Að "láta engan ráða yfir sér."

Hellisheiði er orðin fær. Þar með getur maður verið 10 mínútum fljótari milli Suðurlands og Reykjavíkur en ef ekið er um Þrengslin. Það er nú allur tímamunurinn sem vinnst.  

Strax í fréttum ljósvakamiðlanna síðdegis í gær glumdu þær fréttir að Hellisheiði yrði ófær um nóttina.

Það þýðir svipað og þegar ég fór vestur yfir Fjall fyrir nokkrum dögum að stórt rautt ljós kviknaði á áberandi skiltum sitt hvorum megin þegar heiðin varð ófær.

Málið hefði verið einfalt ef þetta hefði til dæmis verið í Noregi. Fólk hefði farið eftir skiltunum og margítrekuðum aðvörunum.

En ekki hér á Íslandi. "Á Íslandi við getum verið kóngar allir hreint /  og látum engan yfir okkur ráða" var sungið hér í den og er sungið enn.

Fólk lagði samt á heiðina í því skyni að græða tíu mínútur og mátt þó vita að veður þar og færð væri eins og vanalega það miklu lakari en í Þrengslunum að útilokað væri að græða neitt á því.

En, nei, það lagði samt á heiðina og lét björgunarsveitarmenn bjarga sér með ærnum kostnaði og fyrirhöfn. Oft er það líka svo að bíla verður að skilja eftir og þeir safna síðan að sér snjó og torvelda svo mokstur að heiðin opnast seinna en ella.

Þetta á eftir að gerast aftur, - og aftur og aftur og aftur. Það virðist þurfa eitthvað miklu meira til þess að fólk láti sér segjast. Til dæmis það að lofa því bara að vera í bílunum þangað til heiðin er opnuð.

En það er ekki hægt því að enginn veit nema einhver farþeginn sé heilsutæpur einstaklingur eða jafnvel ungabarn. Á Íslandi má eiga von á hverju sem er.

Ég horfði á bíl fyrir nokkrum dögum silast niður Kambana á 40 kílómetra hraða með langa halarófu á eftir sér alla leiðina.  Samt var ekki hált. Hættuástand myndaðist í brekkunni vegna þess að aðrir ökumenn reyndu að komast fram fyrir þennan mikla "lestarstjóra."

En þegar ég kom síðar að bílnum við bensínstöð í Hveragerði sá ég að bíllinn var á sléttum sumardekkjum. Samt lagði hann á heiðina eins og hann væri einn í heiminum.  

Hellisheiði orðin fær

Athugasemdir

[Þorsteinn Briem, 21.12.2008 kl. 18:28]

Í Leifi enginn leiði,
er lagði upp á Heiði,
grænt fékk ljós,
svo gríðar hrós,
á öndverðum voru þó meiði.

[Kristján Sigurður Kristjánsson, 21.12.2008 kl. 22:56]

Skýringin er þessi: Í huga Vegagerðarinnar á fólk ekki að vera á flækingi, það er fífl, þeir einir eiga að nota vegina sem þurfa. Þeir sem þurfa að nota vegina eru þeir hinir sömu og þurftu jeppa að áliti Fjárhagsráðs hér á árunum. Með sömu rökum þarf ekki að merkja að að þessi eða hin gatnamótin séu lokuð, fólk á ekki að vera flækjast að óþörfu og getur sjálfum sér kennt ef það lendir í sjálfheldu. Þegar ég vann í vegagerð fyrir margt löngu var það viðtekin skoðun að almenningi væri vegagerð algerlega óviðkomandi og að ferðafólk væri fífl og flækingar. Sú skoðun stendur bjargföst enn.

Og þá er ég kominn að kjarna málsins: Ég hef alltaf komist leiðar minnar þegar Vegagerðin hefur auglýst "ófært" meira að segja á Fiat 127. Fjölmiðlar éta þetta svo gagnrýnislaust upp og segja að það sé "ekkert" ferðaveður. Les: fólk á "ekkert" að vera flækjast, eða hann/hún hefur "ekkert" að gera við þetta eða hitt. (Fjárhagsráð: Hann hefur "ekkert" við jeppa að gera)

Ég hef oft staðið mig að því að finnast fólk vera fífl, ég hef meira að segja haldið því fram að fólk sé fífl, þó einkum og sérílagi flækingar. En merkin sýna annað fólk er ekki fífl þó að Vegagerðin og ég haldi því fram

[Ómar Ragnarsson, 22.12.2008 kl. 00:22]

Ef þetta var svona vitlaust hjá Vegagerðinni að auglýsa að heiðin væri lokuð, hvers vegna festust þá sex bílar með tólf manns á heiðinni og þurfti að bjarga þeim?

Og hvers vegna var þetta fólk að taka þessa áhættu til þess að vera í mesta lagi tíu mínútum fljótara yfir? 

[Kristján Sigurður Kristjánsson, 22.12.2008 kl. 13:37]

Kl. 19:00 þ. 20. er auglýst að Hellisheiðin sé "ófær". Kl. 11:50 þ. 21. er auglýst að heiðin sé orðin fær.

Í þessum 16 tímum sem heiðin er "ófær" fara fleiri hundruð bílar um heiðina. Ég ítreka fyrri færslu mína. 1. gr. l. um vegagerð: Fólk er fífl.

Varðandi Þrengslin; það er fjöldi manna á Suðurlandi og Reykjavík sem veit ekkert að þau séu til nema að vegurinn sé kanski mjög þröngur. Kanske er það satt hjá mér og Vegagerðinni að fólk sé fífl, allavega þessi 3-5%  sem sátu fastir á heiðinni en það sama prósenta fífla sem festist á götum borgarinnar þegar þæfingur verður þar.