hefur versnað frá þeim tíma.

Nú er rætt um að íslenska ríkið fái 6 milljarða lán í Bandaríkjadölum talið frá Alþjóða gjaldeyrissjóðnum en skuldir Landsvirkjunar eru rúmir 3,7 milljarðar dollara, um 440 milljarðar króna, eða rúmlega 60% af fyrirhuguðu láni gjaldeyrissjóðsins til ríkisins, sem þykir nú ekki lág upphæð.

Í ársbyrjun 2006 var hins vegar gert ráð fyrir að skuldir Landsvirkjunar hækkuðu í um 155 milljarða króna í árslok 2008 en þá myndu þær ná hámarki.

Í ársbyrjun 2005 hafði arðsemi Landsvirkjunar verið mjög lítil næstliðin ár og arðsemi eigin fjár var einungis 2,8% að meðaltali á árunum 1998-2003, þrátt fyrir að fyrirtækið greiddi ekki tekjuskatt. En verðbólgan á þessu tímabili var 3,9% og því var arðsemin undir verðbólgu á þessu tímabili.

Í ársbyrjun 2005 var gert ráð fyrir að rekstrarkostnaður Kárahnjúkavirkjunar yrði um 740 milljónir króna á ári.

Og verðhrunið á áli nú er gríðarlega erfitt fyrir Landsvirkjun, þar sem orkuverðið til hennar er í samræmi við heimsmarkaðsverð á áli.

Gengishrun krónunnar undanfarið kemur hins vegar hinum erlendu eigendum álfyrirtækjanna hér til góða, því gengishrunið hefur lækkað launakostnað þessara erlendu fyrirtækja hér.

Í byrjun þessa árs fengu fyrirtækin um 62 krónur fyrir hvern Bandaríkjadal, sem þau notuðu til að greiða laun í álverunum hér, en miðað við skráð gengi á Bandaríkjadal í dag fá þau nú um 118 krónur fyrir hvern dollar, um 90% fleiri krónur en í ársbyrjun.

Launa- og launatengdur kostnaður allra 400 verkamanna Norðuráls (Century Aluminum) á Grundartanga er hins vegar ekki nema um 173 milljónir króna á mánuði, þar sem mánaðarlaun verkamanns þar eru um 308 þúsund krónur eftir sjö ára starf hjá fyrirtækinu.

Aðrir starfsmenn Norðuráls eru um 100 talsins og ef við reiknum með að meðallaun þeirra séu um 500 þúsund krónur á mánuði eru laun og launatengd gjöld allra starfsmanna Norðuráls um 240 milljónir króna a mánuði.

CCP á Grandagarði selur hins vegar tölvuleikinn (Netleikinn) EVE Online til tæplega 300 þúsund erlendra áskrifenda fyrir um 600 milljónir króna á mánuði í erlendum gjaldeyri, sem nægir til að greiða laun og launatengd gjöld allra verkamanna í öllum álverunum á Grundartanga, við Reyðarfjörð (Alcoa) og í Hafnarfirði (Alcan, Rio Tinto).

Hrun á olíuverði og nýleg vaxtalækkun hér kemur aftur á móti almenningi, fyrirtækjum, sjávarútveginum og landbúnaðinum til góða, þannig að verðhækkanir á íslenskum landbúnaðarvörum verða minni en ella. Og rekstrarkostnaður til dæmis leigubíla, vörubíla og lögreglubíla verður mun lægri en fyrr á þessu ári.

Hins vegar mega vextir ekki fara mikið niður fyrir verðbólguna, þannig að svipað ástand skapist hér og fyrir nokkrum áratugum, þegar andvirði 20 þúsund þriggja herbergja íbúða á höfuðborgarsvæðinu var fært frá sparifjáreigendum til lántakenda.

[Gunnar Th. Gunnarsson, 23.10.2008 kl. 16:14]

Þú étur allar tölur greinilega upp eftir stóriðjuandstæðingum, sem matreiða hlutina eftir hentugleikum. Og "gróði" álfyrirtækjanna vegna gengisþróunar kemur okkur ekkert við og vertu ekki að blanda þeim inn í umræðuna eins og kommúnisti.

