Hvernig er plan B Þorgerðar ?

Þegar Bubbi Morthens innti Þorgerði Katrín Gunnarsdóttur eftir því í útvarpsþætti sínum í kvöld hvað henni fyndist um þær tillögur sem komið hafa fram um viðbrögð við gjaldeyriskreppunni, þ. á. m. að skipta umsvifalaust yfir í evru, sagði hún að verið væri að vinna við plan B ef ekki tækist að losna úr pattstöðunni hjá IMF.

Sem flugmanni finnst mér það ætíð af hinu góða þegar ein höfuðregla flugsins er notuð á öðrum sviðum. Í fluginu, einkum í blindflugi, verður að minnsta kosti að vera fyrir hendi plan B og helst fleiri áætlanir. Annars kann illa að fara.
Það sem hefur vantað á fram að þessu er að menn hafi hugað betur að mismunandi leikjum í þessari skák og metið stöðuna fyrirfram nógu vel til að forðast afleiki.

Mér fannst þessi ummæli Þorgerðar Katrínar heilmikil frétt. Forvitnin vaknaði um það í hverju þetta plan B fælist. Kannski má ekki segja okkur frá því fremur en svo mörgu öðru til þess að mótherjinn, Bretar, sjái ekki á spilin okkar.

En er víst að það sé betra að hafa það þannig?. Ef við lumum á sæmilegri leið út úr horninu, sem búið er að króa okkur inni í, kynni kannski að vera betra að Bretar áttuðu sig á því og gengju þar með til sanngjarnrar lausnar á þessari deilu.

Lýk þessu svo með því að þakka Bubba fyrir einstaklega athyglisverðan þátt og viðtal á þeim nótum sem honum er einum lagið að slá.

Athugasemdir

[ÞA (IP-tala skráð) 11.11.2008 kl. 02:42]

Vona svo sannarlega að það sé að leita til Rússa og Kínverja Við getum svo sent "vinum" okkar á Norðurlöndunum fingurinn um leið og IMF

[Logi Gunnarsson (IP-tala skráð) 11.11.2008 kl. 05:38]

Ég hef hrifist af spurningunum sem upp hafa komið í þessarri kreppu okkar fróma lands. "Hvernig er plan B" er brillíant. "Hvernig er plan A" var góð líka. Við vitum hálft svarið við henni; sækja um lán hjá IMF, en ekki hvað á að gera við það.

Hrifningin er sérstök vegna þess á yfirborðinu virðast þessar spurningar vera svo einfaldar og blátt áfram að leikur ætti að vera að svara þeim snuðrulaust og skilmerkilega. En, aha, þar liggur galdurinn einmitt. Eins og flóknustu spuringar úr heimspekinni, s.s. hver er tilgangur lífsins, er Guð til, er ljós í ísskápnum eftir að hurðinni er lokað, þá eru engin auðfundin svör við þessum spurningum!

Ég gæti aldrei pælt mig fram úr þessum spurningum sjálfur en þess vegna er ég svo voðalega þakklátur véfréttinni okkar, Geir Haarde, sem læðir að okkur molum af svörum og hálfkveðnum vísum sem við getum dægurlangt dundað okkur við að ráða fram úr og draga ályktanir af.

Ég skil ekki þetta fólk sem vill vita svörin án þess að glíma við gáturnar og æfa heilakvarnirnar. Hvað væri gaman að vita svarið við, "Er lögfræðilegur grundvöllur fyrir því að erlend þjóð setji á okkur ábyrgðarskyldu vegna vanskila einkaaðilja í viðskptum" eða "Þarf ég að flytja úr landi til að eiga mér framtíð,'" eða "Verða uppþot með ofbeldi og mannskaða þegar vöruskortur verður í landinu?" Fattar fólk ekki að það tekur fúttið úr fönninu. Hvers konar kreppu gætum við notið ef ekki væri óttanum, kvíðanum og vonleysinu fyrir að fara. Ég spyr bara.

Svona, áfram með getgáturnar.