Grátlegt norskt mark.

Íslenska landsliðið í knattspyrnu átti góða stund á Laugardalsvelli í kvöld og kvaddi undankeppni heimsmeistaramótsins með góðum endaspretti sem kom því miður of seint í keppnini í riðlinum.

Við vorum betri en Norðmenn og áttum þess vegna skilið að vinna, en grátlegt mark, sem Norðmenn fengu á ódýran hátt í fyrri hálfleik kom í veg fyrir íslenskan sigur.

Markið fékkst með því sem kallast á hernaðar- og íþróttamáli "element of surprise", eða "gildi hins óvænta."

Við uppstillingu íslenska liðsins gagnvart aukaspyrnu Norðmanna var markverðinum gefin eftir hæfilega stór glufa í varnarveggnum til þess að hann gæti strax séð, hvert boltinn myndi stefna.

Jafnframt var glufan höfð það lítil að markvörðurinn væri öruggur með hvert það skot sem svo ólíklega vildi til að kæmi þar í gegn.  

Svo virtist sem Gunnleifur reiknaði alls ekki með því að með því að John Aarne Riise dytti í hug að spyrna boltanum beint í gegnum glufuna.

Svo var að sjá að honum sýndist Riise ætla að lyfta boltanum til vinstri yfir varnarvegginn og var lagður af stað í þá átt þegar firnafast skot kom í þess stað beint í gegnum glufuna, skot sem hefði stefnt beint á markvörðinn, ef hann hefði staðið kyrr. 

Hvað um það, - íslenska liðið á allt skilið hrós fyrir baráttuna og það að stimpla það inn að Norðmenn áttu ekkert frekar skilið en við að komast áfram í keppninni. 

Norðmenn sluppu fyrir horn

Athugasemdir

[Halldór Jóhannsson, 5.9.2009 kl. 21:48]

Sæll meistari..Ekki þori ég að rengja þig í þessum efnum...Það ekkert lið sem á skilið að komast áfram nema Holland úr þessum riðli..Kveðja.

[Öndin trítilóða (IP-tala skráð) 5.9.2009 kl. 23:31]

Þeir stóðu sig vel, drengirnir. Tók sjálfur fram fánann, nagaði neglur og  þóttist svekktur í leikslok. En það er engin ástæða fyrir svekkelsi.

Strákarnir okkar voru betri. Með svona spilamennsku er engin ástæða til að kvíða næstu keppni.

Takk, strákar, fyrir frábæran leik!