• Þú skilur greinilega ekki samhengi hlutana Steini.
•  Hver heldur þú að ástæðan sé fyrir verðfalli á álafurðum síðustu 3 mánuði?
• Heldur þú að þær ástæður séu viðvarandi?
• Hefurðu kynnt þér langtímaspár um framboð og eftirspurn eftir áli?
• Hefurðu borið saman núverandi álverð við þær spár sem Landsvirkjun miðaði við í arðsemisútreikningum sínum í samningunum við Alcoa?
• Heldurðu að arðsemisniðurstöður taki ekki tillit til verðbólgu?
• Finnst þér málefnalegt að tala bara um strípuð lægstu laun í fyrirtækjum, en ekki um meðallaun?
• Ef lægstu laun, strípuð, eru 308 þús, finnst þér þá líklegt að meðallaun séu 432 þús.?
•  Finnst þér rétt að sleppa heildarumsvifunum sem fyrirtæki skapar með starfsemi sinni?

[Þorsteinn Briem, 23.10.2008 kl. 19:02]

Ástæðan fyrir verðhruni á olíu og áli undanfarið er minni eftirspurn í heiminum. Bílaframleiðsla dregst til dæmis saman, sem veldur minni eftirspurn en ráð var fyrir gert eftir bæði olíu og áli, sem er næstmest notaða efnið í bíla.

Spár, einnig Landsvirkjunar, hafa gert ráð fyrir að heimsmarkaðsverð á áli, sem reiknað er í Bandaríkjadölum, muni lækka á næstu áratugum. Þannig gerði Landsvirkjun ráð fyrir því í ársbyrjun 2003 að álverðið verði um 1.550 Bandaríkjadalir fyrir tonnið árið 2010 en um 1.400 dalir árið 2030, reiknað á verðlagi ársins 2002, miðað við vísitölu framleiðendaverðs í Bandaríkjunum.

Laun verkamanns, sem unnið hefur í sjö ár hjá Norðuráli (Century Aluminum) á Grundartanga, eru 308.994 krónur á mánuði, samkvæmt Verkalýðsfélagi Akraness, um 433 þúsund krónur með launatengdum gjöldum, um 40% ofan á sjálf launin. Norðurál tók hins vegar til starfa fyrir tíu árum, þannig að margir hafa unnið þar skemur en sjö ár en einhverjir lengur.

Laun starfsmanna CCP eru hins vegar mun hærri en laun verkamanna í álverunum hér. Þeir fyrrnefndu þjóna tæplega 300 þúsund erlendum notendum Netleiksins EVE Online fyrir um 600 milljóna króna gjaldeyristekjur á mánuði, án mengunar og innflutnings á báxíti í gríðarmiklum mæli.

Og þessi 600 milljóna króna gjaldeyrir kemur að sjálfsögðu að góðum notum fyrir þjóðarbúið, ekki síst í öllum gjaldeyrisskortinum núna. Hins vegar þarf CCP ekki á miklum erlendum aðföngum að halda en þarf að sjálfsögðu að kaupa tölvur fyrir starfsmennina.

Landsvirkjun fær greitt í erlendri mynt fyrir rafmagnið, sem hún framleiðir, og greiðir jafnframt afborganir af lánum í erlendri mynt. Landsvirkjun skuldar gríðarlegar fjárhæðir, rúmlega 3,7 milljarða í Bandaríkjadölum, og í ársbyrjun 2005 var gert ráð fyrir að rekstrarkostnaður Kárahnjúkavirkjunar yrði um 740 milljónir króna á ári.

Það vantaði nú ekki að íslensku bankarnir væru með gríðarleg umsvif, bæði hérlendis og erlendis, fyrr á þessu ári en þeir eru nú allir gjaldþrota. Skuldir Landsvirkjunar verða hins vegar aldrei afskrifaðar, því íslenska ríkið er ábyrgt fyrir þeim.

Mörg þúsund útlendingar, aðallega Pólverjar, hafa unnið árum saman í fiskvinnslum hérlendis, þannig að hér hefur verið nóg vinna fyrir íslenskt verkafólk um land allt. Geti Pólverjar unnið hér í fiski geta Íslendingar það einnig.

Fiskvinnslurnar hafa hins vegar ekki getað keppt í launagreiðslum við álverin hér. Með gengisfalli krónunnar verður aftur á móti auðveldara fyrir sjávarútvegsfyrirtækin að greiða fiskverkafólki og sjómönnum hærri laun en undanfarin ár.

[Gunnar Th. Gunnarsson, 23.10.2008 kl. 19:59]

Ég hefði kannski átt að orða spurninguna um verðfallið öðruvísi. Hvers vegna er minni eftirspurn? Það er mjög einfalt svar við því, það er vegna lausafjárkreppunnar. Öll umsvif í heiminum hafa minnkað undanfarnar vikur, en það ástand mun ekki vara lengi held ég (vona það a.m.k.)  Lækkandi olíuverð mun hjálpa til við að koma efnahagshjólunum af stað aftur en OPEC ríkin munu auðvitað draga úr olíuframleiðslunni til þess að ná olíuverðinu eitthvað upp aftur, þegar aftur rofar til. Þau eru reyndar að sammælast nú þegar að draga úr framleiðslunni. 

Auðveldara að greiða sjómönnum hærri laun! Það segir sig sjálft Steini, því þeir eru á aflahlut, en ég er ekki viss um að landverkafólk njóti gengisþróunarinnar vegna gífurlegra skulda greinarinnar.

[Þorsteinn Briem, 23.10.2008 kl. 21:51]

Sjávarútvegsfyrirtækin hér fá nú um 90% fleiri krónur fyrir hvern Bandaríkjadal en í byrjun þessa árs, rétt eins og erlendir eigendur álfyrirtækjanna hér, og geta því greitt sjómönnum og fiskverkafólki hærri laun en áður.

Gengi krónunnar mun styrkjast aftur á næstunni en engan veginn um 90%, enda var gengi krónunnar alltof hátt skráð og gerði þannig sjávarútveginum erfitt fyrir.

Sjávarútvegurinn skuldar mikið, eins og Landsvirkjun, en verð á fiski hefur hækkað mikið erlendis undanfarin ár og verð á olíu hefur hrunið undanfarið. Sjávarútvegurinn getur því vel greitt bæði sjómönnum og fiskverkafólki hærri laun en hann hefur gert undanfarið. Og markaðsverð á fiski erlendis hefur áhrif hér á verð á fiski upp úr sjó.

Lægra gengi krónunnar vegur hins vegar upp á móti lækkun olíuverðs í Bandaríkjadölum, eins og gengið er núna. Krónan hefur fallið um 63% gagnvart Bandaríkjadal síðastliðna fimm mánuði og verðið á Brent Norðursjávarolíu hefur fallið um 53% á sama tíma.

Heimsmarkaðurinn fyrir vöru og þjónustu er ekki eins fljótur að jafna sig og íslenski markaðurinn, sem er fljótur að aðlagast nýjum aðstæðum, meðal annars vegna smæðar.

Olíuframleiðsluríkin, til dæmis Rússland, draga nú saman framleiðsluna, bílaframleiðendur stórminnka sína framleiðslu, sala á olíu og nýjum bílum til Kína snarminnkar, og Kínverjar framleiða nú mun minna en áður af alls kyns vörum fyrir Vesturlönd, til dæmis Bandaríkin.

[Gunnar Th. Gunnarsson, 23.10.2008 kl. 22:41]

Jafnvel þó svigrúm væri fyrir sjávarútvegsfyrirtæki að hækka laun landverkafólks (sem þau hafa ekki held ég), þá væri það mjög óábyrgt og reyndar óðs manns æði að raska launamarkaði með slíku um þessar mundir. A.m.k. ef það næmi einhverju sem skiptir máli fyrir þetta láglaunafólk

[Þorsteinn Briem, 23.10.2008 kl. 23:58]

Fiskverkafólk á að fá launahækkanir á næsta ári, enda ætti sávarútvegurinn að hafa efni á því. Gengi krónunnar mun þó að öllum líkindum styrkjast töluvert  frá því sem nú er, en langt frá því um 90%, og olíuverðið mun trúlega hækka eitthvað, en engan veginn um 50%.

Verðbólgan hér var um 14,5% í ágúst síðastliðnum og 14% í síðasta mánuði, hefur ekki verið meiri frá árinu 1990, og því fljót að éta upp allar launahækkanir. Hún mun hins vegar hjaðna mikið á næsta ári og launahæstu hóparnir munu ekki krefjast mikilla launahækkana þá vegna efnahagssamdráttarins.

En hér var komin um 12% verðbólga strax í apríl síðastliðnum og það var mesta hækkun verðbólgu hérlendis á einum mánuði í 20 ár.

[Þorsteinn Briem, 24.10.2008 kl. 05:50]

Gengi krónunnar mun þó að öllum líkindum styrkjast töluvert á næstunni frá því sem nú er, en langt frá því um 50%, og olíuverðið mun trúlega hækka eitthvað, en engan veginn um 90%, átti þetta nú að vera hér að ofan.

Heimsmarkaðsverðið á olíufatinu er nú um 67 Bandaríkjadalir, hækkaði í gær um 4%, en var 130-140 dalir í maí síðastliðnum.

Íslenska ríkið yfirtók í ársbyrjun 2007 eignarhlut Reykjavíkur og Akureyrar í Landsvirkjun, sem er nú sameignarfélag í eigu ríkisins.